أريد حكمة في مشكلتي هذه ...قبل ما أسافر تكفون

لحقوا علي قبل ما أسافر ابي حكمة ابي حل....

مضى على زواجي سنة و ست الشهور تقريبا....

أليكم قصتي ..

سبحان الله طبيعتي و طبيعة أهلي طيبين و على نياتنا كنت أنتظر يجيني الزوج الصالح و ألح بالدعاء يوم ورا يوم و خطاب يجوني من كل مكان يشوفوني النظرة الشرعية ويقولون ما شاء الله وبعدها يختفون وما نعرف وش السبب المهم...
جاني يأس كبير <<<استغفر الله...
في شهر الخير و البركات (رمضان) جاووني خطاب وكل واحد أحسن من الثاني الي قاضي في محكمة و الي مسؤول كبير في الدولة والحمدلله ما ناقصني شي

لكن تخيلوا رفضتهم تخيلوا...أمي وجدتي زين ما عطوني كف على وجهي..ابوي مستغرب مني...و جلست أمي تقول لي القرآن الفجر يا (وردة بنفسجية) قلت ان شاء الله يا أمي و واظبت عليه...سبحان الله شفت رؤيا خطوبة كاملة من و إلى و في الرؤيا شفت وحدة بعد ما صحيت من نومي قلت مب غريبة هذه الانسانة وسبحان الله أول ما تذكرتها و نطقت اسمها يرن التليفون و ارفع السماعة الا الانسانة الي شفتها في الحلم....المهم هذه الانسانة تعرف ام زوجي صديقتها بالروح بالروح ودلتها على بيتنا...و صارت الخطوبة وسبحان الله نفس الرؤيا تقريبا...لكن هذه الأحداث الي اكتبها لكم مش داخلة في الحلم ...
اليكم الخطوبة...
لما اجتمعنا مع الأم وبناتها و صديقتها ...انسدحت صديقتها على كنبة المجلس و قامت تتكلم عن الولد انه ابوه غني و انه له عمارة بيسكنه فيها و انهم ما راح يسكنوننا في القرية الي هم ساكنيها راح نسكن في خارجها

