اكرام الله تعالى لعباده الصالحين .. موقف فريش صار معي الليلة

السلام عليكم ورحمة الله

حابة اكتب لكم موقف مرر فيني .. لان عندي ايمان

ان فيه مواقف في الحياة المفروض ما تمر علينا مرور الكرام

لازم نتاملها .. عشان نكتشف وش الرسايل الي ربي يرسلها

لنا من خلال المواقف هذي ..

بنات وش معنى لما تكونين ضيفة عند ناس

ويقلطونك على : مفطــــــح ؟؟ معناها من قوة ماهم مكرمينك ..

ماقلطوك على عشا عادي .. انما ذبيحة .. مفطح ...

سبحانك ربي ما اعظمك واعظم رحمتك بعبادك

امي الله يحفظها من كل شر .. مداومة على صيام الاثنين والخميس

وايام البيض .. اسال الله ان يعلي مراتبها في الجنة ووالدينكم اجمعين

انا سابقا كنت اصوم الخميس فقط لان عندي دوام

الله يغفر لنا تقصيرنا .. وقفت صيام .. واراد الله اليوم الخميس

ارجع اصوم ! .. اليوم الخميس كنا بنروح انا وامي بعد المغرب

لجارتها .. اعز واغلى جاراتها .. لنا عنها عشرين سنة الله يكرمها

بالدنيا والاخرة يا رب ..

صمت وجلسنا على الفطور انا وامي .. لاحظت امي ما كلت غير تمرة ولبن وزبادي

اقول يا ميمتي كولي تقول لا ابي اتعشى عند ام سعد جارتي

الحين تشوفين كيف تضيفنا .. اخبرها من زمان ماعمري جيتها

الا مدت السفرة من هنا لهناك ... ولا ابي اروح لها معدتي مليانة

عشان اكل من ضيافتها ..

رحنا للعزيزة ام سعد .. مر الوقت قهوة وشاهي ولا شي غيرها

وتحصل .. سوء تقدير .. يمكن حسبونا بنجلس ساعة وشي ونطلع

يوم شفت مافي عشا .. تذكرت امي انها صايمة على تمر ولين !

كنت برسل لاخوي يجيب لنا العشا .. لكن ماحبيت احرج الناس

كاني انغزهم انكم ما حطيتو لنا عشا .. ما حبيتها ابد

سكتت قلت لا طلعنا نشتري شي ..

طلعنا من عندهم الله يكرمهم .. بالطريق سالت ميمتي : تبين

سندويتشات خبز .. قالت لا لا جينا البيت اكل هناك ..

مع اننا ما طبخنا شي ليومها (حاسبة امي حساب عشاهم )

وصلنا البيت ودخلت المطبخ .. تخيلو وش حصلت ؟

مفـــــــــــــــطح .. صحن دائري كبير .. ذبيحة مغلفة قصدير

زي حق العزايم .. من جيراننا ..

جيراننا هذولي الله يكثر خيرهم دايم يرسلون لنا من رز العزايم

حقتهم .. بس دايم يرسلونه بقدر كبير .. ماقد ارسلو صحن جديد !

وش خلاهم يرسلون صحن جديد عكس باقي المرات ؟

لو كنت ما صمت انا .. هل كنت بلاحظ ان امي ما كلت وبشهد هالموقف ؟

وش درى جيراننا ان امي صايمة ؟

سبحانك ربي .. حسيت الصحن هذا مكرمة ربي لامي لصيامها ..

شلت همها ما كلت .. وربي ارسل لنا اكلها ومن اجود ما يكون

فما بالكم بجزاء الاخرة ..

سبحان الله وبحمده والحمد لله ملئ السموات والارض وعدد ما خلق

اللهم احفظ والدتي من كل سوء واجزها اعظم الجزاء واجعلها من عبادك

الصالحين المكرمين ..

اوصيكم بالبر بامهاتكم واباءكم يا بنات .. اوصيكم تخدمونهم

وتكرمونهم .. وتحسنون لهم ..

حاولوا تلاحظون الي يصير بمواقف بحياتكم .. عشان تشوفون

عظمة الله ورحمته كيف تتصور ..