السلام عليكم
كيفكن صبايا .. حبيت أغير شوي من الجو اللي عايشينه في المجلس العام
يالله استمتعوا معي
صحيت الصباح بكسل، اتقلب في سريري الوثير ، تارة يمنه وتارة يسره ، أشعة الشمس
تتبع تقلباتي بخفه و عيناي توزع نظراتها هنا وهناك في أرجاء الغرفة بحثاً
عن "جوهر" خادمي الخاص ! فـ صباح ما يبتدي بجوهر ماهو بصباح
بدأت استشيط غضباً لأن عدم شوفتي لجوهر واقف قبالي شايل المبخرة بيد
وصينية القهوة باليد الثانيه وفاتح لي الداو جونز وشيكاغو بورد أصابني في مقتل ،
وين ممكن يكون ؟ وين طس له ؟ مايدري اني معينه مرافقي الخاص ذكر لا أنثى
عشان مسألة الالتزام !
كوني بيزنس وومن ومن اكبر تاجرات الشنطه في البلد حرمني من أشياء كثير لعل اهمها النشاط،
والمصادفه الطريفه في الموضوع رغم اني انسانه مطنوخه و ديجتال ( من هالوصف واضح انها تسمع بالعز )
ولو انفض يدي طاحت منها دولارات الا اني ما عندي ساعات ولا اعترف فيها ولا احب البسها ولا اشوف احد لابسها !
بإختصار انا انسانه ما احب احس بالوقت والدليل اني ما اصحا ع منبه نهائي
اصلا ممنوع المنبهات تدخل قصري ، ما اصحا الا ع صوت جوهر ..
بما ان يومي بدا غلط فـ المزاج قفل خلاص ، لبست شورتي الابيض وطلعت للمسطحات
الخضرا الي تحيط بقصري عشان امارس رياضتي المعتادة ، رياضة الطبقه البرستيج ، الغولف
وانا نازله مريت امي وسألتها اذا فيه احد اتصل ع المكتب قالت لي ابد مهنا الا محمد الفايد
يأكد موعد الدزابله ، من اهم الاسباب الي مخليتني اعيّن امي سكرتيره للمكتب غير كونها
تجيد التعامل مع المواعيد والتسليك انها رغم اجواء العمل العالميه الا انها متمسكه بالكلتشر السديراوي ولا غرّتها العولمه !
مالكم بالطويله طلعت العب شوط غولف ( الغولف للقراوا الي مايعرفون وشهي زي المصاقيل بس ع اكبر شوي )
مشيت مشيت و جوهر وراي بالغولف كار معه شنطة المضارب و ترمس القهوه
انا امشي وادندن " ياهل السامري لا توجعوني "وجوهر لبى قلبه مسفهل ويرد
علي " شيلكم يالربع يثر عليا " < هذي اخرتها ؟! وين راحت حياة البذخ والديجتال
والبوكيمون يا سلالة بيتهوفن اخرتها سامري !
مرت ساعات النهار سريعه وانا ماغير اشوّت بهالكور ما بقى طير بالسما ما رجمته مير
ولانيب حول شسمه ذيك الفتحه الدويريه الي بالارض < من شافتس تقولين ان الغولف
مصاقيل بس كبار غسل يده ولا شره عليتس
يوم شافني جوهر تغلقت وضاق صدري مير ويتغافلني ويروح يسقّط كورة بالفتحه
قبل اضرب الي معي بشوي عشان لمنها طارت فوق قال جبتيها
تلوموني بجوهر ؟ :35:
بس للاسف انقلب السحر ع الساحر ليتنا من حجنا سالمين ياجوهر ، صدقت اني اعرف
العب وتحمست الله يصلحني وماغير تصبيخ بهالارض بالمضرب ، الثيّل كله تنتف غدت
الارض تحتي كنها صحن تبوله
مادريت الا بشي يقرصني مع ساقي واصرخ ذيك الصرخه ، طارت ع اثرها الطيور
من فوق الاشجار واختبأت الغزلان في الانهار و رقصت الاسماك تحت الامطار < يختي جد
احد غاصبتس تكتبين موضوع ؟
ساد الهدوء المكان فقاطعه صوت جوهر الرخيم : عمتي وش فيتس ؟ ::icon35:
رديت عليه وانا مدروخه من القرصه : آآآه جعل الي فيني فيك يا جوهر ( امحق محبه ) ،
قرصني شي برجلي فارق انقلع جب لي ثلج والا تبن احطه ع ساقي والا تدري ؟رح جب د. الربيعه بسرعه
راح جوهر وجلست في مكاني اتفقد رجيلاتي واهوجس بمستقبلي وتخبرون عاد الواحد
اذا طقته الهواجيس وهو في الخلا لا شعورياً يدينه تحثرب وتحوس بكل شي حوله كانه
تراب بدا يرسم عليه خطوط ودوائر وكانه عشب بدا يمعطه وينتفه من ارضه بلا رحمه
مثلي وشرواي الطيب ، عاد هماها مسطحاتي ؟ بكيفي !