و الأم عطت أمي ورقة كتبت فيها انه راتبه 2000 و يدرس في كلية القوات البحرية وتكلمت عن ولدها وقالت انه له في الأنشطة الدينية هنا قلبي فز قلت الحمدلله هذا الي ابيه ما بي فلوس ولا شي ابي دينه و بس والحمدلله عيني شبعانة
طبعا راح اعطيكم نبذة عن عيلة زوجي...
ساكنين في احد القرى و عيشتهم الله يعينهم...الأم معلقة وموظفة في أحد المستوصفات الحكومية (كاتبة) ..الأب متزوج من وحدة ثانية و ناسيها و ساكن في أحد المدن يعني ترك القرية باللي فيها...و أكبر عيالها زوجي ويعتبر الابن الأول عندها ولد ثاني لكن في الاعدادية...
بعد ما تمت الملكة تبينت لي الحقائق التالية...
انه الولد يدرس في معهد وليس في كلية وعنده مكافأة 900 ريال و الأب صحيح غني لكن الي ساهم فيه فقط المهر ..الله يهديه مقصر في حقوق أولاده منها كثير ..هذا على حسب كلام زوجي و كلام أمه....وانه ما في عمارة و راح نسكن في القرية و زوجي يقول لي لا تستغربين ترى فيها منكرات كثيرة و ترى العجايز عندنا كشف السحر عندهم عادي يعني بتشوفين اشياء غريبة ...وكل هذا و انا ساكتة ما قلت شي...بعدها زوجي طلب منا نروح انا و اهلي نزور بيت جدته الي هو ساكنه مع امه و اخواته و اخوه وورانا الغرفة الي نسكن فيها ...
شي عجيب و الله الي شفته ..غرفته درجها اسمنت معوجة تحتها دجاج على طول انا ما تكلمت ..اهلي قالوا مستحيل بنتنا تسكن في هذه الغرفة ولازم احسن لها تسكن مكان بعيد عن القرية علشان ما تجر على نفسها المشاكل لأنه كثرة الاحتكاك بأهل الزوج أمر غير محبب و البيت بيت عايلة كبير و معاهم واحد من اقاربهم ساكن معهم مدمن ....عددهم ما ينعد...المهم اهلي قالوا بيسهلون على الولد بحكم انه ما عنده مادة وقالوا بيسكنونه في المدينة الي اسكن فيها في بيت مستقل ..
فرح الولد ..بعد أيام جانا وقال انا ما اقدر اسكن البيت الا و معاي امي...امي من زمان تحلم ببيت مستقل طبعا ابوي استغرب من جرأته <<طبعا فلوس الايجار من ابوي ابوي قرر هو وامي انهم يستأجرون في نفس المدينة وهو قال لأ نبي في نفس القرية و انا ميتة من الصياح تخيلت وضعي معاهم حسيت انه بيصير مثل ابوه بيخليني معلقة و يروح يتزوج وحدة ثانية و اقول لأهلي ما ابي اسكن في القرية لأنه زوجي كرهني بالقرية و اهلي اصروا انهم يلبون طلبه و انا تعبت نفسيا
اهلي طيبين مرة...وراحوا يدوروون على البيت هو مع امه ولقوا بيت قالت الأم لولدها انتم لكم بس جناح و البيت كله لي<<<بفلوس ابوي طبعا ..امي وابوي استغربوا ...قالوا ندور على بيت ثاني أحسن ...و الأم مصرة على هذا البيت امي في هذه المرة طنشوها و لقوا بيت عبارة عن شقتين و حوش وفيه مجلسين بحمام منفصلين عن بعض....طبعا هذا كله في ايام العقد ايام الخطوبة..ما عشت فيها ولا بصرت فيها...طبعا هم قالوا لنا قبل ما يصير العقد انه راح يتوظف بعد شهرين يعني راح تكون مدة العقد شهرين و نتزوج لكن ...لما صار العقد قال زوجي الى ما انتهت دراستي وباقي خمس شهور ابوي قال خلاص نمدد الخطوبة و بعدها زوجي قبل خمس شهور اصر انه يتزوجني قبل ما تنتهي خمس شهور وجلس يزن على امي و انا ابكي وابكي اقول ما ابي يا ماما ما ابي يا ماما ..خليه مثل ما قال ابوي و امي رحمت بحاله و قالت لأبوي زوجهم وابوي مقهور مثلي من امي قال خلاص بيصير الزواج وشوفي وش بيصير لبنتك ....صار الزواج من فلوس اهلي الزواج
واهلي هم اثثوا بيتي من كل شي و انا الكماليات من فلوس هدايا جتني من اقاربي
..سكنا في القرية البئيسة ..كان يقول لي اطلق الف مرة ولا اعصي امي من غير سبب كذا يفتح السالفة و اجلس اسمع له بانصات مستغربة من كلامه
واذا جا الليل جلس يأشر على الأثاث وعلى الأشياء الي شريتها يقول لي لو حسيت منك يوم انك راح تعايريني بهذه الأغراض ياويلك مني..و انا الى الآن مستغربة
وكان يقول لي أي تضحية تسوينها ما كأنك سويتي شي سواء لي أو لأمي و أنا ساكتة ما أتكلم....ومتعجبة من تصرفاته وكلامه معاي طبعا مفاتيح بيتي عند امه
تدخل متى ودها...وقلت لزوجي وين ستري لو تدخل وانا مش في وضع صح وش راح اسوي قال هذه امي وما اقدر ازعلها و سبحان الله دخلت علي في احد المرات و انا لابسة غلط ...استحيت منها...

تخيلوا جلس سنة بدون وظيفة ...

