أختي اليتيمه وخطبتها

السلام عليكم .. الله يسعد أوقاتكم بكل خير

حبيباتي الموضوع مره شاغلني وقاهرني والله دايما افكر فيها وماتروح من بالي

المشكله هي أختي اصغر مني بخمس سنوات طالبه جامعيه عمرها 21 ومتفوقه ماشاء الله

الحمد لله هي قمه بكل شي أخلاقها ودينها وعمرها ماتعبتنا معاها

لكن فيه شي مخلي الغصه دائما تجيني كل ماتذكرتها أن أمي وأبوي الله يغفر لهم ويرحمهم

متوفين وأمي صار لها سنه متوفيه الله يجعلها من أهل الفردوس الأعلى وأختي كانت ظلها معها في مكان

حتى بالنوم تنام معاها حتى الملابس يلبسون سوا من فضل الله أختي نفسيتها أقوى وأصبر مني بسم الله عليها

لكن من وفاة أمي كل ماتقدم لها خاطب رفضته والبنت جميييله ماشاء الله وخطابها يزيدون وهي قاعده بالبيت لوحدها

كاسره خاطري ذكرياتها مع أمي ووحدتها وصغر سنها وبعدي عنها وأخواني كلهم أولاد مايقصرون الله يسعدهم بس

مو مثل الأخت تقدم لها واحد من كم اسبوع كل شي فيه راااائع ماشاء الله والرد كان انها رفضته ليييييش

لأنه مو ملتزم أختي تبي واحد مطوع ويخاف الله من جد قلت لها فيه ناس كثير مو مطوعين بس فيهم خير مايعلمه

الا الله ومحافظين مو شرط يكونون حفظه لكتاب الله أو أئمة مساجد

وجاء الرد على راسي مثل الصاعقه :frown:

قالت أنا مالي أحد إلا الله لا أب ولا أم إذا بطلع من بيتهم الله يرحمهم ومن بين أخواني الطيبين ومعاملتهم الحسنه

وأرمي نفسي مع واحد ماأظمنه ولا أظمن أهله مين بيكون معي ويداريني !!!!!!



ماعرفت أرد يابنات ولا حرف خرج مني لأن تفكيرها صح ويحزن وجرحتني من جد بس أبكي عليها وعلى وضعها

أنصحوني بنات قولوا لي وش أسوي معاها كيف أقنعها أبيها تتزوج وتنبسط وتخرج من جو الوحده أبيها تحب الحياه

خصوصا خطابها كلهم طيبين أبيها تحب وتحس بوجود زوج بجنبها وتنسى همها كييييف أسوي