التنازل من جهة وحدة بين الزوجين!! نوروني يابنات

بسم الله الرحمن الرحيم ..

مشكلتي يابنات مشكلة ..انا متزوجة من 7سنوات وربي رزقني ببنتين وولد الحمدالله.. لكن مشكلتي مع زوجي هي عدم الاتفاق والتواصل بالتفكير يعني انا انسانة واقعية وهو اكبر همه التقاليد الي تغلب على الدين عنده.. رغم انه هو اللي مختارني بنفسه وعن قناعة منه والحمدالله ماودي كثير بنفسي بس انا انسانة محبوبة من الجميع رشية باهلي و على قدر كبير من الجمال والمال.. لكن ببداية زواجي تعرض اخواني على زوجي و غلطوا عليه بسبب غيرتهم الشديدة منه انه تزوج محور العائلة من كل النواحي وبجهلهم خلوا زوجي ينفر مني بسبب تعاملهم له و اللي اسوأ من هذا انه بدأ يحملني اغلاطهم ويتمادى علي .. تخيلوا لدرجة انه كان يمنعني من اني اشوفهم ورغم محاولتي اني اقاومه وهو بالمقابل صار يساومني فيهم.. وكل ماصار بيننا خلاف يهجرني اربع واخمس شهور يروح لاهله ويتركني وياما عيالي مرضوا وكنت ماقدر اطلب المساعدة لا من اخ ولا من زوج علما بان ابوي متوفي بعد ماتزوجته بفترة.. وخلال فترة الهجر يبدأ يرجع وللاسف مانقدر نتفاهم ولا نتوصل الى حل جذري ونجلس 3 شهور ونرجع نختلف لشتى الاسباب منها اعتماده علي بالمصروف وغموضه وكثرة طلعاته والمشكلة ان كل جلساته مع اهله تكون مع شياب وصار متأثر بتفكيرهم ورجعيتهم وكل ماحاولت اتقرب له من جديد واحاول اخليه يركز علينا انا واياه يرجع يذكر لي كل الماضي وغلطات اخواني اللي انا مقرة فيها بس هو مجروح وصار يشوفني فيهم ومو قادر ينساها؟!!!

وللاسف امه لقت من غلطات اخواني نقطة ضعف فيني وصارت بطريقة غير مباشرة تقويه وتكبره علي عشان يزيد هجرانه علم ان ولدها الوحيد وانا والله ماعمري الا اني ابرها واهديها لكن هي مو هاضمتني لاني اجتماعيا وماديا مستوايا افضل منهم بكثير واقول هالكلام فقط لتوضيح الصورة مو للغرور لاني مقتنعة ان الانسان يرتفع بمخافة ربه واخلاقه لكن الغيرة ماخلتها تترك ولدها يتعايش معايا ..

الحين هاجرني لمدة سنة كاملة وانا صاينته بغيبته وكانه حاضر وهالهجر من غير مصروف لا لي ولا لعياله ولا يسأل فيهم وبنتي الصغيرة تعبانة نفسيا تسألني متى بابا يجي انا مشتاقة له.. :06:
الحين انا محتارة هل انهي حياته معاه واشتت عيالي في سبيل اني اتزوج ثاني ممكن يعرف قدري لاني لحد الان اتخطب بكل مناسبة بس قلبي على عيالي وبنفس الوقت العمر يمشي وانا بعذاب معاه وكم مرة اعطيه فرصة عشان يراجع نفسه لكن راسه يابس ومايعترف بالتنازل الا من ناحية الحرمة لانه هو رجااااال وقدره اكبر!! (الرجال قوامون على النساء>بما فضل الله بعضهم على بعض<) م بالتكبر والتجبر.. انا انسانة وعندي غلطات اعترف فيها ومستعدة اغيرها لكن يختلف عني بالتفكير وبيننا فجوة كبيرة بسبب فرق التربية والمستوى لكن بيننا اطفال وصعب اني اشتتهم والاصعب اني اتوصل لداخله ولتفكيره..

وش رايكم يابنات انا مرة محتارة بين عيالي وعمري اللي جالس يمشي وانا بعذاب دائم؟؟
هل اتنازل عن كل شي وان رجع ايش اسوي حتى ارد اعتباري قدامه وقدام الكل؟؟