أكتم عن ماضيها أو أقوله له

بسم الله الرحمن الرحيم


السلام عليكم ورحمة الله وبركاته,,,,,,,



الصراحه فيه موضوع محيرني ومدري وش أسوي فيه ,, وماني عارفه من وين ابدأ


أنا عندي أخ الله يحفظه ويخليه ماهو كبير عمره 20 بس عقله ماشاء الله كبير وأكبر منه بكثير

وهو مؤدب مره وخلوق وماعنده حركات مو سنعه وإنسان مكافح وخجول ,, تخرج من الثانوية

بنسبه حلوة ولله الحمد ودرس دراسه مدتها سنتين وبعدها يتوظف مباشرة

وتفوق في دراسته والحمدلله الحين يشتغل وراتبه حلو وإنسان حياته مأمنه عنده بيت علشان اذا تزوج يجلس فيه

عنده سيارة وعنده وظيفة مضمونه وفي مكان الكثير يتمنون يشتغلون فيه

وأقسم بالله ماأمدحه علشان أخوي كل من يعرفه يشهد على أخلاقه الطيبه

حتى في لبسه أقسم بالله من صغر سنه وهو مابعد دخل المدرسه كان يرفض يلبس شورت

ويستحي يلبس ملابس اللي طايحين فيها شباب الحين يعتبرها مخله بالأداب وماتليق بالرجال

وأهم شيء عنده صلاته قبل كل شيء المهم


أخوي فكر يتزوج من فترة من أول ماأشتغل عنده رغبه بالزواج وقال يبي بنت عمي

وبنت عمي هاذي أعرفها وهي صديقتي وأعرف أسرارها وهي ماتناسب أخوي ابداً

تفكيرها مختلف تماما عنه واساسا أخوي مايعجبها وماتسميه إلا المعقد

وهي يعجبها الشاب المتحرر واللي عادي عنده كل شيء ويسمح لها تتلثم أو تكشف وجهها

وتبي واحد يلبس لبس الشباب اللي أخوي مايرضى يلبسه مثل جينز مشقوق أو ضيق

وشعر على الموضه ولاتحسبون اخوي مايعرف يلبس لا والله أخوي أنيق ونظيف ويلبس جينز وتي شيرت عادي

بس الجينز العادي اللي مايكون مشقق او مبقع ألوان أو مايكون ضيق وتي شيرت مايكون فيه خربطه كثيرة

يعني لبسه يناسب شخصيته الرزينه

المهم

فوق كذا عندها ماضي وعرفت عنه غصب عنها لما طاحت في مشكلة جاتني علشان أساعدها

بالرغم من أنها كانت تعتبر صديقتي وتقول لي كل شيء بس ماجابت لي سيرة ابداً

وأنصدمت حيل لما عرفت هي غلطت غلطه مو هينه وفوقها تحب واحد يقرب لها وكانت تكلمه

بس بعدين تركها وقال لها مايبي يتزوجها بس هي للحين حاطته في بالها

هي شيء وأخوي شيء ثاااااااني وبعيد عنها , هي بعدها غلطتها الكبيرة تابت

وأتوقع صحت من أحلامها وعرفت شيء اسمه واقع هي تابت والموضوع صار ماضي

بس الشيء اللي ماتابت منه أنها بعدها تفكر في اللي يقرب لها وتحبه بالرغم هو قال لها مايبي يتزوجها

وهو مايكلمها ومطنشها تطنيش تااااااااام وهي تعرف عز المعرفه هو مايبيها

والمصيبه أعرف أنها لو أخذت أخوي مو علشان هي تبيه أو تحبه أو عاجبها

لأنه أخوي مايعجبها بشيء ولو أخذته وسمعت عن ذاك خطب أدري راح تحزن

وأنا والله هالشيء مايرضيني أخوي يستاهل وحده تحبه لنفسه لشخصيته وأخلاقه

والمشكلة حياتها فيها أغلاط كثيرة وماتبي تسمع النصيحه ولا تتقبلها ابداً

تبي تسوي على كيفها حتى لو هي عارفه أنها غلط


أدري طولت عليكم بس والله الموضوع شاغل بالي

أنا حاولت أقنع أخوي بطريق غير مباشر ماياخذها لأنها ماتناسبه

وقلت له ماتناسب تفكيرك وهي مختلفه عنك بس طبعا سترت عليها وعلى ماضيها وعيوبها

بس أخوي وقتها حسيته أقتنع وصرف النظر عن الموضوع

بس الحين رجع وحطها في باله ويبيها يقول حابها وأتمنى أخذها

مع أنه ماشافها ولا يدري عنها بس يتذكرها وهي طفلة وأخوي أكبر منها بسنه بس


والحين أنا محتاره ماودي أفضحها خصوصا أنها تابت وندمت حيل بعد غلطتها الكبيرة

بس بنفس الوقت مابي أخوي ياخذها وأحس بتأنيب الضمير أعرف عنها وخبيت عنه

وخصوصا الإنسان ماهو معصوم عن الخطأ أخاف أظلمها وأنا مدري وأخاف أظلم أخوي معاها

بس والله بعيد عن غلطتها هي ماتناسب أخوي كشخصيه وتفكير


الحين وش أسوي أقول لأخوي أو أسكت وأخليه ياخذها لأنها تابت

وممكن الأمور الثاني الغلط بحياتها يقدر هو يغيرها فيها من لثمه وعدم تستر زين وغيره




أختكم/ أصيلة المجد