أشيروا علي أعطيها هدية ولا أطنشها ..

السلام عليكم ورحمة الله وبركاته ..
إن شاء الله تكونون بخير انتم وأحبابكم والمسلمين أجمعين ..
حبيت استشيركم بشغلة وياليت تعطوني الراي السديد ..
أخت زوجي زواج ولدها وبنتها بعد كم يوم في ليلة واحدة ،
وبنتها هذي اللي بتتزوج كم مرة تطنشني ماتسلم علي إذا قابلتني ، مرة كنا في فرح وجيت أنا وأمي بنسلم عليها هي وجدتها تخيلوا جدتها وقفت عشان تسلم علينا وهي لفت على الناحية الثانية وسوت نفسها ماهي شايفتنا ،
وفي زواج اختها الكبيرة قبل سنتين تخيلوا جيت معاهم من بدري قبل مايجون المعازيم بطلب من امها ويوم جيت اسلم عليهم اعطتني ظهرها وسوت نفسها تطالع في المراية !!!
ومرة رحت ازور اختها في المستشفى ولقيت اخواتها كلهم عندها المهم سلمت على البنات كلهم وهي انخشت ورا الستارة قامت امها قالت لها فلانة سلمي على خالة !!!
يمكن تقولون طيب ليش تسوي كذا معاك ؟؟
وأقول لكم ويشهد الله علي إني طول عمري ذوق معاهم وأعاملهم أحسن معاملة وواقفة معاهم في فرحهم وحزنهم والحمد لله عمر الكلمة الشينة ماطلعت مني لا لهم ولا لغيرهم ..
وامها اللي هي اخت زوجي نوعا ما طيبة معاي ،، لكن جدتها أم أمها اللي هي أم زوجي ياما عانيت من سوء معاملتها لي ،،
المهم الحين انا ناوية ليلة الزواج اعطي أخت زوجي ( نقوط أو عانية ) فلوس يعني ،، وكنت ناوية آخذ للبنت هدية ذهب ،، لكن كل ما أفتكر قلة أدبها معاي وتطنيشها لي وأنا في سن أمها أنقهر وأحس انها ماتستاهل ،،
عشان كذا حبيت استشيركم اعطيها هدية ولا بس أعطي امها وهي اسفهها مثل ماكانت تسوي معاي ؟؟