جا المغرب والشمس قربت تغرب و جوهر توه ما رجع لا بالثلج ولا بالربيعه ، كنت منسدحه
ع بطني العب برجولي واناظر الارض ، شفت نمله تركض شوي لحقتها نمله ثانيه شوي
نمله ثالثه شوي رابعه شوي نمل كثييييير يركض وانا بكل ما اوتيت من سباهه اناظرهم
واقول سبحان الله سبحان الله فعلاً يعني إنما يخشى الله من عباده العلماء ع اساس اني
فاهمه ليه يركضون
سباهتي منعتني من الإلتفات لمسألة ان النمل يركض ناحيتي وتجمع تحتي فجأه حسيت
نفسي ارتفعت عن الارض ، ناظرت تحتي لقيت النمل شايلني و يركض و يدخلني في جحر صغييير بالارض
.......................................................................................................................
لقيت نفسي تحت الارض ، هو المفروض اني ارتاع بس بحكم ان بي عرق حضرمي
وعقليتي تجارية بحته فأنا جلست افكر لو بسوي مترو هنا كم بدخل من وراه !
يوم بديت اقلبّ عيوني بالمكان مير ويفتح الله ع قلبي واستوعب اني مسحوبه تحت
الارض من قِبل عصابه من النمل .. النمل خطفوووني ::eek:
استقعدت بجلستي واثاريني صايره نتفه طول النمله
وحولي طابور من
النملات يناظروني بحقد :07:
اقبلت علي وحده منهم بيده رمح ودرع يبدو لي انها سكيورتي بس دقه قديمه
وقالت لي : تعالي معي !
تسائلت بكل براءه : يا حليلكم تتكلمون ؟
تلوني مع علباي و ودوني لنمله شااااايب وهذا عاد يبدو لي انه الحكيم حقهم جلسوني
قباله بس قبل لا يدخلوني عليه عطوني عبايه البسها عشان اغطي عصاقيلي
جلست اتمقله وفي خاطري بوهته فيها من ابوي عبدالعزيز ! لالا ابوي عبدالرحمن لا بس
ابوي عبدالرحمن ماله لحيه بيضا ! وياما نكست راسي يمين وياما نكسته يسار وانا احك
دقني واهوجس مين يشبه ! اثاري الرجال واصل للبند رقم ٣٢٩٤ من قوانين قرية النمل
وانا ماحولك احد ،، ما تفطنت له الا وهو يقول :
وعلى ذلك فرضت عليك عقوبة السجن الاجباري مع الاعمال الشاقه لحين تحديد العقوبه الفعليه .
انا :06:
خير خير يبو سلامات وش الي عقوبه ماعقوبته وشهي عقوبته ؟
يبدو ان استفزيته بسؤالي هذا لأنه الله يجزاه خير سفهني و رماني بالسجن
و وقف قبالي حارسين معهم دروع و رماح ( لوهله شكيت اني في قرية نمل رومانيه )
جلست يوم كامل مزجوجه بالسجن لا احد حاتساني ولا احد حتى حشمني ومد
لي فنجال قهوه وما اشوف هالنمل في القريه الا ماشاء الله مدهرين نمل راقي
نمل نازل يطحنون طحن وكعادة عقليتي التجاريه الفذه فكرت لو بستقدمهم يشتغلون
عندي كم تبي فيزهم !
دخلت علي نمله بنت حلال اسمها مرجانه جايبه لي نتفه خبزه وجلست تسولف معي ..
قلت لها الحين وراكم حابسيني وش انا مسويه ؟
قالت لي اني قتلت ملكتهم
انصدمت صراحه لأني خابره نفسي رخمه ما اسطي اذبح نمله عاطله عن العمل
فما بالك وهي نمله ملكه فشرحت لها ان اكيد انكم غلطانين وفيه لبس بالموضوع
قالت لي ابد ،، ذاك اليوم الي كنتي تلعبين فيه غولف ومتحمسه بالمضرب تخبطين الارض
هدمتي سقف الملكه فوق راسها و دخلت في غيبوبه ، وطلعت فرقه عسكريه مننا وقرصتك
مع ساقك عشان تبعدين ع المكان بس الي صار انك انسدحتي بكبرك فوق القريه وهبدتي
بسقف غرفة العنايه المركزه حقت الملكه و هالمره دخلتيها في غيبوبه دائمه وماتت !
