اخت زوجي استشاريه في مستشفى الولاده اولد فيها ولا اروح خاص محتاره

السلام عليكم ورحمة الله وبركاته


حبيباتي انا حامل في السابع وبكريه ومره خوافه وجسمي حساس ومايتحمل الالم وكنت مخططه اولد في المواساه بالمدينه وباتابع حملي فيها
وامس رحنا نزور اخت زوجي في المستشفى لانها اجهضت وقالي زوجي انا نفسي تولدي هنا لان اخته الكبيره استشاريه فيها وقالي ان كلهم دكاتره كبيره واكفاء وممتازين وقالي ان الخاص لمن تصير عنده مشكله او تعقيدات يرسلوا الحاله للولاده وحتى لو البيبي محتاج عنايه خاصه يرسلوه عليها وهذا كلو انا عارفته من زمان بس مطنشه لاني حاطه في بالي مستحيل اولد في عام
بس امس اقنعني شويه يعني دخلت الفكره راسي ولمن استشرت الناس ماما قالتلي العام لمن تكون لكي فيه واسطه تعاملهم مره حلو وخالتي قالتلي لو انا حملت اولد عندها لانها واسطه والكل راح يوقفلك ويهتم فيكي
بس برضو متردده يعني احس التكييف عندهم عالي على الوالده بس مدري نفس الشي في الخاص ولا لا
انا كل قريباتني ولدوا في المواساه وزوجي يقولي الخاص مو مضمون ممكن يولدوا قيصري بس عشان الدفع وممكن يدخلوا البيبي حضانه وهوا مو محتاج عشان يسحبوا وخلاص
ياريت تنصحوني حبيباتي ايش اعمل وانا ناويه كمان استخير
واللي ولدوا في الولاده يقولولي هل بعد الولاده يجيبوا لك البيبي على طول ولا يبيتوه في الحضانه؟؟
وهل عندهم كمامه بنج وابره تخدير ولا لا؟؟؟ وهل عندهم خياطه تجميليه ولا لا؟؟؟
وكيف كانت الولاده والدكتوره معاكي
ياريت تساعدوني يعني صح كل قريباتي ولدوا طبيعي في المواساه بس اعرف ناس ولدوا قيصري وصح احتاجوها بس مااضمن على حظي انا ايش يصير