كح كح من وين طلعت ذي!!
اصلا وشلون عرفت تكتب موضوع جديد؟؟ غريبه مانست مكان ايقونه الاضافه!!!
شكلها دقت على الاداره وعطوها الكروكي
هلا وغلا بكل من شرف موضوعي
داريه ان نصكم يقول هالكلام اللي فوق لكن اروني اشغلتنا الله يشغل العدو
<< ياويلي بس يتعذرون بهالضعيفه هي وأمها
ويحلفون ان رهوفي تاخذ لها دورة بتغيير حفاظتها
وش اخباركم؟؟ وش جديدكم؟؟ وش علومكم؟؟
ابشركم انا نجحت بعد عناء وشقا<< صباح الخير
لكن الحمد لله جبت نسبه وش زينها،، وصدق من قال "من صبّح بوجه موكا جاب العيد"
<< لاتقولين حطمتيني مالي شغل انتي سبب فشلي بالحياة
المهم مالكم بالطويله اكيد انه ضاقت صدوركم يوم قريتوا العنوان
وقلتوا نفديها بأروحنا بس فكوها تقصدون المباحث
بس احب اقولكم لاتضيق صدروكم وتنغثون علشاني
ارجعوا اقروا العنوان زين << ماجابوا خبرك انتي ووجهك
قريتوه زين ؟؟ هاه طيب فهمتوا السالفه؟؟
لايالذكيات من اللي قال انهم بيخلونني فار تجارب ؟؟
لا خطأ .. خلاص انا بقولكم السالفه
في يوم من ايام الصيف المشرقه .. << لاتدققون امسكوا خط
كانت عقارب الساعه تشير الى الخامسه والنصف عصرا في بيت ام تأبط
وبينما تأبوطه منبطحه على بطنها ومطلقه لسيقانها العنان في الهواء الطلق
تتابع برنامج فعاليات الصيف بكل صمت وبراءه << خير؟؟!!
فااااااااااااااااااااااااااااااااصل اعلالالالالالالالالالالالالالاني:
شماليه شرقيه .. جنوبيه غربيه
باحضانك يا اغلى ديرة.. نتهنى بأحلى صيفيه << ماهقيته
المهم لايغركم اهم شي الاخلاق
نرجع لموضوعنا .. ويدق التلفون في جميع ارجاء المنزل
وكالعاده من سوء حظ المتصل ان السنترال دحيم
رد عليه وبدأ بالاخذ والعطاء
من انتي ؟؟وش اسمك؟؟ من تبين؟؟ وش تبين فيها؟؟
الخ من الاسئله التابعه للبثر دحيم
يعني بالعربي ياخذ السيره الشخصيه الخاصه بالمتصل
وقبل لايوصل لمرحله التهور وهي انه يمعط شعر المتصل
أخذت تأبيطه السماعه منهلاتستغربون عادي احنا عندنا السماعه تتوارثها الاجيال
كل مايدق تلفون لازم يسير على كل اللي بالبيت الى السواق والشغاله ياخذون دور
واحيانا يوصل الدور للجيران ويردون على تلفوننا
الـvip<< ايقالي غيرت عن المهم الى الـvip
المهم<< مالي غنى عنها
ردت تأبيطه وكالعاده من الرجه ماعرفت تكون جمله وحده مفيده
وتناديني تأبوطه تعالي بسرعه وحده تبيك على التلفون
انا "وفي اخر انسجام مع التلفزيون": مين؟؟!!
