شعرك خفيف
شعرك مقصف
شعرك ضعيف
الشعراية رفيعة ومش تخينة (مش متغذية يعني)
القشرة
شعرك مش بيطول
****
يا جماعة انا مش دكتورة ولا حاجة بس بجد دي حاجة طبيعية جدا وجربتها
وكل واحدة أقولها على الوصفة دي ترجعلي بشعرها بسم الله ما شاء الله أروع من الأول بكتير
هي الحنة
الحنة؟؟ ما كلنا بنحط حنة مش بنلاحظ الفرق ده ليه؟؟
أقولكوا
لأني بحط الخلطة السرية بتاعتي
واللي فيها كل المكونات اللي كل واحدة فيهم تحل مشكلة من مشاكل الشعر
وكمان لازم جدول معين تمشوا عليه عشان الشعر يبان فيه الفرق
تعالوا بقى شوفوا الخلطة السرية بتاعتي
وكمان لازم جدول معين تمشوا عليه عشان الشعر يبان فيه الفرق
تعالوا بقى شوفوا الخلطة السرية بتاعتي
****
أولا الحنة لازم يتحط عليها ميا دافية عشان تخمر
انا بعمل إيه بقى قبل ماضيف الميا؟
بحط عليها شوية إضافات قبل ماحطها على النار
الإضافات دي كالآتي
حلبة حصا (حوالي 100 جرام) أو ملعقتين كبار
حبة البركة (100 جرام برضه أو ملعقتين كبار)
تلات فصوص توم كبار مشقوقين من النص (مش لازم تقشريهم)
قشر بصل أحمر
كركديه (تلات ملاعق كبيرة)
شاي (ملعقتين كبار)
حاجة اسمها مريمية أو مرمرية بتتجاب من العطار (كبشة بإيدك كده D : )
كل دول بيتحطوا في ميا على أدّهم
يعني حوالي كبايتين ميا بس أو يادوب يغطوهم في الحلة يعني
المهم تسيبي الميا تغلي على الهادي كده عشان كل المكونات تطلع فايدتها في الميا
ولما تغلي اطفي عليها واستني شوية لما تبقى دافية
وحطيها على الحنة (حسب طول شعرك)
وانت بتحطي الميا لازم تاخدي بالك ماتسيحيش الحنة أوي
جربي تصفي ربع كوباية وتقلبي وتضيفي حسب ماهتحتاج الحنة
لحد ماتلاقيها زي قوام الباشاميل كده (مش تقيلة أوي ومش سائلة أوي)
الميا دي بقى تتظبط بس مش دلوقتي
يعني في الأول تضيفي نص كوب ميا تمام؟
وتقلبي كويس بحيث الحنة ماتبقاش مكلكعة
وبعدين تضيفي على الحنة بيضة ونص كوب زبادي وملعقة عسل كبيرة
وتقلبي الخليط ده كويس
لو لقيتي الحنة تقيلة محتاجة الميا الدافية بتاعتها ضيفي حاجة بسيطة وقلبي
وبعدين غطي عليها وسيبيها تخمر للصبح (على أساس انك عاملاها بالليل يعني)
والصبح بقى تصحي تحطيها
لو شعرك دهني سيبي الحنة من 4 ساعات لـ 8 ساعات براحتك
لو شعرك جاف ماتسيبيش الحنة أكتر من ساعتين إطلاقا
لو شعرك عادي سيبيها على شعرك من ساعة لتلاتة
دي بقى لو عملتيها كل شهر ماقدرش أقول شعرك هيبقى حلو ازاي
حبة البركة فوائدها كتيرة للشعر مغذية جدا هي والبيض والزبادي
الحلبة بتخن الشعرة وتلمعها مع بياض البيض
العسل مفيد جدا وبيطري الشعر وينعمه
التوم بينضف الشعر من القشرة
قشر البصل والكركديه والشاي لإعطائه لون احمر خفيف مش بيبان أوي يعني
المرمرية مفيدة جدا للشعر وتغذيته
في النهاية لو حابين تضيفوا للحنة موز مهروس برضه حلو ومغذي للشعر
وبالشفا إن شاء الله
****
أتمنى يكون الموضوع أفادكوا أو هيفيدكوا إن شاء الله
بجد جربوها وثقوا فية إن شاء الله مشاكل الشعر تتحل
****
ملحوظة: بعد الانتهاء من الحنة يغسل الشعر بالماء الفاتر فقط دون شامبو
وتوضع الحنة بالجوانتي الخاص حسب مقاس يديك
لأن الحنة بتعمل لون على اليد زي مانتو عارفين
الشعر الأصفر أو البني الفاتح لا يضع المكونات الملونة
لأن الحنة هيتغير لون شعرهن لأن يتعطي ظل بني محمر نوعا ما
أنا عن نفسي بحب الظل ده جدا لأنه مناب للون شعري لكن غير مناسب للشقراوات
تشكري يا امورة ولو اني ناوية عالصبغة :27: