أخت طليقي تطلب اسامحها !!

السلام عليكم
هذا الموضوع لصديقتي وبأتكلم بلسانها حتى تتضح الصورة
أنا تطلقت ماقعدت عند طليقي إلا كم شهر ومن أول أسبوع بدأ كيد الحريم أمه وأخته جننوني طفشوني بعيشتي انا بطبعي مسالمه لابعد حد وهادية من النوعيه الي ماتآخذ حقها أبد ، بالأول كنت أسمع نغزات وأطنش تمادوا لدرجة صار الكلام مباشر يستهزأون بشكلي وجسمي واخوي كان يبي كذا ونفسه بكذا من صفات الحريم وزوجي قاعد لاحياء ولا خوف من الله وهو كان طاير فيني اول الزواج بس مع المقارنات وتفتيح عيونه على ادق عيوبي كرهني ولا عاد اقتنع بالي عنده والمضحك انه بعد الشوفه الشرعيه ابوي يقول كل يوم اواجهه بالمسجد يسلم واهله من ثاني يوم يدقون يسألون عن رأيي والمشكله حملت من أول شهر ووحامي على النوم وريحة الطبخ كرهت الأكل ، الطبخه من أشمها تلوع كبدي وارجّع او اضل منغثه طول اليوم يوميا تدق علي عمتي باب غرفتي عشان اطبخ واجر رجلي جر وركض على الزباله الله يكرمكم ترجيع لو اشرب مويه رجعتها تعذبت عذاب الله بس يعلمه كرهت نفسي وزوجي لأنه مو مراعي نفسيتي وغير هذا كلامه كله سوالف حريم ( الحرمه ماتقدر تمسك زوجها بالعيال) ( ولو تجيبين عشر ماتتحكمين فيني ) ومن هالسوالف على الطالعه والنازله بسبب وبدون سبب وامه واخته بدل يرحموني ويقدرون ضعفي زادوا أضعاف كنت اروح اهلي زياره يجي يآخذني يقول امي عازمه حريم يبونك تغسلين مع اختي المواعين هههههه المهم إني تعبت حيييل وقتها وجلست ببيت اهلي على اساس كم يوم بس ارتاح فزوجي وقتها سحب علي لاعاد رد على مكالماتي ولا جاني اتصال منهم ابد وبين الناس ينشرون اني هاربه من الشغل وأسوي نفسي تعبانه كبرررت الفجوه بيننا الين ماولدت واول يوم من خروجي من النفاس ارسل لي طليقي انا طلقت قولي لابوك ياخذ ورقتك بالمحكمه كسرني ماكنت متوقعه الطلاق ولا اي احد من اهلي كانوا يتوقعون يجي نتفاهم بس مارديت عليه ابد ولا ارسلت له من يومها لو حرف وبنتي عندي ومن ولادتها يمكن يشوفونها مرتين بالسنه وعمرها الحين ٩ سنوات يعني ياطويلات العمر لي من تطلقت ٩ سنوات والله عوضني ببنتي الله يبلغني فيها ، انا كملت دراستي وتوظفت بوظيفه وبراتب يارب لك الحمد ماكنت احلم فيه ووظيفتي طبيعتها اقابل مراجعات كثير وكثير كنت اخلص معاملات لجماعة طليقي وقرايبنا
👆🏻 هالي فوق كله تمهيد للي بستشيركم فيه فقبل كم يوم فيه مكالمات تجي على جوالي وانا ماارد على اي اتصال مو عندي بالجهات لأن كثير يآخذون اسمي من النمبربوك ويتصلون بأي وقت وكل ماأغير رقم يعرفونه الشاهد بعد كذا مكالمه ارسلت لي رساله انا ام طليقك فلان !! الصراحه مت رعب خفت ان يكون بنيتهم يآخذون بنتي مافيه بعقلي الا هي ؟! وانا الي ماتزوجت عشانها بالأخير يآخذونها مني عشت برعب الين مارجعت دقت وارد على طول ،، قالت ام فلانه ؟ رديت وقعدت تسال عن بنتي ودراستها كأنها تلطف الجو وبالأخير تقول انا ناصيتك بحاجه قلت سمي ياام فلان ! تخيلو وش قالت ؟؟؟؟؟ تقول ابيك تسامحين فلانه ( بنتها ) هي تتسمح منك وتقول ضلمتك كثير انا بلمت ماعرفت ارد ٩ سنين ماعرفت انها ضالمتني الا هالوقت ! سكت مارديت تعرفون شعور كنتي ناسيته لحظتها كل شي شريط حياتي يمر قدامي بنتي مااحد ساعدني فيها لو بحق بامبرز كل شي على راسي مستشفى ادويه ملابس ووقتها ماكان عندي الا مصروف الضمان تذكرت كيف يحرمون طفله من انها تعيش مع ابوها وامها المهم كل هالشعور السلبي جاني ماعرفت ارد قلت انا مشغوله الحين بشغله اعتذر منك وسكرت الجوال ،،،،،، والمضحك يابنات عرفت انها تطلب اسامحها لأنها عنست ببيت اهلها اللهم لاشماته وكل مشروع خطبه يتفركش قبل حتى يجونهم البيت يعني الحين لو انك بحضن رجالك ماتذكرتي ضلمك لي ولا تسببتي بيتم بنت وابوها حي وقسيتو قلبه على بنته وكيف طول عمرها الين ماادركت عبالها جدها ابوها ،، ماقدرت يابنات اسامح ابدددد انتوا لو بمكاني تسامحون وتغفرون ؟! طيب واذا ماسامحت هل آنا آثمة وللأمانه دايم ادعي عليهم بعدم التوفيق من القهر الي بصدري