ابي زوجي ينغص علي و يسأل بنتي الصغيره عني دااااااااااايم

سلام بنات

كالعاده مافيه وحده تدخل الاجتماعي الا تشكي

ودي يوم واحد مانشكي

بس ماللطيب نصيب:(

الله يسلمكم هذا ابو زوجي حاط دوبه دوبي.......والله اسكت دايم وماروح لهم الا مره بالشهر وعساني اسلم منهم

وباختصار بقول لكم عن مواقفه .......

ابو زوجي ( الله يشغله بعياله ونفسه) يدق على زوجي ( ولده الكبير دايم) وينك تعال.. وينك فيه.. إلخ
وابو زوجي ماشاء الله بعافيه وصحه ويلبس الكوتش ويسوي رياضه..يعني مهتم بصحته بشكل.. وتارك مسؤلية زوجته وعياله على زوجي.. ( مع ان فيه 2 اخوان موظفين ماتزوجوا)
ولدي عمره 3سنوات.....وبنتي 5 سنوات
يوميا تقريبا يروحون العصر لبيت جدهم وزوجي يكون مشغول يروح يصلح اشغاله وانا بالبيت جالسه
وابو زوجي يستلم بنتي ( وين امك) ( وش جالسه تسوي)
مع ان بنتي تنسى دايم تقول لي عنه انه ذابحها اسئله.. لأنها طفله تلعب وتنسى
طبعا هو يتخيل ان زوجي حط العيال عند اهله ورجع لي ينام معي ولا يتقهوى معي ولا حتى يمشيني
ويدق على زوجي يقول وين حطيت العيال ورحت؟؟ مع اني ارسل معاهم الخدامه علشان ماحد يتضايق منهم

كل الاجازه انا ماسافرت ولي تقريبا سنتين مارحت.. اخر سفره مع اهله( الله لايعيدها)
قال لي زوجي نسافر الأربعاء اللي راح ( 25/ 10 ) مع انه تاريخ وفاة ابوي العام وكنت حزينه انه كمل سنه ميت
قلت بروح الشرقيه يومين اغير جو
وصلنا الشرقيه الساعه11 ليلا زوجي تعبان تعشى ونام
صحينا الخميس اليوم الثاني الساعه12 اول ماصحى زوجي وراح يصلي ورجع
دق عليه ابوه ..تتوقعون وش قال( متى بترجعون)؟؟؟ ( انت وراك اشغال المفروض ماتسافر ارجع الجمعه):eek:

انا سكت وتحملت سويت نفسي ماسمعت شي
زوجي حس بدوخه وصداع( مادري من حركات اهله)( لانهم مايخلونه في حاله( كل ساعه اتصال) كل مشاويرهم من مستشفيات ومكتبات واسواق واقارب إلخ.. حتى سباكين البيت مايجيبه غير زوجي

زوجي حس بصداع شديييييييييييييييد ولاطلعت ولا تمشيت نام مره ثانيه نومه طويله
رحمته وخليته حسيته تعبان وانا بين اربع جدران استناه يصحى نطلع نشم هوا
صحى يبكي من راسه راح المستشفى باليل قال له الدكتور معك ارهاق شديد وانخفاض من الضغط( طبعا كل اصابع الاتهام هنا تشير الى اهله)

انا قلت له نروح نرجع الرياض .. قال ليش....قلت خلاص انت مريض وانا تعبت نفسيتي من اهله
قلت نعوضها بعدين.. قال لا بنتمشى شوي( حس بالعافيه بعد ماخذ علاجات الضغط مع انه ماكان معاه ضغط اول)
وتوه صغير بس كنه ابو 40 سنه من اهله( الله حسيبهم)
تمشينا الجمعه ساعتين ونرجع الشقه والسبت ساعتين ونرجع الشقه
ابوه يتابعنا بالاتصاللات وينكم طولتوا
مع انهم سافروا في الاجازه 10 ايام محد نغص عليهم راحو المدينه وينبع
وولدهم العزوبي راح الامارات مادقدقوا عليه مثلنا.........بس هم يحبونا مرررررررره :angry2:
الاحد رجعنا للرياض ......اسوأ سفره سافرتها وانا ارتب اغراضي بنرجع جالسه امسح دمعتي واتظاهر باني مستانسه عند زوجي..... وانا ماحس اني مسافره جالسه بالشقه علشان مرض زوجي
وواضح انه يتحمل من اهله ويسكت

اليوم بنتي راحت لبيت جدها
ابوها حطهم راح ساعه وحده بس
ووين راح خذ اخته ووداها للمكتبه
يعني ابو زوجي يدري ان زوجي ماجا عندي
تدرون وش قال لبنتي
( امك وين الحين) ( وش جالسه تسوي) (نايمه ولا وينها فيه)




:( عيب والله عيب اثاريه من فتره كذا يسـأل بنتي
وشرايكم فيه

يعني يبي ولدهم عندهم ويبي يظمن اني جالسه في البيت

مارحت للسوق

ولا رحت اوسع صدري

لين متى اتحملهم

ووشرايكم اقول لزوجي ولالا

لأنه صراحه قهر كذا..يتتبع حركاتي......وهو رجال كبير

:( مادري الاقيها من ام زوجي ولا من ابوه

انا لله وانا اليه راجعون

اللهم من ارادني بسوء فأشغله في نفسه ورد كيده في نحره

وعلى فكره اي ردود غبيه فيها شتم وسب انا ما ابيها ( الله لايوفقها اللي ترد علي برد يزعجني) يعرفون انفسهم زين

ونسيت اقولكم ( اولادي يروحون هناك) موبشكل يومي .. وابوهم هو اللي يطلب ياخذهم معاه.. واحيان ابوهم يجلس معاهم.. واحيان يروح ويتركهم..