فقال حكيم قريتنا جيبوها ذي لازم تتعاقب
قلت وانا انقش اسناني
:
اهااا عشان كذا شايبكم جلس يبربر علي بدستوركم !
طيب الحين وش السواة ؟ وش تهقين بيسوون فيني ؟
قالت لي وهي تتنهد :
يابنت الحلال ادعي ربك يفكك من كتيبة اعدام النمل الابيض وغير
كذا فأمورك بخير
من وقتها والهواجيس تلعب فيني اثاري الدعوه مهيب لعب ،، السالفه
فيها نمل بيض ونمل اخضر وكتايب اعدام و كتائب القسام ومعمر القذافي
< واضح انها انسانه حد علمها بالسياسيه اخبار.....
مر ع قعدتي بالسجن ٣ ايام لا احد يكلمني ولا اكلم احد وعن الذمه ما سولفت
الا مع مرجانه النمله الحبيبه الي تحط لي الاكل والشرب و بما اني انسانه ما اعترف
بالساعات ابد ولا اعترف بالوقت فكان موعد دخول النمل وطلعته من القريه هو ساعتي
اهبووو عليهم عقارب ساعه :time:
ولأني محكومه بالاعمال الشاقه كنت اطلع مع مجموعة النمل العامل من الفجر الى الليل
اشتغل واجمع معهم في بقايا الاكل و ابني في المستعمرات والاعشاش المجاوره ،اشتغلت
شغل ما اشتغله كومار في زمانه
ونسيت حياة العز والمطنخه والديجتال الي كنت فيها
والي كان فاحس تسبدي و ممرضني اننا في نص شهر ٧ واذا قلت لهم وشهوله تجمعون
كل هالاكل قالوا هذي مؤونة الشتا اعنبو بليسكم وينا و وين الشتا
في اليوم الرابع خذوني الحرس للشايب الحكيم حق القريه دخلت ولقيت حوله مجلس
إدارة القريه مجتمعين ، خمس نملات لابسين بشوتهم وريحتهم دهن عود ، جلست
قدامهم ع استحياء وانا انتظر حكمهم القاسي الي بيصدر بحقي .. ناظروني وقالوا لي :
بحكم ان قريتنا تحت ارضك ،، وبحكم انك اثبتي حسن نيتك وعدم اضمارك الشر لنا
وبحكم اننا ما شفنا منك شر طول السنين الي راحت فـ احنا قررنا تخفيض العقوبه
لتصبح بالتالي :
تعيينك ملكه لنا و القيام بدورك و واجباتك كـ ملكه و " الزواج " لتولي مهمة التكاثر في قريتنا لما تجيبين الملكه البديله ،،
مير وانا الي اسفهل وينور وجهي ، قلت بااااس ! هذي ابرك الساعات ما طلبتوا شي
لو اني داريه ان الدعوه كذا كان من زمان دابغه ملكتكم ونازله لكم بنفسي :27:
حسيت من نظراتهم انهم حاقريني وشايفيني منيب كفو اصير ملكه بس يلا اهم شي
اني بعرس آآآ قصدي اهم شي اني سلمت من سالفة النمل الابيض والا شغل الملكات
والعز والديجتال سلق بيض بالنسبه لي شي انا متعوده عليه
بعد ساعه من قراءة الحكم استعدت القريه لمراسم تنصيبي كـ ملكه :king:
تجمع سكان
القريه تحت منصة التعيين و طلع فوق المنصه حكيم القريه وانا و شيوخ مجلس الشورى
الخمسه ، بدا الحكيم يبربر كعادته الله يحييه وانا عيوني تتلاقط ادور عريس الهنا
:arb:
ولسان حالي يقول تهقينه ذا ابو عيون ناعسه ؟
لا لا ذا شكله مايحب السامري ما ابيه ،
طيب تهقينه ذا ابو خشم مسلول ؟
امم لا ذا جنبه وحده شكله راعي ترقيم وتدييت مابيه انا ادور الاستقرار ،
امم طيب الوكاااد انه ذاك المعضل لبى قلبه شو زقرت
.......................................................................
يالله عسى ضحكتوا واللا بس ابتسمتوا :39:
دع الخلق للخالق .. والحياة بكره أحلى
يلزم عليك تسجيل الدخول أولًا لكتابة تعليق.
مشكووووورة ع المرور .. بس للأمانه الموضوع مو من تأليفي بس .. راق لي وحبيت أوسع صدوركم
زائرة
•
خخخخخخخخخخخخ يعطيك العافية على النقل
الصفحة الأخيرة
اجل بالاخير صرت ملكة النمل .. بس ماسمعت جوهر يصوتلك يدورك
ولا تهقينه افتك منك
كل ماقريت لك موضوع ببدله من بائعة الورد لملكة النمل خخخ