أخاف بنتي تنخطف :(

السلام عليكم اخواتي ....
هالموضوع شاغلني بشكل فظيع والله أمس ماغمضت عيني
يروح ويجي على بالي من زمااااان والله من سنين... وزاد لما صار عندي بنت ...
دخلت النت قبل يومين والقى صورة بنت اسمها عيدة (نزلوا موضوعها في أحد الأقسام)
عمرها تسع سنوات وانخطفت من أمام منزلها يوم العيد في الرياض ...
وقبل اسبوع انخطفت بنت عمرها 7 في المدينة اللي أنا فيها (مغتربة) وحاطين صورها بكل مكان ...
وعورني قلبي والله صرت اضم بنتي وادعي ان الله مايحطني بهالموقف ....
عندي تموت قدامي بسم الله عليها الله يحفظها ولا تنخطف ومادري هل هي عايشه ولا لا...
خايفه جوعانه تعبانه تتألم !!!! اذا كنت طالعه لو اي أحد يقرب من عربية بنتي انهبل ...
ماتتخيلون قد ايش هالموضوع مخوفني .... يمكن لأني انحطيت بموقفين وأنا صغيرة وتركت أثر ...

الموقف الأول كنت يمكن بأول أو ثاني ابتدائي وكان رمضان
وأبوي متعود برمضان يستقبل أهل الحارة في المحلق شاهي وقهوة بعد صلاة التراويح
وباب الشارع طبعا مفتوح على الأخير من بعد الصلاة ...
كنت ألعب في الحوش واشوف واحد في الشارع يطالع يمين ويسار
وقرب من الباب وينادي بنت بنت تعالي اقول لك شي... أنا من غبائي توقعته واحد يعرف أبوي
وبيسأل عن أبوي قربت منه (اقسم بالله كني اشوفه الحين قدامي ملامحة مانسيتها) الله لايسامحه
وسبحان الله ربي حماني وفجأة شفته يركض
واسمع واحد يقول هييييه هيييه انت وقف وقف
وأنا احط رجلي فوق عند أهلي ولا كأن شي صار
شوي ويجي أبوي وجهه أحمر يقول وين فلانه وعصب وجلس تحقيق
يقول وش قال لك الرجال وليش تقربين من الباب وامي تبكي تسأله منهو ووش السالفة ....
طلع واحد من الجيران الله يسعده ويوفقه جاي عند أبوي
ولاحظ هاللي ركض فجأة واستغرب ولما دخل عند أبوي
قال له ان فيه واحد كان عند الباب ويوم شافه ركض وأبوي حس اني انا السبب :o
المهم عقب هالموضوع حرمت انزل الحوش والباب مفتوح
وحتى أبوي اعتزل قهوة الجيران وصار الباب ينقفل باربع اقفال ....

الموقف الثاني مااذكره كويس بس امي تقول اني كنت انتظرها عند باب الحمام في مصلى
ووحدة شافتني وسحبت السوارة من يدي بالقوة لدرجة جرحت يدي وطلعت امي من الحمام على صراخي ....
وبعد هالمواقف امي صارت تخاف علينا أنا واخواتي بشكل مبالغ فيه ....
والله لو تشوفونا لما كنا صغار اذا طلعنا سوق او ملاهي كأننا كتاكيت لاصقين في بعض جنب امي ...
واللي يبعد عنها بيجيه الحرامي >>> كلام امي لنا
وطلعنا كلنا خوافين ....واخاف هالشي بعد يصير مع بنتي وتطلع خوافه من كثر حرصي عليها ...

مادري هالخوف اللي عندي طبيعي كأم ولا أنا مبالغة بهالشي؟؟؟ من جد هالمووضوع مسبب لي أزمة :(