إيش تنصحوني فيه؟ أعيد أشعة الصبغة ؟

السلام عليكم ورحمة الله وبركاته
كيفكم حبايبي.. عساكم طيبين.. الله يجبر بخاطرنا ولا يحرمنا من نعمة آمين.. بنات حبيت أستشيركم.. أنا صار لي متزوجة 3 سنين.. ولا مرة صار فيه حمل.. وعلى نهاية السنة الأولى سويت تحاليل.. وكل التحاليل سليمة وبعدها عملت متابعة تبويض واستخدمت كلوميد وإبرة تفجير بس الله ما كتب لي الحمل.. وبعد كدا عملت أشعة الصبغة مرتين.. أول مرة عند دكتورة في مستوصف والدكتورة مو قد كدا.. وما عرفت تحقن الصبغة وأنا كنت متوترة وخايفة وكانت النتيجة ما مرت الأشعة في الأنابيب تماما.. بعدها عدت الأشعة في مستشفى أكبر.. وكنت مهدية على نفسي والنتيجة إن الصبغة مرت في الأنبوب اليمين واليسار كان مكتوب في التقرير انه احتمال تشنج أو انسداد.. فرحت انه على الأقل واحد متأكدة انه مفتوح وهذي بحد ذاتها نعمة.. وبعد كذا عملت تحليل ما بعد الجماع عشان أشوف السائل المنوي طبيعي ولا فيه مشكلة لأن طول هالفترة زوجي ما كان راضي يحلل.. والنتيجة طلعت ماشاء الله سليمة بس نسبة الصديد شوية زايدة والدكتور قاللي ممكن يحصل حمل بهالنسبة.. بنات ماني عارفة إيش أسوي.. طفشت من الخلطات والأعشاب وجربت التمريخ والحجامة.. جربت الكلوميد وإبرة التفجير.. وكثير من الشهور أسوي مخطط درجة الحرارة عشان التبويض.. ولازلت أدعي وأستغفر وأحاول أنسى حكاية الحمل.. بس إلا ما أذكرها بين فترة والثانية.. بنات أنا وزني تقريبآ 83 جربت أنقصه بس ما قدرت.. شي مهم أبغى أقوله.. أحيانآ أحس التبويض ضعيف في الشهر اللي يكون التبويض من اليمين.. يعني ما تيجيني إفرازات ولا أحس بالمغص.. وهالشهر درجة حرارتي في فترة التبويض ما ارتفعت.. فحسيت انه ما عندي تبويض.. فالتبويض في الجهة اليمين أضعف من اليسار.. لأن اليسار في أحيان كثير أحس بالتبويض ماشاء الله.. والمشكلة إن الأنبوب اليمين متأكدة إن شاء الله انه مو مسدود لكن التبويض في اليمين ضعيف.. والتبويض في اليسار ماشاء الله طيب بس ماني متأكدة ان الأنبوب مفتوح.. لو كنتوا مكاني إيش بتسوون؟ بتعيدون أشعة الصبغة عشان تتأكدون انه الأنبوب اليسار مفتوح.. ولا بتسخدمون شي يقوي التبويض.. مع العلم هالشهر استخدمت كل شي يقوي التبويض من الأشياء اللي أعرفها.. من ميرمية وبردقوش وعسل سدر وعين جمل وحليب وأناناس.. بس شكله التبويض ضعيف والحمد لله.. معليش طولت عليكم بس بغيت نصيحتكم الله يحقق لكم ما تتمنون.. نسيت أقلكم إن عمري 30.. الله يكبرنا في طاعته ولا يحرمنا من نعمة آمين.