Om Alawi @om_alawi

عضوة

ابغي اجهز ومحتارة

مرحبا خواتي.....
حاسه نفسي في دوامة ومو عارفة شسوي..لذلك لجأت لكم .
انا كنت نايمة في المستشفى لاني كنت اعاني من التهاب في الابوال ولازلت اعاني منه للحين واخذ الادوية. فراح الوقت عليي ولا جهزت للبيبي اي شئ ولا حتى لنفسي وهذا اول مولود لي فما اعرف شنو اسوي، وما عندي احد يساعدني والوقت يمشي. اذا ممكن احد يساعدني في ما يلي:
- شنو الضروريات اللي لازم اخذها الحين للمولود.
-ممكن اسماء محلات تتوافر فيها تلك الاشياء في البحرين.

طلبتكم ولا تردوني:(

يلزم عليك تسجيل الدخول أولًا لكتابة تعليق.

تسجيل دخول

قهوة بدون حليب • 17 سنة

اسفة اختي انا بالسعودية ولا كان من عيوني
بس اتوقع عندكم محلات شيكو و مذر كير ومو شرط هذولا انتي شوفي اي محل مكتوب عليه مواليد
1) خذي شباحات داخلية الي مكتوب عليها من 0 -3 شهور
2) بيجامات للمنزل و انا شخصيا افضل الي من قطعتين مو قطعة واحدة لأن اسهل في التغيير و الطفل ممكن يستفرغ وحركات كذا
3) تجيكي بعد أثواب صغيرة كأنها دشاديش انا بصراحة احبها ع البيبي
4) قبعات لازم و شرابات
5) لفات لبيبي عشان تلميه فيها
6) وطراحات زي الديباجة الصغيرة عشان تحملي فيها البيبي
ملابس الطفل كلها اختاريها قطنية
7) غسول جسم للطفل و مناديل تغيير الحفاظات و بودرة جسم و مرهم لمنطقة الحفاظ و كمان زيت جونسون تدهني به البيبي لانه راح تحسي ان جلده يتقشر على طول
هذي الأشياء الضرورية بس لاتكثري ملابس لأن الطفل يكبر بسرعة و بعد 3 شهور راح تشتري له ملابس جديدة
عادة تجيكي اطقم كاملة للطراح و اللفة و جلابية للبيبي و قبعة اشتري اثنين بس عشان لمن يجوكي الضيوف يكون البيبي كاشخ و اما الباقي لبس عادي مو شرط كشخات لأن البيبي يستفرغ بشكل رهيب يعني بالساعة يمكن تغيري له 3 و 4 مرات.
ايش كمان؟؟ ملابس البيبي تنغسل لوحدها و لا تكثري صابون عشان ريحته ما تخنق البيبي و احيانا راح تحسي فيها ريحة استفراغ حطي شوية من كمفرت عشان بس يروح الريحة الخانقة.
وعشان تحمي البيبي يبيعوا بانيو على شكل كرسي مايل او جلاسة تحطي البيبي عليه و احزمة سلامة فيها و تقدري تحمميه بكل سهولة بدون ماتخافي انه ينزلق منك, بس نصيحة لا تحمميه كل يوم مرة او مرتين بالأسبوع كفاية عشان لا يمرض وبالذات اذا كانت ولادتك في برد وتقدري تبللي فوط و تمسحي بجسمه.
اشتريه له رضعة صغيرة عشان تسقينه فيها موية او منقوع مرة او زعفران بالنباتة, واذا ناويه ترضعينه صناعي اكيد لازمك رضاعة كبيرة او وسط.
في سلات بأشكال حلوة للبييبي تجي مع الطقم احينا واحيانا لحالها تقدري تحطي فيها كل مستلزمات البيبي جمبك ( مشط ناعم, مسحات قطن, واي شي)
انتي كمان اشتري لك شفاطة حليب لأن صدرك راح يزخ بشكل غير طبيعي فاشفطي الزايد منه عشان لا يترسب في صدرك ويجف الحليب
وكمان فيه شي زي نص مريلة تلبسيه حول رقبتك اذا جيتي ترضعين البيبي عشان تغطي صدرك
وكمان في اكواب قطن للصدر عشان مايزعجك الحليب الي يزخ طول الوقت و يوسخ الملابس
البسي ملابس مريحة و فضفاضة وفيها فتحة (ازرة او سحاب) في منطقة الصدر عشان ترضعي بسهولة
هذا الي يحضرني الحين والله يتمم عليكي يارب واذا عندك اي سؤال انا بالخدمة

سكاكر ومملوحه • 17 سنة

الله يطيك العافيه ياقهوة ونستنى الباقين .... للرررفع

صمت البقايا • 17 سنة

سكاكر ومملوحه :

الله يطيك العافيه ياقهوة ونستنى الباقين .... للرررفع

الله يطيك العافيه ياقهوة ونستنى الباقين .... للرررفع

الاخت Om Alawi
شكرا لطرحك الموضوع والله يتمملك على خير
انا كمان بكرية وهذا اول حمل ليا ومحتارة بشو اجهز
واستفدت من الاخت قهوة بدون حليب جزاها الله كل خير
ونريد نستفيد من الباقيات بإذن الله
قولوا لنا كل شئ عن تجهيز ملابس للبيبي والحامل
وشكرا لكم

جــ ورد ــوري • 17 سنة

الله يكون في عونج..

