البيوت أسرار لكن أبي افضفض .. الله يريحك دنيا وآخره ياللي تدخلين

شخباركم بنات

جيتكم اليوم بمشاكلي .. ان شاء الله تكونون احسن مني وتعرفون كيف تساعدوني في حلها :icon33:
انا موظفة ولله الحمد .. واحس هالشي الوحيد الحلو في حياتي

مشاكلي مرتبطة في بعض .. لكن مسببه لي حاله نفسيه تجيني بين فترة وفتره
أبوي شديد ماقلنا شي أوكيه خليه يكون شديد .. مايتفاهم طيب مو مشكله كثير كذا
مايعطيني وجه قلنا طبعة ... مع انه مع خواتي الكبار غير سبحان الله
أنا مااشوفة كثير واحيان توصل بالاسابيع مااشوفه .. أتغدى بالدوام والعشا مااقعد عليه يا اكون نايمه او ماكله شي ومااشتهي
وان شفته وانا ماره بالبيت ماكأنه يشوفني .. طيب ليه مو انا بنته ؟ قلنا مو مشكله مو بس معاي معانا كلنا كذا واحنا تعودنا على طبعه

رغم هذا انا احبه كثير .. واحسه حنون مع غيرنا .. وافهم نفسي انه يحبنا بس مايعبر لنا عن هالشي
وان سألوني تحبين منو اكثر امك والا ابوك اقول في نفسي أبوي يمكن لاني مفتقدته ومو لاقيته
واحسد صديقاتي لما يسولفون عن أبهاتهم..

المهم .. ابوي لما يجون ناس يبون يخطبوني سواء من اقاربنا او برى العيله مايوافق لانه عنده قناعه ان اللي يجي لازم يكون مرتاح مادياً هو وأهله.. وانا قربت اصك الـ 25 واحس ماعاد حد بيجي ..
مره وحده تكلمت معاه رغم صعوبه ذلك وكنت أصيح وحالتي حاله وانا أكلمه لكن مااقتنع برايي وبعدها مافكرت أكلمه بعد .. وأقول نصيب ربي ما كتب

لكن احيان يحسسني اني ثقيله عليه .. ويقول قدامي كلام ان قعدت عالعشاء يحسسني اني كبرت وصرت عاله عليهم بما اني للحين عندهم .. طيب منو السبب مو انت؟! بدال ماانا اعاتبه هو يتكلم. ما ألقى نفسي غير أقوم واروح غرفتي واقعد ابكي على حظي.
بس الحمدلله هالأيام ماعاد يقول شي.

السالفة الثانية .. انه مو راضي اني اسوق سياره عشان اروح دوامي بالجامعه،، عشان العادات والتقاليد .. مع اني اشوف كل البنات بالامارات يسوقون ماعاد حد فيه مايسوق .. كل صديقاتي بالدوام يسوقون وبسياراتهم .. الا انا .. يقول يمكن اذا جا واحد يبي يخطبك وعرف انك تسوقين يغير رايه .
وهالشي مسبب لي أزمه ومشكله بالمواصلات .. اخواني يوصلوني .. وهم متزوجين يعني ثقيله عليهم كل يوم الصبح يقولون قبل وقت دوامهم عشان يوصلوني .. وكثير ايام اتأخر عن دوامي بنص ساعه او ساعه وجاني مره لفت نظر على تأخيري .. وآخر الدوام نفس الشي كل صديقاتي يروحون بيوتهم وانا اتأخر لين ما يمرني اخوي بعد الدوام العصربنص ساعه او ساعه.
واللي معاي بالدوام يشوفوني بنظره شفقة .. لاني مو مثلهم ..

زين اذا ماتبغيني اسوق وخايف علي مافي مشكله .. وفر لي البديل .. خليني اجيب سواقة للبيت
لان مو بس مشوار الجامعه اللي متعبنا حتى مشاويرنا الثانيه نتبهدل بالتكاسي ..
يقولي دوري سواقة توصلك مشوار الجامعه .. وانا سويتها قبل وانا طالبه لكن الوحده فيهم ماتستمر معاي اكثر من شهر .. يعني بهدله .. غير كذا ان سياراتهم ماتكون زينه .. للحين اذكر ذاك اليوم اللي وقفت فيه علينا السياره اول ماطلعنا من باب الجامعه.. والا لما نقع التاير مره من المرات .. المهم عندي اركب باص والا هالسيايير .. والحمدلله اني مقدره وابوي مقدر شو اللي يحدنا على كذا..

فكرة اننا نجيب سواقة او خدامه مو في باله ابداً .. حتى الخدامه اللي تجينا تشتغل بالساعه مع ان امي تعبت لكن مايبي يجيب وحده تقعد طول اليوم خايف من مشاكل الخدم
والسواقة نفس الشي خايف من مشاكلها اذا قعدت عندنا

طيب والحل . ؟

آأأه يا بنات احس مشاكلي كثيرة ولو استهنتوا فيها .. بس صدق مأرقتني

احيان اقول يمكن لو اننا ناس على قد حالنا بتكون عندي قناعه اكثر من كذا
لكن اشوف الخير قدامي لكن مايطولنا ليش ؟ الله منعم على ابوي وعنده خير كثير الحمدلله مليونير
لكن لو جيتي بيتنا تقولين هذول على قد حالهم وماابي اتكلم اكثر .. البيوت أسرار :( << توك افتكرتي

المهم يابنات احس اني بعد ماكتبت لكم جزء من اللي يدور في بالي اشوي ارتحت
والله يريحكم دنيا وآخره