أُم زوجي

السلام عليكم ورحمة الله وبركاته

دائماً ما نشوف ونقرأ ونسمع في مواقع التواصل الاجتماعي او جمعات الحريم عن قساوة أُم الزوج ومكرها وخبثها ومحاولة السيطرة على ابنها
وكيدها وكرهها لزوجة الابن
نادرا ً اذا ماكان نهائياً ماقد سمعت كلمة طيبة عنهم او موقف حلو منهم واعتقد من وجهة نظري هالشي يرجع لسببين
السبب الاول طبيعة اغلب البشر في الميل لذكر المسوائ اكثر وتذكر المواقف السلبيه اكثر والبحث عن المواساه وحب الظهور بمظهر المظلوم
السبب الثاني ام الزوج الشريرة هي فكرة رسِّخت في اذهان النساء حتى قبل لا تتزوج البنت بمجرد ماتقبل على الزواج تبدأ تجيها النصايح من كل حدب وصوب
من شياطين الانس فيما يتعلق في ام الزوج مثل انها تتقي شرها أو ما تحتك كثير فيها ومن هذه النصائح الشيطانية فأصبحت الفتاة تتحسس من اتفه موقف ومن ابسط كلمة
من قبل لا تتزوج وهي تشوف ام زوجها عدوة لها يجب الحذر اشد الحذر منها
بينما الموضوع في قمة البساطة فبدلا من تحاشيها اواساءة الظن بكل كلمة وتصرف صادر منها الافضل مجالستها تبادل الاحاديث معها
مساعدتها وقضاء حوائجها فهي مسنه مسلمة قبل أن تكون أماً لزوجك وانتِ مسلمة متربية قبل لا تكونين زوجة ابن
لا انزه جميع الامهات ولا اعمم لكن صدقوني من السهل جداا كسب مودتهم ومحبتهم
قد يكون صعب لكن هذه من اثار التقدم في السن سبحان الله المسنين لهم صفات معينه اذا تقدموا في السن منها العناد والاصرار على الرأي
والحساسية الزائدة والزعل الكثير وغيرها من الصفات الكثير و كل هذي يمرون فيها لأن سنهم يتطلب كذا التغيرات اللي تصير عليهم هي تخليهم كذا
تقل عندهم الثقه بالنفس ويبدون يحسون أنهم عاله وإن معد لهم فائدة وماصار احد يحبهم ومن هذي الافكار اللي تدور في بالهم
ولما يفكرون كذا تبدأ الصفات اللي ذكرتها تظهر فواجبنا اننا نقدر هذي المرحلة اللي قاعدين يمرون فيها
صبرك واحتسابك الاجر وتقربك منها ومحاولتك التودد لها كلها مو ضايعه عند الله كل شي مسجل وكل شي بيلف ويدور عليك
اللي تتمنين يصيرلك اذا كبرتي في السن سويه الحين مع اي مسنه و بذكرلكم قصه عن كيف الايام تدور سبحان الله
والله اعرف وحدة شخصيا وقريبة مني جدا جدا كانت تطلب من زوجها يحول لأمه شهريا ٢٠٠٠ ريال وأنا اعرف ام زوجها كيف كانت تصدر منها بعض التصرفات
رغم انها انسانه صالحه تقيه غفر الله لنا ولها ولكن مع هذا كانت تطلب من زوجها هذا الطلب شهريا وبالفعل زوجها كان مايقصر ويحول لأمه ومرت السنيين
الى أن هذي اللي اعرفها ولدها توظف وسبحان الله بدون ماتطلب منه او تفتح معاه الموضوع قرر انه يحولها شهريا ٢٥٠٠ ريال والله وتالله ماكذبت في حرف
وشوفوا سبحان الله كيف ربي ردلها الموقف وبزيادة وهذي هي عدالة الله عز وجل وكما تدين تدان
فتحت الموضوع لأن والله قلبي يتقطع من قساوة زوجات الابن وكيف تعطي نفسها مبررات لأفعالها السوداوية ترد الصاع صاعين وتنفخ ريشها
ويتقطع قلبي اكثر من اللي تهجر ام زوجها ولا درت عنها حيه او ميته ومن اللي تستحقرها وماتذكرها الا بالسوء في كل مجلس هدانا الله واياهم يارب


واخيرا اكيد كل وحدة فينا لقت موقف طيب او معاملة حسنه من ام زوجها مافي انسان يخلوا من المواقف الطيبة
اذكرولنا مواقف حلوة صارت بينكم او ايش الصفات الحلوة اللي تحبينها في ام زوجك
واتمنى من كل قلبي ما احد يغلط او يقول تعليق سلبي ونكدي نبغى اشياء حلوة وايجابية فقططط
وعذراً على الاطالة