استقعاد العدو

بالبداية بشرح لكم الوضع وبعدها المواقف وبعدها ابي المشورة منكم لاهنتم
انا تزوجت وعمري 16خلصت اولى ثانوي ورحت مع نصيبي الحين لي 16 سنة متزوجة وعندي 5عيال الله يحفظهم زوجي اكبر مني ب5 سنوات يعني حتى هو صغير يوم يتزوجني انا يتيمة الابوين توفو وانا طفلة بحادث وذقت جميع انواع المر الضرب والشك والفقر والقطاعة بين الاخوان انا الصغيرة اول خاطب جاني اللي هو زوجي وافقت على طول ابي الفكة من بيت اهلي بس ماكنت مقتنعه فية ولا ارتحت له في الشوفة وبكيت بعد الشوفة بدورة المياة وانتم بكرامة بس يقولون وش حادك على المر قال اللي امر منة زوجي كان الولد الخامس لعايلتهم وتحتة بنت اكبر مني بسنة وعندة اخو اكبر منة ب3سنوات بس زوجي تزوج قبلة وبعد زواجنا بسنة تزوج هذا الاخو اخت زوجي كانت البنت الوحيدة والقعدة مدللة جداجداجدا كل صيفية بلندن او امريكا وكان عندهم خدامتين فلبينيات للمعلومية الجميع متزوج يعني خدامتين للبنت والام والابو فقط ........
نجي للمشكلة اخت زوجي هذي مستقعدة لي تكرهني كرة مو طبيعي بالله عليكم من المفروض انها تغار من الثانية مو انا ؟بحكم ظروفي ووضعي اقسم لكم بالله العظيم انها من قبل ماادخل عليهم وهي ماتبيني زوجة لاخوها واكبر دليل على ذلك خذو هالموقف ودريت عنة بعد زواجي ب 6شهور من الام يوم اخوها بالملكة جاء ياخذ كرت العايلة عشان يضيفني جت من المدرسة وهي بمريولها وسالت اخوها وريني ابي اشوف تاريخ ميلادها ويوم شافت اني اصغر منها واحلى طرطعت على امها وبكت من زود الدلع وقالت لا ماياخذ وحدة اصغر مني وانحف مني وخالتي قالت لها وانتي وش دخلك فيها ولدنا صغير ونبي له وحدة صغيرة وعاجبته مالك شغل قالت لا انا ادور له غيرها وزعلت وتم الزواج وزنها كان مية وزيادة وطولها متر وسبعين لاتمت بالانوثة بصلة وكانت هذي عقدتها وانا كنت عصقوله وهم عايلتهم السمنه فيهم وراثة ويموتون بالنحف كلنا حريم عيالهم نحيفات الا وحدة بس بعد العيال زاد وزننا المهم من اول شهر وهي ودها تفرمني وكل جماعتهم يوم شافوني قالو مالها خوات واللي يقول لخالتي من وين لقيتيها واللي يقول زوجها كان يبي وحدة زي كذا جاك يامهنى ماتمنى كل مامدحني احد تحاول تحطمني مثلا اذا سهرنا انا وياها تقول بنت جيرانا تقول مسكين اخوك كان يبي طويله واخذ صغيرة وانا اقولها دايم اللي يتشرط مايتزوج على شروطة (قمة البراءة)
ماكنت فاهمتها وتجيب صور قريباتها وصديقاتها وتوريني اياها يعنني ابي اوريك اياها واخوها لاصق فيني يشوف معي ويسال هذي بنت مين ؟وتجاوب الاخت وانا كاني تحفة كانو امها وابوها واخوها دايم في بداية زواجي يحطمونها قدامي لكن من زود حبهم لها مثلا لاتاكلين هذا يسمن واذا اكلت يقولن لها شوفي فلانة اللي هي انا جسمها شلون زين ماتاكل زيك كل البنات يحافظون على اجسامهم الا انتي وانا اقول هذا سبب ثاني لكرهها لي مرة اخوها قالها مااحد بتزوجك وانتي كذا الرجال مايبون زيك كل ماحطموها كرهتني زيادة بعد زواجنا بسنة تزوج اخوة وحدة اكبر مني بسنتين وسمينه كل الاقارب والجيران مامدحوها زي مامدحوني حبتها كثييييييير وصارت تكيد لي بالسلفة الجديدة مثلا الجيران يقولون اجمل حريم اخوانك الجديدة وهم ماقالو بس من كرهها لي تالف ومثلا تدخلها غرفتها