ارشدوني

بنات موقادره انام قلبي ناغزني

غالباً الزوجه لما تحس بشي يكون احساسها صادق وياليت شكي ماطلع بمحله

بعد ماخلصنا من الفراش قام وقالي نامي

انتظرته عشر دقايق وناديته جاني الغرفه سألني شفيك ليش ماتنامي قلتله غفيت شوي وشفت كابوس (قلتله كذا عشان يتم جمبي وينام معي)

بعد أقل من دقيقه قام وقال بجي بعد شوي

جلست أسأل نفسي شعنده جالس مدام اللاب مطفي والدفايه وايرها مفصول!

قمت فتحت الباب بشويش سمعت صوته وهو يتكلم بس ماعرفت وش يقول

عبالي الصوت جاي من الصاله وقمت أطل من دون مايشوفني أثاريه بالغرفه الثانيه

شفته واقف عند الكوايه زي الصنم ومبتسم سألته شعندك بالغرفه شتسوي هنا (الغرفه حق اغراض مافيها تلفزيون ولاكنب ولاشي)

قال جالس آكوي شماغي طالعته بنظره حاده وقلتله اللي بيكوي شماغه يخلي الغتره والساعه والمفاتيح والجوال على طاولة الكوي وفوق الشماغ بعد! ومومشغّل النور!!

جلس يوزع ابتسامات شبك واير الكوايه يسوي نفسه يزبط الشماغ من قدام وقالي إلمسيها شوفيها حاره (يعنني موتوّه مشغلها ومخلّص الكوي بس باقي من قدام)

حط يده على كتفي وقالي يلا تعالي ننام عشان نصحى بدري بكرا موعدك الساعه 8

لما دخلنا الغرفه جا بيحط الجوال على الكمدينه اللي جمب السرير قلتله افتح جوالك أبشوف آخر مكالمه

مارضى وعلى طول طفى جواله سألته ليه طفيته قال عشان ماتشكّي!

قلتلك ماراح اغمض عيوني لين توريني سجل المكالمات حزتها بنام وأنا مطمئنه ومرتاحه

قعد ينكر ويحلف انه مومكلم احد قلتله اللي واثق من نفسه و مومسوي شي غلط يخلي جواله مفتوح ومايخاف

جلس يقول تعالي بحضني وأنا افهمك ويسمعني كلام حلو عشان اجي فوق السرير ومره يقول بشتريلك خاتم ذهب ومره يقول بوديك حديقة المشروع وأخليك تسوقين ومره يقول محضّرلك مفاجأه بتعجبك

كل هذا عشان آشيل الموضوع من راسي وأنسى الموقف ولاكأن حصل شي

استنيته ينام بعمق قمت شلت الجوال وطلعت

شغلته طلب مني إدخال الرقم السري للشريحه 3 محاولات وبعدها تحترق الشريحه

وبحكم إني ماأعرف الباسوورد ماحبيت اجرب أدخل رقم عشوائي عشان ماتروح محاوله واحده ويحس اني حاولت افتح الجوال

حطيت ايقاف تشغيل الجهاز شلت الشريحه رجعت شغلت الجهاز واشتغل

دخلت سجل المكالمات وتأكدت من صحة شكوكي

صوّرت الشاشه بجوالي + حفظت رقمها بجهات الاتصال (مدري ليه بس احتمال اسأله وذا أنكر وجلس يقسم انه مومكلم وحده أحط الصور بعيونه عشان يعرف اني مومغفله ومايحاول يتذاكى علي ويخدرني بكلامه المعسول)

سؤالي للحكيمات : ايش التصرف المناسب لمثل هذي المواقف ؟

عارفه نفسي ماراح انام بواصل لين هو يصحى ونمشي المستشفى

كيف اتعامل معاه هل أواجهه عشان ارتاح ولا أشيل بقلبي وماأخليه يحس اني دريت عن سواد وجهه ؟


ارشدوني