اختي انا بكتب لج الاغراض بالعدد عشان اسهل عليج..

للبيبي..
6 لبسات افرهولات اللي مسكره من تحت.. واتكون قطن.. من 0-3
6 فانيلات داخليه.. من 0-3 احسن ماركه جونيورز مايتغيرون على الغشيل..
3 طاقيات للبيبي..
5 لفات (قماط) قطن.. واذا لقيتي اللي مثل القماش خذي منهم 3
1 مدس للبيبي.. اللي ينحط البيبي فيه ويتسكر من على الاطراف بسحاب.. خذي واحد للاستعمال وواحد كشخه للاستقبال..
خذي مشط اللي مثل الفرشاه ناعم وقصاصت اظفار<< هذيل يكونون على شكل مجموعات..
وخذي رضاعات اصغار 3 للماي وهالاشياء.. وفرشاه غسيل لهم..
خذي مناشف اضغار اللي على حجم الكف.. للاستعمال..
وخذي منشفتين كبار ومجموعة الحمام من شامبو وكريمات..
صابون خاص بملابس الاطفال... شوفي حبوبه اول ماتشترينهم غسليهم على طول وحطيهم بالشنطه لانه مو زين للبيبي اللبس مو مغسول..
اختي كل الاغراض بتحصلينهم فالبيبي شوب.. كتبيهم ورقه وروحي خذيهم..

اغراضج..
ملابس داخليه..قطن ومريحه..
قمصان نوم القطن.. ويكون من قدام لهم زرار للاستعمال وقت الرضاعه..
قميصين نوم للاستقبال مرتبين..
فوط صحيه
قطن للصدر اللي يكون على شكل دوائر ينحط بالستيان..
مجموعة الحمام..يكون ريحتها حلوه
واغراضج الشخصيه من مشط ومكياج خفيف....
نعال شبشب للمستشفى..
مجموعة مناشف لج..

وللمستشفى..
خذي طقم اكواب مع صحون مرتب..
ومجموعة ملاعق وشوك..
وصواني..

اختي هذا اللي اتذكره... لانه حتى انا اول حمل..

والله يكون في عونا ويتمم علينا بخير..

Anxonamoon • 17 سنة

جــ ورد ــوري :

الله يكون في عونج.. اختي انا بكتب لج الاغراض بالعدد عشان اسهل عليج.. للبيبي.. 6 لبسات افرهولات اللي مسكره من تحت.. واتكون قطن.. من 0-3 6 فانيلات داخليه.. من 0-3 احسن ماركه جونيورز مايتغيرون على الغشيل.. 3 طاقيات للبيبي.. 5 لفات (قماط) قطن.. واذا لقيتي اللي مثل القماش خذي منهم 3 1 مدس للبيبي.. اللي ينحط البيبي فيه ويتسكر من على الاطراف بسحاب.. خذي واحد للاستعمال وواحد كشخه للاستقبال.. خذي مشط اللي مثل الفرشاه ناعم وقصاصت اظفار<< هذيل يكونون على شكل مجموعات.. وخذي رضاعات اصغار 3 للماي وهالاشياء.. وفرشاه غسيل لهم.. خذي مناشف اضغار اللي على حجم الكف.. للاستعمال.. وخذي منشفتين كبار ومجموعة الحمام من شامبو وكريمات.. صابون خاص بملابس الاطفال... شوفي حبوبه اول ماتشترينهم غسليهم على طول وحطيهم بالشنطه لانه مو زين للبيبي اللبس مو مغسول.. اختي كل الاغراض بتحصلينهم فالبيبي شوب.. كتبيهم ورقه وروحي خذيهم.. اغراضج.. ملابس داخليه..قطن ومريحه.. قمصان نوم القطن.. ويكون من قدام لهم زرار للاستعمال وقت الرضاعه.. قميصين نوم للاستقبال مرتبين.. فوط صحيه قطن للصدر اللي يكون على شكل دوائر ينحط بالستيان.. مجموعة الحمام..يكون ريحتها حلوه واغراضج الشخصيه من مشط ومكياج خفيف.... نعال شبشب للمستشفى.. مجموعة مناشف لج.. وللمستشفى.. خذي طقم اكواب مع صحون مرتب.. ومجموعة ملاعق وشوك.. وصواني.. اختي هذا اللي اتذكره... لانه حتى انا اول حمل.. والله يكون في عونا ويتمم علينا بخير..

الله يكون في عونج.. اختي انا بكتب لج الاغراض بالعدد عشان اسهل عليج.. للبيبي.. 6 لبسات...

أختي Om Alawi

في محلات في السيف مثل بامبكن بانش عندهم شغلات حلوة و كان عندهم تخفيضات ، ماركس اند سبنسر بعد تخفيضات

مذكركير / مكان لابد من زيارتة بس عند ملاحظة بالنسبة لمذركير فيه فروع في البحرين لشركتين مختلفتين
يعني فيه فرع السيف و فرع مجمع البحرين و الثاني فرع مارينا مول و مجمع سترة وهذا بضاعتهم تختلف عن السيف و أرخص

بالنسبة لتجهيزات البيبي من ملاحف و سلة و شنطة في محل أحلى الأطفال في سوق و اقف و حل ثاني أختي تفصل عندة في سوق المنامة مقابل مأتم العجم .

أتمنى اكون أفدتك و لو بالقليل