و لسا ما تخرج و انا جالسة اصرف على نفسي و تمر علي ايام ما اشرب موية فيها ..هو حضرته يروح عند اهله وياكل عندهم و ينساني بدون شرب بدون موية..وكل يوم هوشة و مشكلة بدون سبب
تخيلوا يستهزئ بشخصيتي و بقبيلتي و بثقافتي و ببشكلي و بلبسي وانا ارد عليه واقول انا واثقة بنفسي ...وهو عصبي بشكل غريب بدون سبب
تخيلوا العصبية ابوي فسرها علشان ما عنده فلوس..فقال لي تحملي و انا عارفة ليه هذه الاهانات لأنه يحس بالنقص و أي شي ناقص فيه يشوفه موجود عندي...صدقوني حتى شخصيتي حسيتها قامت ترجع لورا صرت كأني من بنات القرية ..وامي تنصحني تقول لي انتبهي على شخصيتك....والحمدلله شخصيتي واناقتي ما رجعت على ورى وعلمني انه امه وخواته يغارون مني ....ولازم اتصرف معهم بصبر و بحكمة ..حتى جدته ام امه تغار مني و خالاته يغارون مني..في احد المرات جتني وحدة من خواته وقالت لي ترى اخوي في باله وحدة و ينتظر لما يتوظف يزوجها ترى انتي ماخذك تمضية وقت...رحت على طول لزوجي قلت له صحيح الي قالته اختك..قال لي لا هذه تغار منك..لكن افعاله تقول شي ثاني....في احد المرات عزمتنا خالته قامت أم زوجي لولدها تقول له
مسكينة بتخليها تجتمع مع زوجتك.
تدرون مين هي المسكينة ...
وحدة على باله يحبها من ايام الطفولة سألت و عرفت بنفسي...كان وده يتزوجها وما صار نصيب يتزوجها...
تخيلوا الأم خايفة على مشاعرها ..مب على مشاعري...
واروح للبيت بس ابكي......
طبعا هو كان وده اشتغل و اساعد امه في البيت قلت له امك عندها شغالة و انا صدقني مب متعودة على شغل ما عمري اشتغلت و يا دوب اعرف انظف شقتي يعني اجلس مدة طويلة....ودايما يتركني في الشقة لوحدي ويجيني بس علشان حاجته و معاها مشاكل لازم من الصبح الى الليل مشاكل بدون سبب
تخيلوا مرة من المرات جبت معي كتاب رياض الصالحين وقلت راح ازور امه و الأفضل يكون معي كتاب لأنه زوجي راح يتركني مدة طويلة و امه دايما معها تليفون يعني ما عندها وقت تتكلم معي..انا جلست اقرا الكتاب لما جا زوجي رجعت لبيتي و نمت و في الصباح هاوشني و انا نايمة علشان الكتاب قال لي هذه آخر مرة تاخذين معك الكتاب...
وزوجي مرة حكى لي قصة انا استنكرت على اهله ...زوجي متعود من اهله اللبس الساتر غير اللبس الخاص بين الزوجين...وهو أي شي يشوفه عندي يستغرب منه ويروح يقول له لأهله الى ان صارت قصص وعلوم وغيرة
الى درجة انه زوج اخته عزمه على عشا رجال وطبعا زوجي اكيد راح يسلم على اخته لما راح يسلم عليها ...
شافها بقميص االنوم قصير مرة و قال لي زوجي عن الي شافه..وشاف منشر ملابسها وحاطه ملابسها الداخلية <<<<ليه طيب؟؟؟
وعزتمه وحدة من خالاته وراح لها وشاف ملا بس مش متعود يشوفها عليها و شافته مستغرب ..قالت له وراك مستغرب انت ما تشوف زوجتك كذا!!!!!

اما بالنسبة لجيتي لبيت اهلي تصير لي مشاكل و اشوف خواته متهنين عند امه وانا مب عند امي و اجلس ابكي وحتى لما تجيني امي يحسبها زوجي علي يقول لي خلاص شفتي امك ما في داعي تروحين لهم هذا الاسبوع...
المهم
في احد المرات جت امي زيارة لي واخوي الكبير معاها كنا في امان الله ...نتكلم مع بعض و اشتكي لأمي كالعادة و امي تصبرني...وقالت أمي ودي اروح اسلم ام زوجك رحت معها و جلسنا عندها و فجأة دخلت بنتها الصغيرة(أخت زوجي الصغيرة) وقالت سيارة صديق اخوي كسرها (خ) قالت أم زوجي صديق ولدي
مب موجود علشان يحط سيارته هنا قالت امي الله يستر لا يكون سيارة ولدي و تطلع امي و تشوف الزجاجة الخلفية مهشمة احد مكسرها و اروح ورا امي و اشوفها رجعت من الشارع مفجوعة. مب مفجوعة على السيارة...لا ...هي خايفة على اخوي..لأنه انسان حريص جدا و منظم ..وكان في هذا الوقت يصلي العشا..

