أبوي شاف الفطور اليوم أشكال وألوان وجلس يبــــــكي .. !! تعالي أبغاك بسالفة ياغالية..

السلام عليكم ورحمة الله وبركاته


رجاء

اللي تقرأ كلامي لاتجلس تعور قلبي وتتفلسف

وتقول انه رمضان شهر ماناكل فيه الا قطايف وكنافة

وانه فلوسنا واحنا أحرار فيها << هذا كلام واحدة مانسيته الى اليوم كاتبته هنا بالمنتدى

تقول وش دخلكم فلوسنا وتعبنا نصرفها على كيفنا

صحيح انها فلوسكم وتصرفونها بكيفكم

حتى لو تحرقونها

بس تذكروا الآية

قال تعالى :
( ثم لتسألن يومئذ عن النعيم )




تبون تعرفون سبب كتابتي للموضوع هذا؟؟


اليوم اختي كانت عندنا وكلمها زوجها وجاب لها اغراض تصلح بها فطور عشان اصحابه بيفطرون عنده في بيت امه

وجلست اليوم عندنا تجهز وتطبخ وتعجن

والله ماكثرنا طبخ

بس شوربة وكنافة

وهي صلحت معها سينابون وصينية بيتزا المكرونة


فقط


فقط



اخذت نص الفطور وتركت نصه

احنا حطينا سفرتنا

وجلسنا



ابوي سبق وقلت لكم انه كان مريض وبالعناية الله يشفيه

كان جالس معنا على السفرة وشاف الاكل اشكال وألوان


وجلس يتكلم بنبرة بكاء وغصة:

ليه التبذير هذا؟
غيرنا والله والله مايلقى اللقمة
وقال:
ثم لتسألن يومئذ عن النعيم


قلت له : ياابوي ان بقي شيء منه بياكلونه الصغار
قال: تضحكين علي والا على نفسك؟
محد بياكله لانه كثير
والذنب حق التبذير هذا مابيروح برا
راح ينكتب عليكم وعلى امكم لانها ماعلمتكم انه حرام تبذرون

وبكى


ولف شماغه على وجهه ولاأفطر
وامي بس تمسح دموعها ولا اكلت

والله يابنات

مثلما حطينا السفرة رفعناها

والباقي كان كثير انا اخذت منه لبيتي لاني كنت مسافرة واخذته للصغار عندي يتعشون منه والباقي رفعته لبكرة احطه على السفرة




الغرض من هالقصة كلها


انتبهوا ياغاليات من التبذير

انتبهوا


كلنا نعرف نطبخ وكلنا نصلح صواني

وكلنا نتفنن

الدواليب مليانة اكل

والثلاجة مليانة اكل

ومع هذا كل يوم نرسل فلان للبقالة يشتري اغراض حقت طبخة او حلى

ليه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟



فكروا في غيركم
والله انهم يبكون مايلقون الاكل

اعرف كثير والله كثير

واحدة تقول اكل الصامولي ناشف واشرب مويه

قلت ليش؟

تقول لي : مامعنا حتى 10 ريال


واحدة قابلتها في المستشفى وكانت تعبانة وتحكينا عن زوجها يشتغل حمال في سوق الخضرة ويفرح لما يكسب عشرة او خمسة ريال

تقول نفرح ونتجمع بالليل نتعشى بها

وش تسوي خمسة ريال بهالزمن

واعرف واحدة هنا بالمنتدى تقول ان زوجها متسلف مقاضي رمضان

ويبكي يبي لحم مشتهية ومو لاقيه


وانا بنفسي وبعيني شفت بالمدينة المنورة
ثلاثة اولاد اظنهم بالمتوسطة وكانو يمشون بالشارع
وواحد منهم لقى خبز يابس ناشف جنب برادة ماء بالشارع
شفته بعيني لقطها بيده وراح

فيه ناااااااااااااااس محتاااااااااجين
بس والله متعففين
يبكون من الجوع ولايقدرون يطلبون الناس

لااشوف واحدة تقول لي : الحمد لله احنا بخير ونعمة
اطلعي من برجك العاجي يافلانة وفلانة
شوفوا غيركم المحتاج

ولاتجي واحدة تقول جمعيات خيرية

رجاءً

لاني بنفسي اتصلت عليهم في مكة عشان عائلة كانو محتاجين
وردت علي واحدة تنافخ تقول لي : لازم يجون الجميعة ولازم اوراق مالها اول ولا اخر

والجمعيات هذي مين يدعمها بالتبرعات؟؟؟

وين احنا الحريم عنها

ليه ياغاليات مانحط كل اسبوع مبلغ لو 100 ريال للجمعية وكلامي هذا يخص اللي يدورون بالاسواق من الحين يقضون للعيد


اسبوع واحد

حطي فيه 100 ريال للجمعية

بلاش 100

خليها 50 ريال


والله ماتدرون انها الخمسين هذي تفرح مساكين كثير

تفرح قلوب كثيرة


ليه مانبدأ في رمضان الحين

بدل مانحطها بالحلويات والاغراض اللي مالها داعي

حطي كل فترة صدقة بمبلغ مالي غير محدد

حطي لو ريال


انقذي بها نفسك من النار


{يَا أَيُّهَا الَّذِينَ آمَنُوا لَا تُلْهِكُمْ أَمْوَالُكُمْ وَلَا أَوْلَادُكُمْ عَن ذِكْرِ اللَّهِ وَمَن يَفْعَلْ ذَلِكَ فَأُوْلَئِكَ هُمُ الْخَاسِرُونَ{9} وَأَنفِقُوا مِن مَّا رَزَقْنَاكُم مِّن قَبْلِ أَن يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَى أَجَلٍ قَرِيبٍ فَأَصَّدَّقَ وَأَكُن مِّنَ الصَّالِحِينَ{10} وَلَن يُؤَخِّرَ اللَّهُ نَفْساً إِذَا جَاء أَجَلُهَا وَاللَّهُ خَبِيرٌ بِمَا تَعْمَلُونَ{11}




يا معشر النساء اكثرن من الصدقة فأنى رأيتكن اكثر أهل النار



اتمنى ياغاليات توصل لقلووبكم
وتكون يدكم يد واحدة
خلونا ياغاليات نبدأ من رمضان
لاتقولين بعدين


خلاص

ماعاد باقي وقت

أبدأي من الحين

لاتقولين يوه مشوار ويبي له شغلة

الشغلة بسيطة

حطي فلوسك بيد زوجك او اخوك وقولي وصلها للجمعية
او شوف احد محتاج من الجيران او زملائك او حتى فلانة قريبتنا

ووصلها لهم

خلي قلبك ابيض ونظيف
خلي همتك عالية
خلي اخواتك هنا يقتدون بك ويقولون أنا معك



ربي يوفقكم ويكتب لكم الاجر