أبلغها أو أسكت ؟

السلام عليكم ورحمة الله

بنات انا عندي حساب على تويتر وتابعني واحد له منصب متقاعد وتابعته وبعد ما تابعته على طول تفاجأت منه برسالة مدح شديد لحسابي وبعدها بساعة تقريبا ارسل رسالة ثانية تفهمين منها ان غرضها سيء لكن ما كانت صريحة واحتياطا الغيت متابعته ولمحت عالعام اني نوع ما يقبل وهو رد عالعام تلميحا اني موسوسة وهو ما يقصد ويؤكد الخ بعدها انبني ضميري اني ممكن اكون ظلمته خاصة ان اغلب كتاباته عالعام دينية ورجعت المتابعة وجلس فترة ما ارسل ثم ارسل يشتكي من حياته وامور تخصه ورديت عليه رد جاف كله نصائح دينية ختمته اني مو مصلحة اجتماعية ولا نفسية ولا انفع استشارة وفي هالرسالة من ضمن ما قاله قال انه يتمنى يسمع كلمة طيبة من انسان ! سألته ايش هالكلمة ؟ قال انت تحديدا مستحيل تعطينياها حتى لو طلعت من جلدي ففهمت ان الكلمة اكيد غلط وطنشت ..

بعدها جلس فترة ثم ارسل رسالة يلمح عن علاقة ممكن تفهمين منها انه يبي زوجة وممكن تفهمين انه يبي صديقة يعني مش واضحة تماما !! وفي الرسالة حاط الورود الصغيرة اللي تجي في ايفون !! فقلت له انا كل اللي هنا انظر لهم على انهم اخواني في الاسلام ولاني من النوع البايخ ولا عمري كونت علاقة مع رجل ولا راح اكون ونهرته بقوة فرجع يقول انه ما يقصد شيء شين فحذرته وقلت اذا ارسلت مرة ثانية راح الغي المتابعة مهما كان مضمون الرسالة حتى لو سلام واذا يبي يقول شيء يقوله عالعام..

بعدها بفترة طويلة ارسل لي رسالة يقول انا موافق على شرطك ( يقصد نكون اخوة في الاسلام) تكون علاقتنا بعيدة عما يغضب الله بس ما نكون اخوان نكون اصدقاء ! سألته اي ارفع علاقة اخ او علاقة صديق قال معك حق الاخ ارفع بس ما اقدر اكون اخ !!
هنا خلاص انا فهمت شخصيته وضميري ارتاح فما رديت عليه رحت والغيت المتابعة فورا وبلكته !
طبعا صار يكتب عالعام ويلمح اني معقدة ويحاول ارجع المتابعة وووو بس تجاهلت لاني خلاص تأكدت اني ما ظلمته..

وكنت ادخل حسابه اشوف الوضع والاحظ انه يضيف بنات كثير ويناقش البنات بود ويتلطف معهن عكس الرجال يكون غالبا مو دائما جاف ومختصر معهم وفي نفس الوقت اشوف بعض البنات بعد فترة يبطلون مناقشته .. وايضا يكتب تويتات عن الحب والشوق والعتب وانه بريء وان الناس يسيئون الظن فافهم انه حاول معهم مثل ما حاول معي وصدوه ..

كل اللي فوق مقدمة للتوضيح المهم اللي جاي

من فترة دخلت وحدة وصارت تناقشه وللأمانة حسابها واضح منه انها نزيهة وطيبة ..
المهم بعد فترة لاحظت انها الغت متابعته فرجع يستخدم معها نفس اللي استخدمه معي من تويتات انه بريء وكلام عن سوء الظن ووو
بعد فترة رجعت وتابعته وتابعها !
الان صرت الاحظ حسابها تغير صارت تفضل شعر حب ومن هالنوع وحسيتها لانت له وطبعا اتوقع انها مش منتبهة للي في حسابه وتعامله مع البنات قبلها اضافة الى انه صار يضيف حسابات اباحية ويلغيها بعد فترة..

لمحت لها عالعام واظن انها فهمت التلميح ( طبعا كل اللي قلته ان الواحد ما ينخدع والانسان يراعي دينه وهكذا ) فعملت رتويت لتغريداتي ورد هو على ردودها علي بمعنى يعاكس الكلام اللي اقوله .. يعني اذا قلت الانسان المؤمن تقي يقول الايمان في القلب وهكذا.. ثم رد على تغريداتي تلميحا عالعام اني معقدة واخاف الحب وووخرابيطه المعتادة

لكن اللي حاصل انه واضح انها انخدعت وللعلم هو اسلوبه معسول جدا ويجيد الكلام ويمدح كثير تغريدات اللي يبي يشبكها واذا تكتب باسم صريح يمدح عائلتها او مدينتها وانتم عارفين كثير من النساء ياكل عقلها الكلام الحلو !

الان ايش رايكم في الموضوع ؟
هل احذرها عالخاص منه او ما راح تتفهم ؟ مع العلم اني مو جريئة في هالناحية واحتمال القيام بنصيحتها ما يتعدى 10 ٪
انا احس انه يمكن قالب الموضوع ومحذرها مني علشان ما تسمع لو نصحتها !

وفي نفس الوقت خايفة يكون عنده نية يتزوجها وماخذ الحب مدخل واخرب عليه !

مع العلم انه سبق وكتب في تويتاته عن علاقات الحب وانه مو شرط تنتهي بالزواج وان المكان يكون بعيد والقلوب قريبة ويستشهد داىما بقصة مي وجبران !! ويوم يقول لي نكون اصدقاء ذكر مي وجبران !!

ومرة كتب ان اللي يتزوج عن حب يبقى اوثق .. بس كل ما تذكرت انه يقول لي نكون اصدقاء اشك فيه هذا غير اشياء ثانية لاحظتها على حسابه ما قلتها علشان ما تأثر على آرائكم

انا في صراع مع ضميري اخاف اتركها وتحاجني عند الله واخاف اقول لها ويكون هدفه الزواج واخرب عليه !!


لو مكاني ايش تعملوا ؟

ورجاء ردود عقلانية حطوا الله امامكم وانتم تكتبوها