السلام عليكم ورحمة الله وبركاته ... أشكر كل وحده دعت لأهل جده والله بجد كـُـنــا محتاجيــــــــــــن الدعاء
أبدأ قصتي مع معاناتي أنا وزوجي وأولادي في السيول صحيت بناتي الفجر عشان يصلون ويروحوا الاختبار
وكان الجو والله فيه غيوم بس ما توقعت يكون أمطار وقلت لو مو الاختبار ماكان خليتهم يروحون المدرسه
المهم استودعتهم الله وقلت لهم تحصنوا واذكروا الله وراحوا المدرسه وكنت مقرره في هذا اليوم اني اروح عند أمي زي كل أربعاء .... وجاءت الساعه الي أبوهم بيجيهم للمدرسه يعني بيروح يجيب البنات من المدرسه وبعدين صحيته وقلت روح لبنات بسرعه قبل لا يزيد المطر وكانت بداية مطر خفيف مو هتان أبد وسبحان قلت له أبغى أخرج معاك قل لي خلاص أخرجي معانا وخرجنا روحنا نجيب بنتي الي في المتوسط والحمد لله وصلنا وكانت المطر لسه في بدايتها كانت شبه غزيره وبعدين روحنا نجيب بناتي الي في الثانوي وأول ما وصلنا عندهم زادت المطر وصارت كثير وتخيلوا أن مدرسة بنتي الي في المتوسط بعيده عن الي في الثانوي المهم وصلنا عندهم والمطر كانت كثير وطلعوا السياره وهم ميتيـــــــــن خووووف وقالوا لي حنا ياماما حاولنا نتصل جوال على أبونا بس مارضيوا لنا نتصل قالوا جوال مافي ...المهم مشينا على اساس رايحين عند أمي وحنا ماشيين كانت صوت صواعق ورعوووود وطبعا مطر كثيــــــف واللله لدرجة ما نشوف شيء من القزاز حق السياره وأنا كل شوي وأمسح القزاز الي قدام خايفه يصير لنا حادث
وحنا ماشيين بالسياره رايحين عند أمي دخلنا لسه تحت الكوبري عشان الشارع العام كان مليااان مويه دخلنا وكان فيه تحت الكوبري مويه بس نقدر نمر منها المهم مشينا وشوي قال لنا الشرطي وقفوا هنا لان ماتقدر تكمل الطريق السيل جاي من هنا وكمان معاك عايله يعني لا تغامر أبد لوكنت لوحدك تقدر تروح بس معاك عيله ووقف زوجي طلع شوي عالرصيف >>يعني رفع شوي السياره عشان السيل مايدخل السياره المهم وقفنا تحت الكوبري من الساعه 11 تقريبًــا إلى الساعه 1 بعد الظهر وكان عندنا أمل توقف المطر لكن ما وقفت وصايره تزيد أكثر و أكثر والمويه حق السيل صايره تزيد والله السياره وحنا جالسين فيها سامعين صوت المويه كانت بدفع قوي مررررررره وكانوا عيالي يبكون خايفين وولدي الصغير عمره سنه كان يبكي بكاء مو طبيعي خايف ولما أبوه خرج من السياره عشان يكلم الشرطي يدبر لنا أي سياره أكبر من سيارتنا عشان نقدر نروح وإلا ابني الصغير يبكي زياده يوم شاف أبوه نازل من السياره والمويه تحته قام يصرخ بــابـــا بـــابــا والله الولد شوي ويتشنج من الخوف وعيالي الثانييين خايفيين ويقولون خلاص ماما ماأحنا قادرين نبي نروح الحمام وأنادي أبوهم تعال دبر أي صرفه خلنا نخرج من هــِنـــا خلاص السيل يزيد أكثر قال لي كيف؟؟؟ما أقدر أروح أي مكان ثاني وشوي اتصل عليه أخوي ويقوله فين أنتم يمكن أقدر أجيكم ؟؟