تأبيطه : وحده تبيك من برى السعوديه
أنا: تبيني انا؟؟ انا بأسمي << توحشت بسم الله علي
تأبيطه: لا بس مدري وش تقول تعالي تفاهمي معها
أنا: هاتي السماعه << كل هالهواش والحرمه على الخط
قلت : الو
وتسلم وارد السلام واثرها حرمه عربيه
قالت : معك مركز الابحاث العلميه بهولندا
قلت : طيب؟؟ "يعني اخلصي وش تبين"
<< انبح صوتها امي وهي تقول ماعندك اسلوب يالعربجيه
قالت: الكمبيوتر اختار رقمكم من ضمن مجموعه ارقام
وحابين ناخذ استفتائك انتي ومجموعه اشخاص اعمارهم فوق الـ 17 سنه
من جميع دول العالم من افريقيا واوربا واسيا وامريكا
وافق الكشره واسحب التلفون واحطه بالارض واتربع مانقصني الا شاهي وفصفص
<< راعيه طويله
قلت لها : بالعربي وش السالفه؟
قالت: بنسألك عدة اسئله في كم مجال ونبغاك تجاوبين عليها
عاد انا قلت في نفسي الحين اسئله الاختبارات وانا اذكار لها مافلحت فيها
تبين افلح بأسئله ماذاكرت لها بس يله تفلسفي عليها شوي
ودقي معها حنك وسولفي ووسعي صدرك
عاد محاكيتكم اخذت في نفسها مقلب وصدقت انها موثقفه
قلت لها: ممكن توضحين لي وش هالمجالات ؟؟
قالت : يعني المجال الاجتماعي بدولتك -المجال الاقتصادي
المجال الثقافي- المجال السياسي
هي قالت السياسي من جهه وتلقطني الروعه من جهه وبغيت اصك السماعه بوجهها
ايه بكره يضفونني لغونتانامو
وابدا اهوجس ماشريت لي بجامه برتقاليه هو اكيد عندهم بجايم برتقاليات
بس اخاف مايصير عندهم مقاسي .. تعرفون يعني جسمي وحالتي انتم اخبر بها
بلاش فضايح
المهم قلت لها مو مشكله
يعني عمري خبري به انه 12 بس ماظنيت ان وحده رايحه ثالث ثانوي عمرها 12
لا انا اسمع الناس اذا صاروا بثالث ثانوي يصيرون 17 او 18
ايه يمكن 17 ونص
وبغيت اخر لها سالفتي انا وخالتي واشرح لها ان خالتي تكبرني سنه
لاني كبر ولدها بس ولدها اكبر مني بحوالي 10 شهور
بس خفت تصكني باقرب ماعندها
ويجي السؤال اللي بعده
كم خلصتي من سنه دراسه؟
قلت لها اصبري وابدا اعد باصابعي .. مابقى اصبع ما استخدمته
حتى اصابع رجليني وصلت لها
بغيت استعين باصابع تأبيطه بس ربي ستر وتعوذت من ابليس
قلت بنفسي زين خلصنا سؤالين
قالت:كم عدد افراد عايلتك؟؟ قلت لها مع الشغاله والسواق ولا بدون
<< كان ودي اسألها مع سلاحف رهوفي وسمكها ولا بدون
وجع هي بعد ماتدري اني ادبي تسلطت علي باسئله كلها ارقام
قلت لها لحظه واسأل تأبيطه كم عددنا وتحوسني
قالت : ماتعرف عددكم؟
قلت : الا بس يوم شرفت ارينا حاستني << يعني ماضيق بهالبلد الا هالولد
والله هلكتي بهالاسئله
اخر شي يوم حامت تسبدي بغيت اقولها ضفي وجهك ماصدقت اخلص اختبارات تغثيني باسئله؟
المراد انها يوم جت تصكها بغيت اسألها متى بتطلعونني بالتلفزيون
<< الحين هي تكلمك بالتلفون وتبين تطلعين بالتلفزيون
بس اشوى تعوذت من ابليس عاد وحده تسألني عسى اجوبتك تواجه مافشلتينا؟
قلت لها: والله وانا اجاوب احسها ودها تكفخني
عاد من وسع الوجه جايه مستانسه اقول لابوي وش صار
قام يهوشني يقول يالدبشه يقعدون يصيرون من اللي يسرقون الخطوط
قلت له: عاد رديت وش تبيني اسوي هههههه
بس خلصنا
ـــــــــــــــــــــــــــــ
هذا الموضوع برعاية :
موبايلي http://alaincard.com/up/upload/wh_650746754.jpg
كل من طرى على بالي اتصل عليه من موبايلي << مهوب من موبايل امي<< ياملصلك
ببسي http://alaincard.com/up/upload/wh_835899957.jpg
اقحن الين تقول بس اهم شي تروي عطشك
بنادول http://alaincard.com/up/upload/wh_674983905.jpg
لا بغيتي تقرين مواضيع تأبوطه وامها ازرطي منه بالكرتون
ــــــــــــــــــــــــ