الحمام الملكي مع خلطات التبييض تعالي شوفي واحكمي

السلام عليكم

شلونكم بنات حواء الحلوات ان شاءالله بخير وعافيه

راح اكتب لكم في موضوعي هذا عن طريقة الحمام الملكي ( طبعا انا سميته ملكي ) :)

طبعا الحمام هذا طبيعي ونظيف وكل مكوناته طبيعيه ويصلح حق كل انواع البشره

طبعا النتيجه راح تكون مذهله ورهيبه بس مع الاستمرار على الاقل بالاسبوع مره

انا مراح امدح واكتب كلام حلووو عن طريقة حمامي لان الزين يفرض نفسه ومبين من طريقته ومكوناته

انا اسوي هالطريقه مره كل اسبوع وجسمي ابيض ولون واحد وزبده وناعم يتزلق

بس عندي مشكله بسيطه والا اهي منطقة بين الفخوذ منطقه غامجه شوي بنيه لأني مليانه شوي من تحت .. جسمي حلو ورشيقه بس من تحت مليانه فخوذ ومؤخره .. جسمي جنه عرموطه من فوق ضعيفه ومن تحت مليانه وحتى لو سويت ريجيم مايتغير شي من تحت بس وجهي يضعف هههههههه بس كلن يشوف جسمي يقول فظيييع .. المهم وماخليت شي وماسويته حق سواد بين الفخوذ بس مانفع :(

مثل ما انتو عارفين منطقة بين الفخوذ ماينفع معاها الفرك .. لازم كريم خاص او خلطه او تدليك بسيط بالسنفره

احس كل يوم قام يخف السواد لين وصلت لدرجه غامجه وناويه اخليها مثل لون جسمي

قريت خلطه ناويه اجربها ان شاءالله تتكون من ريتن ودوكين وجمعت اغراضها بس باقي الفاهيدروكسيد ماحصلته !

المهم ارجع لموضوعي الخاص واهو خطوات طريقتي للحمام الملكي مع خلطات التبييض

1-اغسل شعري بالشامبو واحط حمام زيت وألبس الكيس

2-ابلل جسمي واطلع عن الماي وافتح البخار( سواء بخار الحنفيه الحار او جهاز البخار) وادهن جسمي كله بالصابون المغربي ( أي نوع عادي ) واخليه مدة 10 دقايق او ربع ساعه وبعدين اغسله بدون تفريك

3- اجيب ليفة الصابون المغربي الخشنه او ليفة بودي شوب مع ليفة الظهر ام عصايه وافرك جسمي كله وراح تطلع الوصاخه كلها بعدين اغسل جسمي

4- بعدين اضع خلطة رقم 1 تتكون من ( 3 ملاعق حليب بودره + 3 ملاعق هرده + 4 ملاعق سنفرة للجسم يفضل المشمش +عصير ليمونه كامله + شوية ماي ورد لين تتماسك الخلطه ) هاذي الخلط اسويها بوقتها قبل الحمام بدقايق واستخدمها في وقتها وافتح البخار واخليها مدة 10 دقايق او ربع ساعه بعدين اغسلها بدون تفريك

6-بعدين اضع خلطه رقم 2 وتتكون من ( 3 ملاعق حمص مطحون + 3 ملاعق اكسجين بودره + 4 ملاعق سنفرة للجسم + عصير ليمونه ) واخلطهم قبل الحمام واستخدمها في وقتها وافتح البخار مدة 10 دقايق او ربع ساعه وبعدين اغسلها بدون تفكريك وبعدين اغسلها

7-افرك جسمي كله ب سيفداب الحجر الابيض من غير تذويب بالماي ( تمسكين الصخره الوحده وتفركين فيها الجسم لين تذوب تخلص وتمسكين الثانيه وبعدين الثالثه لين تفركين الجسم كله وبعدين تشطفينه بالماي

8-بعدين تحطين الشاور جل العادي وتغسلين شعرج من حمام الزيت

9-وتنشفين جسمج عدل من فوق لين رجولج لان الماي اذا خليتيه وماتنشفتي عدل راح تصيرين سوده

10-بعدين تحطين خلطه رقم 3 تتكون من : نقطه بكف ايدك من مسك العروسه وفوقها كميه من لوشن جرجنز او أي لوشن للجسم وتخلطين باصبعك وتمسحين جسمج كله وبين فخوذج وتحت اباطج وتحت صدرج ( مسك العروس نقطه بس وتكثرين كمية اللوشن لان مسك العروس فواح وكثرته مو زينه )

11-وتلبسين ملابسج وتنشفين شعرج وتمسحين مسحه عليه شوي من مسك العروسه وتتبخرين وسلامتكم

لاتنسين تحافظين على جسمج بالترطيب وتدهنينه باللوشن دايما عشان مع الوقت يصير ابيض

ورجولج افركيهم بسنفرة المشمش او حطي شويه من خلطة رقم 1 على رجولج وافركيهم من تحت بالصخره السوده ونشفيهم وادهنيهم بكريم 21 البرتقالي والبسي دلاقات ( جوارب ) وشوفي النعومه وراح يصيرون ورديات

حمام الهنا :)

ملاحظه : تقدرين تستغنين عن وحده من الخلطتين (خلطه رقم 1 ) أو ( خلطه رقم 2 ) يعني مو لازم الخلطتين مع بعض اذا كنتي كسوله

وحده منهم تكفي واذا سويتهم ثنتين احلى واحلى خصوصا اذا عندج مناسبه او عرس وتطولين بالحمام

والخلطات لازم تسوينهم بمواعين بلاستيك ... تجهزين كل خلطه بماعون بروحها بلاستيك وتخلطينها بملعقه بلاستيك وتدخلينهم معاج بالحمام تحطينهم على الرف


بنات والله اني كتبت هالخطوات والخلطات من تجربتي وشفت نتيجه حلوه مع الاستمرار طبعاً

وانا استفدت من هالمنتدى كثير ومن متابعيه من 3 سنوات او اكثر وحبيت افيدكم ولو بشي بسيط

تكفوووون ابيكم تدعولي من قلب ... مو شرط تردين علي ... وانتي تقرين ادعيلي من قلبج

ابيكم تدعولي ان الله يرزقني الرجل الصالح ويزوجني اللي في بالي يارب

واتوقع كل شي واضح

ع العموم أي سؤال انا حاضره

:)