قال له لاتغامر ماتقدر توصلنا وكلمته قلي وين أنتم قلت له حنا قريب من البيت حقكم قال خلاص بكون قدها وبجيكم قلت له لاتغامر ماتقدر وقفل وشوي كذا اتصل قال وقفت في وسط الطريق وما أقدر أجيكم قلت له الله يهديك أنا كلمتك من الاول وبعدين الحمدلله قدر يرجع للبيت وإحنا ما زلنا تحت الكوبري وشوي راحت السياره حق الشرطي الي كان واقف ومنتظر معنا وكم سياره جنبنا وقلت له شايف هذا الي قالك أنتظر راح وخلانا المهم قلنا له اسمع توكل على الله وامشي أقلها أطلع فوق الكوبري المهم بعيد عن السيل ومشينا وإحنا فوق الكوبري أشوف الجهة الثانيه فيها مويه يعني السيل حتى فوق الكوبري يالله والله أنا وعيالي كــُنا خايفين وزوجي متوتر مو عارف فين يروح المهم وخرجنا من الكوبري وكل ما شفنا سيل مشينا من طريق وروحنا طريق ثانيه شوي وصرنا في مدينة الملك فهد الساحليه وبالله طابور سيارات والمطر كل شوي وتزيد وكمان حبات الطر كانت كبيره تجي عالسياره قويه مررره وكل شويه نشوف سيارات ترجع من جديد ونحن منتظرين في الطابور المهم طبعا أمي كل شوي وتتصل علي وينكم ؟؟؟ متى بتوصلون؟؟ قلت لها أدعيلنا اللله يسهلنا .. وشوي أقفل من أمي تتصل أختي من مكه وينكم ؟؟ متى بتوصلون؟؟؟ قلت ادعيلنا العلم عند اللله وبناتي خايفين ويبون يروحون الحمام تخيلوا مادخلوا الحمام من الفجر صاير الساعه 2ونص تقريبا وشوي أخوي يتصل ويقول لي بعد صلاة العصر تقريبا بيجي سيل من قويزه تحركوا روحوا أي مكان المهم بعيد عن الساحليه وقلت لزوجي اطلع فوق الرصيف لا تنتظر الطابور لان بدون فايده ورجعنا مره ثانيه ونحنا ندعي يارب لا يجي السيل واذن العصر وأحنا نحوس من مكان لمكان المهم زوجي يقول اش رايكم نروح جهت ؟؟؟؟؟؟؟؟؟؟؟أبو شقراء صرخت فيه وقلت له أنت ماتفهم أقولك أخوي يقول السيل جاي و؟؟؟أنت تبغى تودينا جهة أبو شقراء >>>ابو شقراء مقابل البحر
المهم مشينا لين وصلنا الحمراء وروحنا المسجد بعد معاناة عشان عيالي يبون الحمام الله يكرمك دخلنا وإحنا رايحين مصلى النساء لقيناه مقفل تخيلوا مايفتح إلا يوم الجمعه بس قام قال زوجي ادخلوا في حمامات الرجال طبعا كان وقتها مافي رجال الحمدلله المهم دخلنا وزوجي منتظرنا عند الحمام والحمد لله خلصنا من الحمام وكانت السعه 4ونص تقريبا المهم صلينا العصر والظهر طبعا ومشينا بالسياره وما إحنا عارفين فين نروح وشوي أحنا عند الرويس والدنيا هناك مليان مويه داخل الفلل وبعض الفلل بابها تكسر والناس مويتها عندهم للدور الأول داخله ومشينا لين لقينه ساحه مرتفعه عن السيل وقفنا فوقها وجلسنا فيها لأذن المغرب وإحنا لسه في نفس المكان شوي كذا تتصل أختي وتقول فينكم قلت لها في الرويس قالت: المهم شوفت في الأخبار سد ام الخير أنفجر في جده وشوي كمان إحتمال أمطار مره ثانيه قفلت منها وخلاص حاسه بطني توجعني وبطلع الله يكرمكم المهم زوجي ماكان عندنا في السياره كان من الجهة الثانيه من الساحه يشوف وضع المويه قال لي لمويه وقفت سيارات كبار والله شيء يخووووف مره قلت له أسمع المهم قالوا لي اهلي إحتمال أمطار تجي على العشاء وما بقي على صلاة العشاء شيء دبر مكان نجلس فيه وإحنا خارجين من الساحه أشوف السيل لسه ماخف قال لي زوجي شوفي خف والله السيارات الصغار تقدر تمشي فيه وسيارتنا كبيره يعني نقدر إن شاء الله نمشي ..