وماتقولي تعالي واذا رحنا لمول تقول لها تعالي معي انتي ذوقك يجنن كل ربعنا مجنين على لبسك واذا سهرنا واكلنا شبسات تمد لها وانا لا مرة كانت بالسوبر ماركت ويوم رجعت قالت شريت لك هذا وهذا وهذا ادري تحبينهم وانا زي الكنبة اصلا ماتناضرني وانا مكبرة عقلي انا ادخل بينهم واسولف للمعلومية انا وسلفتي نموت ببعض ولا نغار من بعض وهذا الشيء قاهرها زيادة اذا تغدينا تغرف لها وتمد لها وانا لا والتحطيم مستمر ليومكم هذا واحيانا تلتفت علي وتقولي وش رايك بجمالها بذمتك ونا اقول اي والله تهبل ياحبي لها وتموت من القهر انا جبت ولدي الاول بعد سنتين والله ان جرعة الكرة زااااااادت وجبت ولدي الثاني بعده ب 3 سنوات ورحت مع اخوها لفرنسا وخليت عيالي عند جدتهم بغت تموووووت وقالت انتي منتي حنونة وقلبك قاسي ويوم شافت تصوير الفديو حق نيس وكان قالت شكلك برى يحوم الكبد كم طويل وحجاب ورايحة تتمشين بالشاطي قروية قلت وش تبين البس بكيني ؟ وقبل 5سنوات رحنا لتركيا يوم رجعنا قالت باكبر مجلس فية حريم اكيد اخوي تفل بوجهك يوم شاف جمالهن قلت لا ابشرك ماتفل لانه شبعان من الجمال انا عندة واذا تفل على قولتك حتى انا بتفل شبابهم هناك يقطعون القلب من وسامتهم (لاول مرة ارد ) تزوجت هي بعدي ب 7سنوات عن طريق علاقة ومقابلات بشخص منفتح جدا مايتغطون وصارت زيهم حملت بعد زواجها بشهر وانا كنت حامل بولدي الثالث وقالت لي وحنا بالشهور الاخيرة تخيلي تجيبن ولد ؟ ولدت وجبت ولد وهي بنت بكت بالمستشفى وسبحان الله على دخلتي سمعتها تقول ماتوقعت اجيب بنت لاخر لحظة تقولي الدكتورة بنت وانا اقول لها لا ابي ولد وتشاهق وقسم استغربت انه فية حريم لهدرجة جاهلات وجابت بنت ثانية بعدها بسنتين وصارت حتى عيالي تكرههم تحب عيال اخوانها كلهم الا عيالي للامانه ماشافو منها شر بس واااااضح ماتحبهم تمازح العيال الباقين اما هم لا ودايم جماعتهم اذا شافو عيالي يقولون ولا واحد من عيالك اخذ بياضك على ابوهم وتهب فيهم احسن الولد اسمر وربي عطاها بنت اسمر من عيالي زوجها اول سنة عاطل بعدها توظف وظيفة عاديه ابوها هو اللي يصرف عليها تسافر على حساب ابوها والبيت ملك بشمال الرياض من ابوها ماعطى ولا واحد من عيالة بيت البيت هذا كان لاهلها جديدطلعتهم منه وسكنو بيت قديم بشرق الرياض ومو حلو عشانها اخوها احيانا يجرحني قدامها تستانس مرررررة واذا سفرني ولا اهداني تموووووت قبل سنتين جبت الولد الرابع والعام الماضي جبت الخامس بينهم سنة اذا رحنا لجمعتهم الكل يصورهم ويشيلهم الا هي خالتي كانت تحبني لكن هالسوسة خربت المحبة وشوهت صورتي وصارت خالتي مثل بنتها وازود حتى اخوها تحاول تمدح حريم اخوانها بالشكل والسنع كثر الدق يفك اللحام زوجي الحين مصدق نفسة انه يخب علي وصارت معاملته معي زفت زفت هي من اول زفت بس السنين التالية بزيااااادة واللي زاد الطين بلة ان اخواني كلن نفسي نفسي مالي سند او عزوة صرت اشيل هم الروحة لهم من البنت وامها واقول في نفسي ياترى وش مجهزين لي شيء يغث والله اني استانس اذا شفت سلفاتي جايات والهى بالسواليف معهم .........
وش الحل برايكم خصوصا بعد ماجبت عيالي الصغار ودها تفرمني انا وياهم للمعلومية هدايا واهديناها تودد ومانفع مدح ومدحنا ابي احرجها بطيبتي بس الوضع مزري