التساهيل من الله وبس ....قصة ولادتي

السلام عليكم ورحمة الله وبركاتة

كيفكم كروشات
اولا اشكر كل وحدة دخلت على موضوعي الاول ودعت لبنتي بالسلامة
الله لايحرمني منكم
وراح احكي لكم قصة ولادتي
بالبداية كنت احس بمغص من يوم السبت لكن ماكنت ادري انة ممكن يكون طلق
لان بولادتي الاوله ماجاني طلق طبيعي كان صناعي وكان حااااااااااااااار الله لايعيده
المهم يوم الثلاثاء رحت مستشفى سلمان علشان اخذ اجازة يومين الثلاثاء والاربعاء
وقالت الدكتورة ماراح اعطيك اجازة الين اكشف واعرف سبب المغص
يمكن طلق قلتلها يابنت الحلال ماهو بطلق بطني يعورني يمكن من اكل اكلتة
عييت ماتفكني الين تكشف وخليتها تكشف علشان ذا الاجازة
وكشفت علي وقالت ولادة الرحم مفتوح اثنين سم قلت خلاص اكتبي الاجازة الحين
وبعدين بجيك مابقى الاهي اولد بسلمان ليش بايعة عمري
ورجعت البيت وجلست افكر وين اروح اولد وفي الاخير قررت انا وزوجي اروح مستشفى الاسرة الدولي
لانه كان اقرب مستشفى للبيت وعلشان مافي احد راح يكون مع بنتي الا الشغالة وعلشان ابوها يروح ويجي عليها
المهم الاربعاء رحت اشوف الدكتورة اسمها فاطمة كشفت علي ولقتة 3 وقالت تبغين تدخلين اليوم او تجلسين الين يجيك
طلق زيادة قلت بطلع البيت وبعدين اجيك ويعلم الله اني كنت بس في محاوله هرب من الولادة ورحت اشوف الغرف عندهم ولقيت عندهم مبنى ملحق بالمبنى الرئيسي جديد وعندهم غرف حلوة ونظيفة وجديدة واخترنا وحدة منها وحجزوها لنا
والمشكله ان الدكتورة تقول روحي امشي علشان الطلق يشتد وانا في نفسي اقول هين والله مامشيت وفعلا رحت البيت
وجلست ماتحرك وكل بعد شوي احس بمغص وباليل رحت الحمام ولقيت الدم وافرازات بنية
آآآآآآآآآآآآه عرفت انها الولادة جاك الموت ياتارك الصلاة وفي الصباح الساعة تسعة يوم الخميس دخلت المستشفى
وطلبت ابرة الظهر وركبوها لي وقالي استشاري التخدير ماراح احط الك البنج الين يفتح 4 واعطوني طلق صناعي وبدت الآآآآم وقلت نادولي الدكتور يزود لي البنج المهم تأخر الوقت وصار المغرب والرحم على 5
وجات الدكتورة ورفعت الطلق وياسلام على الآلآم والله ماكأن في ولاابرة ولاغيرة ومع زيادة الطلق بدأ الرحم يفتح وكنت قاعدة شوي اشتد الام انفتح الرحم 8 وشالوني على غرفة الولادة ورجليني منمله من الابرة وياله جلست الا الرحم خلاص صار 10 وانا بموت من الالم وكلهم يصارخون حولي اذا حسيتي الالم ادفعي
كيف بالله يعني تخيلوا الم شديد لابعد حد وانا ادفع مااقدر وقامو ا يصارخون ياله بيبي تعبان قالت الدكتورة للنيرس يالة اطلعوا على بطنها وفعلا طلع ثنين وحدة باليمين واليسار واول مايشوفوني اصارخ من الالم
ضغطوا على بطني وكل شوي وهم طابين والدكتورة تقول لاتطلعي صوت من فمك اكتمي علشان الدفع وكنت احاول الين ماطلعت وكانت الساعة تسعة بالليل ووقت ماطلعت قمت اصارخ وابكي براحتي واخذو البنت بسرعة يعطونها اكسجين
وانا خلصت البكى ونمت ماادري عن نفسي الا انا بغرفتي واسأل عن بنتي قالوالي طيبة وهي بالحضانة
وبعد ماارتحت رحت اشوفها لقيتها صغييييييييييييييييييييييرة مرة ولقيت الاكسجين وبغيت انهبل عليها
يابعد عمري الله يطمني عليها وامس حولوها على مستشفى سلمان وان شاء الله قريب تطلع وافرح فيها

الحين يابنات الي لسى حوامل لازم تتغذوا زين ولاتصلحون مثلي الحين والله اني تندمت واحس اللي صار لبنتي كان بسببي لاني ماكنت اكل ومهمله بصحتي وهذي النتيجة طفلة ضغيرة وضعيفة
الله يردها لي بالسلامة

وابرة الظهر الحمدلله ماكان لها اعراض لاني بالاساس مااستفدت منها أي شي
والتساهيل من الله وقت مادخلت المستشفى دخلوا ثنتين وولدوا وطلعوا من بدري وانا بس اراقب في العالم
واستنى الفرج من الله والحمدلله
وعقبالكم ان شاء الله تقومو بالسلامة ياااااااااارب............