طبعا مين (خ)؟ هذا حفيد ام زوجي...طلعوا كلهم وشافوا السيارة و ما قالوا شي جلسوا بس يضحكون...جا اخوي وشاف سيارته ..وراح عند زوجي طلب منه انه يجيب له (خ) قال له زوجي ما عندنا عيال قلت لزوجي اخوي مب من النوع الي يضرب أطفال
أخوي وده يتأكد اذا هو الفاعل ولا لأ...قام زوجي جاب ولد اخته وجلس اخوي يدقق في عيونه و قال رجعه لأمه ..الله يهديه...قال اخوي هو الفاعل كيف الأم تركت ولد صغير يروح الشارع ....تخيلوا الزجاج الي في السيارة متناثر على المقاعد الخلفية ...المهم اهلي ركبوا السيارة ومافي أي اعتذار على اللي صار
ام زوجي قالت ما يسوى علينا على زجاجة اللي انكسرت ...واهلي ما كلموهم ولا هاوشوهم...لما وصلوا اهلي الحمدلله بأمان الى المدينة علموا ابوي بالقصة قام ابوي كلم زوجي وقال له لازم تنتبهون على الولد وشلون لو كبر وش راح يصير له ..تخيلوا لما كان ابوي يكلمه كان مشغل سبيكر عند اهله..طبعا انا ما كنت موجودة وقت ما كلمه ابوي....زوجي علمني باللي قال له ابوي ودافعت عن ابوي وقلت ما قال ابوي الا الصح...تدرون وش اللي صار ؟؟؟
صارت مشكلة كبيرة لأني دافعت عن ابوي...و علشان ينسيني الي صار بيني و بنيه وداني عند اهلي كترضية و قال لي راح تنامين عندهم قلت طيب و فرحت باليوم هذا .رحت لجدتي زيارة في نفس هذا اليوم انا و امي وفجأة دق الجوال قال انا جاي في الطريق بتجين معاي اللحين ..طلبت من اخوي يرجعنا البيت<<<معناها ما نمت
خذاني من بيت اهلي و في بيتنا صارت تكملة الهوشة الي امبارح
قال لي تبيني ولا ما تبيني <<<انا استغربت من منطقه وشو تبيني ولا ما تبيني قصده الطلاق؟؟؟
قام قال لي وش فيك تناظريني بهذه النظرة ايه تبيني ولا ما تبيني و انا جاد في كلامي تراني والله مستعد اطلقك و نروح للمحاكم وكل واحد فينا يروح لطريقه وآخذ المرة الي ابغاها و تاخذين الرجال الي تبغينه وانا ساكتة ما اتكلم بسرعة قولي وعرفت انه يبيني اقول له ما ابيك و انا ما رديت عليه الى اليوم الثاني وهو مستمر تبيني و لا ما تبيني قلت له العصمة بيدينك مب بايدي والي ودك فيه سوه
قال انا ابي اطلق ..قلت له راح اصلي لله ركعتين اللحين قبل ما تطلقني ..ولما قمت ..قال لأ انا ابيك وشفيك صدقتي كلامي...بعدها رجع سؤاله تبيني ولا ما تبيني وما جاوبته وبعدها طفش و رمى علي العباءة و قال لبسيها ولبستها و طردني من بيتي شر طردة...بعدها ركبت السيارة و وداني لخرابة عندهم يحسبونها حديقة ..ودخلني الخرابة(الحديقة) وقال لي يله انا اللحين ماشي معاك بالطيب تبيني ولا لأما رديت عليه قال يووووووووه لا الطيب نفع ولا القوة اجل قومي من قدامي ورجعني البيت ..ما دخلت البيت جلست في السيارة قال لي وش فيك قلت ابدا ما فيني شي...بس انا احس نفسي تعبانه معليه اروح بيت اهلي ووداني بيت اهلي وقلت له تعال لي في الليل جا في الليل ابوي قال له بنتي قالت لي القصة ولازم نسأل اهل الذكر يمكن وقع الطلاق لأنك قلت والله اني مستعد اطلق وكررتها مرات كثيرة وودنا نتأكد و انا فرحت و تمنيت انه وقع الطلاق..لكن الطلاق ما وقع ورجعوني اهلي غصب طيب له وانا مش مقتنعة و احس عقلي مب في مكانه....ورجعت للجميل زوجي
وبعدها رحت اشتكي لأم زوجي باللي صار بيني و بين زوجي قلت يمكن تحل الي بيني و بينه قالت لي انتي السبب بكل اللي صار و انتي ما تصلحين تكونين زوجة لولدي ولا تصلحين تكونين كنة رديت عليها بالطيب ولا غلطت عليها ....

