اخواتي تكفون شوروا علي كيف اتصرف مع ام زوجي واخواته طفشوني من بيتي وحياتي

السلام عليكم ..

حبيباتي اخواتي ودي اسألكم سؤال نفسي اتأكد من اجابته حتى اعرف كيف اتصرف لاني ببداية حياتي ومالي الا سنتين متزوجة وهالموضوع مجنني وابيكم تفيدوني ..

هل فعلا مرت الولد الطيوبة الحبوبة السنعة محل حقران من ام الزوج واخواته ؟!!!!

انا بنت ماامدح نفسي لكن امي ربت ع السنع واحترام الناس وتقديرها ، جيت لأهل زوج الله لايوريكم حسسوني اني مقشرة ولدهم وسالخته واني ناوية احرمهم منه .. وانا ولله الحمد دايم اعين زوجي على برهم ووصلهم ، بي من اول زواجنا وزوجي مسك عمل ماخذ كل وقته وبالويكند ننزل على ديرة اهلنا وماتشوفه امه لانه طول الوقت ينوم يعوض تعب الاسبوع ..

دايم ازورهم واهديهم واوجبهم واعزمهم ببيتي بس ام زوجي بحكم اننا بالمدينة دايما تجي عندنا وتقعد عندنا ايام طويلة واخواته عددهم فوق العشر ماشاء الله يشرفون بشقتي يشووفون امهم وانا اخدم فيهم واكرمهم واقول لو كنت مكانهم بتمنى زوجة اخوي تفتح لنا المجال نشوف امي عندها بس ليه هم مايعزكونها ببيوتهم والله مصاريفنا زادت ماهمني يستاهلون كل خير بس ليه حاقريني ومعتبرين بيتي مسرح لهم حتى استئذان مايستأذنون طيب يمكن لي مواعيد يمكن انا تعبانه والله ..
اكرمتهم وحشمتهم بس هم حاقريني ويبون اخوهم يصير فاضي لهم 24 ساعة زي زمان قبل يتوظف ويتزوج .. انا اصلا مااشوفه كيف هم يبون يشوفونه ويبونه يخدمهم ويوديهم مشاويرهم مثل اول ..
اقارن بيني وبين سلفاتي والله انهم معطينهم قدرهم وفوق قدرهم مع ان سلفاتي مافتحوا لهم بيوتهم مثلي ولايهدونهم ولايزورونهم مثلي وعاملين لهم الف حساب حتى خالتي ماتحب تنام في غير بيتنا وهم عيالها مثل مازوجي ولدها ليه كل الوقت عندي .. ابيها تروح لهم مثل ماتجي عندنا ماصرت اخذ راحتي بالبيت لابلبس ولامشاوير حتى زوجي صار يرجع يجلس مع امه شوي وينام ماصارت بيننا اي خصوصية غير تدخلاتهم بحياتنا وشئون بيتنا والحوسة وازعاج بزرانهم ..

نفسي اتغير واطلع لهم بوجه ثاني واخليهم يحسبون لي الف حساب مثل سلفاتي بس مو هذي طبيعتي طبيعتي مااحب اغلط على احد مهما اساء لي بس قدامي عمر ماابي احرق نفسي وادمر صحتي لأجل هم ينبسطون ويستانسون .. وش تنصحوني يابنات تكفون انا بضيقة مايعلم بها غير رب العالمين .،