امل قريب @aml_kryb

كبيرة محررات

الحقوني فطور عرفة بياخذه زوجي للعمل..ساعدوني وش اسوي

السلام عليكم

اول شي العشر مباركة
وكل عام وانتوا بخير

خواتي
يوم عرفة ان شاء الله زوجي قال لي ان الفطور بياخذه للعمل بيفطر مع اصحابه

المشكلة انه يطلع للعمل من 2 ونص الظهر يعني بيقعد الاكل ساعتين وزيادة على المغرب مايجي

وهالساعتين بيبرد الاكل خصوصا مافيه حافظات صاحية تحفظ لهالوقت وزيادة على كذا الجو بارد

وش الاكلات اللي اسويها ومايضيع طعمها لو صارت دافيه او بردت شوي ؟؟؟؟؟

ووش تقترحون المنيو وياليت طريقة الاكلات لو صار فيها شي غريب ؟؟؟؟؟

ووش احط مع القهوة؟؟؟؟؟

وكيف اعطيه الاكل؟؟

حافظات والا كيف؟؟؟؟؟؟؟

ووش احط مع الاكل من اواني واغراض؟؟؟؟؟

ابيه يبيض وجهه

اول مرة اطيح بهالموقف فاستحملوني
وعطوني من خبراتكم

وابي رايكم

ودي اسوي لهم مرقوق مع الفطور يدفيهم بهالبرد
تهقون بيبرد بالحافظة؟؟؟؟؟؟؟؟

وافكر اسوي اقماع التورتيلا بفاهيتا الدجاج لـ حلاها في حياها
بس اخاف احطها بحافظة ويلزق الخبز مع بعض اذا عرقت الحافظة
واخاف احطها بصحن تجمد
وش السواة؟؟؟؟؟؟؟؟
<<<<<<<<<<<<<<<<<<<مهيب راقدة الليلة:44:

11K

يلزم عليك تسجيل الدخول أولًا لكتابة تعليق.

تسجيل دخول

_الغلا_ • 16 سنة

الله يعينك إن شاالله ...

حبيبتي سوي له معجنات مشكله وبيتزا بعجينة العشر دقايق لإن كميتها كثيره

وتقدرين تسوين منها كذا نوع ... وانا اشوف لو تسوين معجناتك من اليل وطلعيها من الفرن

وحطيها ببلاستيك وعلى الفريزر على طووول ومن بكره طلعيها قبل بوقت عشان يفك

الثلج منها وبعدين سخنيها في الميكرويف وحطيها في صواني التقديم وغطيها بقصدير ...

والقهوه سوي جبنيه اسهل منها مافيه اعجينيها بدري واقليها وخليها على جنب وقبل لا يروح

زوجك حطي عليها عسل وغلفيها بس خرمي التغليف عشان ماتذبل ...

امممممم هذا اللي اذكره الحين وإن شاالله البنات مايقصرون ..

امل قريب • 16 سنة

الله يرضى عليك يالـ الغلا
بس اخاف اخبز الفطاير من الليل يبين انها بايته ومو طازة
مشكورة الله يسعدك

وينكم بنات؟؟؟؟؟؟
ابي اعرف وش اسوي عشان اروح السوبر ماركت اذا فيه نواقص

كوكو أخت خوخو • 16 سنة

سوي لهم سمبوسة هندية مره روعه وخذيها من المنتدى صدقيني رح تطلع رررررووووعه
والمرقوق إذا سويتيه سويه في حافظة ووأعطيه قدر يسخن المرقوق إذا جاء وقت المغرب
ولقيمات سويها في أي صحن وغلفيه بالبلاستيك
صينية خضار
جبنيه
بقشة العروس
وأي طريقة بالتوست لانه مايخرب
بسبوسة
كنافه
سلطه
كشري
وجيبي صحون سفري وغلاف بلاستيك وقصدير
وسوي قهوه وشاي بالنعناع

والله أنا وخواتي قعدنا نفكر وطلعنا لك بهالأفكار وأي سؤال احنا حاضرين

شروق المعالي • 16 سنة

الفطاير ماتبان لان بتروح على الفريزاسالي مجربه
واذا عندك حافظه كبيره وضامنه انها بتجلس دافي الاكل فيها صلحي لهم مرقوق لانه يشبع

ياليتك جارتي كان خدمتك من عيوني

أبغى هدوء • 16 سنة

ياقلبي إذا خايفة الأكل يبرد وهو بالحافظةلفي الحافظة بفوطة كبيرة ودخليهم بكيس كبير واربطيهم..

حتى ترامس القهوة والشاي لفي كل وحدة بفوطة واربطيها بكيس وترى الكيس عشان ماتقعد الفوطة تطيح كل شوي ويصير كنك يابوزيد ماغزيت!!

أنا مجربه هالطريقة والله إني من 3 إلا ربع العصر حاطه قهوتي بالترمس ولفيتها بفوطة ويوم أذن المغرب كأني توني حاطتها بالترمس..ماشاء الله..

وانتبهي تسوين الشاهي من هالوقت يسود لونه ويمتر طعمه..

سوي لهم بالترمس مويه حارة وسكر إذا حبيتي أو حطي السكر على جنب كل واحد يحلي بقد مايبي..

وعطيهم تعليقات لبتون يحطها زوجك بالترمس إذا أذن المغرب..

سوي لهم زنجبيل لو حبيتي لأنه مرغوب بالبرد..

ولو حابه بدل ماتكثرين خرابيط سوي لهم أكله تنفع مع الزنجبيل من أكلات البرد..

إما حنيني أو محلى أو مراصيع ..

وترى الحنيني القصيمي يمديك تسوينه قبل بيوم وتحطينه بالثلاجة ويوم الفطور حطيه بقدر وحطي تحته الحدية اللي تنحط تحت القدور عشان ماينحرق الأكل وسخنيه على نار هاديه مرة وانتبهي له عشان مايحترق كل شوي قلبيه وإذا سخن مرة حطيه بحافظة..

ولاتسخنين الحنيني بالمايكرويف ماينفع ينشفه ويغير طعمه..

و نصيحة لاتسوين فطائر ومعجنات ..

سوي لهم مافن لأنه مرغوب وماتشيلين همه إنه يبرد..

غير إنك تقدرين تسوينه قبل بيوم وبيكون أفضل لتماسكه بعد..يعني 2×1..

ومع القهوة سوي معمول لأنك تقدرين تجهزينه قبل بيوم وغير كذا مرغوب ومايحتاج حافظات..

انتبهي لا تسوين شي مقلي لأن المقلي حلاته حار إذا برد يصير طعمه مو حلو غير إنه بيكون مكتوم يعني مرة ماراح ينفع..

وإذا خايفة أي أكله داخل الحافظة تتعجن غطي وجه الحافظة بفوطة رهيفه بيضاء وبعدين اكبسي الغطاء هالطريقة مرة حلوة وزود تساعد في حفظ الحرارة زيادة..

يعني المنيو المقترح مني..

ترامس قهوة وشاي وزنجبيل..

معمول بالتمر..مع القهوة..

مافن ..مع الشاي..

حنيني أو محلى ..مع الزنجبيل..

ويحدرونه بالعافية..

حطيت نفسي مكانك ومالقيت نفسي بسوي غير كذا..

انتبهي تضيعين يوم عرفة بالمطبخ تراه يوم بالسنة..

استخيري وسوي اللي قلت لك بتكونين بيوم عرفة مابقى لك إلا تجهيز الترامس..

الله ييسر أمرك وكل مسلم..

وطمنينا يالغلا..