المهم عشت معاه ...الين لما توظف...ولما توظف ..ابوي كان حاس بالظلم الي كنت اعانيه ...ما عطوه الراتب لسا..وكانت امه تقول هذا وقتك لازم ترجع لي ايام التعب الي تعبتها وتعوضني وابوي في هذه اللحظة عرف انه لا نفقة ولا معاملة ولا كسوة ولا حتى علاج كله مني من مصروفي الي من ابوي وفي هذه اللحظة دعا ..قال وكلت أمر بنتي لله وسبحان الله يجيه نقل لمدينة بعيدة من احد المدن على ساحل البحر الأحمر و نسكن انا وزوجي وقلت المشاكل راح تخف و قلت الاهانات راح تخف لكن المشاكل هي نفسها...لكن سبحان الله اضطر انه يدفع فلوس السكن بس و انا الباقي علي وجلسنا شهر و استلم راتب شهرين وعطه امه جزء كبير منه و انصرفت الفلوس ولا ادري كيف انصرفت و امه تقول له خل البنت يتكفلون فيها اهلها و تسكن عندهم و انت اجلس بدون حرمة ...زوجي قال لي راح تروحين بيت اهلك قلت له لأ انا بجلس في بيتي وراح ضربني وصقع راسي بالجدار لكن الضربة مش قوية وهددني وقال لي انا امس صرفت بنزين علشانك وديتك علشان تتفرجين على السوق<<<الملابس من حسابي
تدرون ليه الملابس من حسابي لأنه أمه قالت له لا تشتري لها ملابس طبعا كلامها هذا اول عيد مر علينا....
حتى تجرأ وسب حجابي وبعدها قلت له هنا حدك انا ما ارضى تسب الحجاب الشرعي
وقلت له ما تخاف من ربك..عد خواتك الخمس ما تخاف يجيهم مثل اللي يجيني وقام يقول لااااااااااااااااااااا الا خواتي ادعي علي انا لا تدعين على خواتي ادعي علي بالموت بحادث لكن الا خواتي قلت له مستحيل ادعي على خواتك لكن انا خايفة عليهم يصير عليهم بسبب ظلمك لي

ودايما يطردني من بيتي تخيلوا طردني و انا في المنطقة البعيدة عن اهلي قلت لأمي ما ابيه ودايما تصبرني

في نفسي دوم اقول...
قالوا شكله ملتزم لكن اخلاقه زفت معاي..ما يعرف حقوقي

ابي الحل ...ابي اتطلق منه لكن اهلي ما ودهم..مع انهم عارفين بمأساتي..يخافون علي ما أتزوج ..أقول مب لازم اتزوج اهم شي اعيش مكرمة معززة

واذا انتم شفتم انه الحل مب طلاق عطوني حل لأنه عندي تكملة خاصة لأمه...

الحين انا في بيت اهلي وبقى لي عشرة ايام وراح اسافر ....