قلت له:خلاص توكل على الله وأنزل نزلنا والناس كانت تدعي لنا ومشينا والله كابلات الكهرباء نزلت من مكانها وناس سياراتهم وقفت في وسط المويهتخيلوا مع ان سياراتهم جديده بس ماتحملت والله كنا خايفين يصير شيء في سيارتنا مشينا كنا رايحين طريق المدينه لكن السيل كان مرتفع ولف زوجي جنب فندق الحمراء سوفتيل ومره ثانيه طابور سيارات طبعا ونحنا منتظرين المهم كنا بعد عن اسيل لأن كان مرتفع عن السيل جاء واحد من الرجال قال لزوجي لاتنتظر الطابور الي قدامك اصحابهم تركوا سياراتهم لان ما في امل إنهم يخرجوا من هـِنا طبعا رجعنا مره ثانيه ومشينا من طريق ثانيه نبي نمر ندخل جوه في الحاره وراء الفندق مشينا والمويه دفعها قوي مره والناس كلهم واقفين خارج سياراتهم ودخلنا من الجهة الثانيه وروحنا نسال في الفنادق والشقق قالوا لنا مافي الدنيا كلها مليانه ودوورنا من مكان لمكان على أمل نحصل ما لقينا مكان وأتصل ابن عم زوجي وقال لزوجي فينكم وين وصلتوا قال له والله حايسيين ما لقينا مكان قاللزوجي: والله سيارتي وقفت في السيول وروحت مشي وسبتها وقل له طمني وشوي اتصل ابن خاله قال له وينك؟؟والله ابوي خايف عليكم وقال له كلمه والله ضغطه ارتفع>>هو أصلا عنده الضغط كلم زوجي وأطمن علينا وصار يدعي لنا وأمي تتصل بجوالي وتكلمني وخلاص شوي وتبكي والله ما هي قادره تتحمل ..أش تسوي ..مشينا نلفلف الشوارع لين لقينا بيت الله (المسجد) طلعان وكانت الساعه 11 باللليل تخيلوا بناتي بالمراييل وما غيروا ملابسهم المهم قال لي زوجي مافي غير هذا المكان كل ما رحنا مكان مالقينا مكان نجلس فيه غير المسجد والشوارع مقفله كمان طلعنا المسجد وبدلوا البنات مراييلهم وقضوا حاجتهم من الحمام الله يكرمك وطلعنا فوق المصلى بعدين يوم دخلنا كانت في حوالي أربع حريم أو خمسه وطفل عمره زي ولدي سنه و3شهور تقريبا جلس ولدي يلعب هو وياه وجلست أتكلم معي الحريم وكل وحده تحكي قصتها لي المهم وحده كويتيه قالت لي حنا جينا من الكويت سوينا عمره وبعدين مرينا على جده وأستأجرنا سياره وسواق قالت والله السيل كان بيجرفهم والحمدلله ربنا ستر علينا وقدرنا نتفادى الموقف وطلعنا المسجد هـِـنا تخيلوا سألتها جيتي جده قبل كذا ؟؟قالت: للأسف أول مره أجي ؟؟؟ وقالت :حصل مره في الكويت زي كذا لكن الحمد لله تصرفوا وتعاملوا مع الوضع .. ووحده ثانيه سعوديه موظفه قالت:وإحنا في السياره جاء السيل والسياره حقنا صغيره دخلت المويه فيها ووصلت تقريبا لرقبتي وكنت في السياره أنا وزوجي وشغالتي وجاء الدفاع المدني وساعدنا والحمدلله..والثالثه تقول :تفرقت هي وزوجها وعيالها كل واحد فيهم راح في سياره ولكن الحمد لله أجتمعوا مره ثانيه في المسجد.. وجلسنا في المسجد من الساعه11 الى مابعد صلاة الفجر المهم الحمدلله الناس ماقصرت جابوا لنا البطانيات والاكل والرب يعني ضيفونا وكمان قهوه وتمر الحمد لله المهم الساعه 3 وربع أو نص قال لي زوجي يالله خلينا نروح قلت له كيف؟؟ الدنيا ظلام مانقدر ..قال :نحاول ان شاء اللله نقدر وخرجنا .....الطرق مقفله وطريق المدينه غرقان والسيارات غارقه بوسطه طبعا رجعنا مره ثانيه المسجد وسألوني الحريم أش الوضع بره قلت لهم مايساعد الواحد يمشي بالليل والشوارع كمان مقفله ..شوي وحده طلعت هي وشغالتها ومها بنتيين صغار وحده 7شهور تقربيا والثانيه حوالي 1 أو اقل بشوي طلعت وعباتها مبلله وملابسها قلت لها:من وين جايه قالت:والله من طريق الملك ..والدنيا غارقه هناك ونحنا في النسيم والنسيم كمان غرقان شوي وزوجها ينادي يالله أخرجي بنروح ؟؟ قلت لها كيف بتروحون والدنيا برى غرقانه ؟؟قالت: مادري كيف ؟؟وكمان عباتي مبلله وراحت وقالت أدعولي بالسلامه ...المهم بناتي ناموا شوي حق ساعه أو أقل وأنا ماني قادره أنام أبداً من القلق . شوي زوجي اتصل علي وقال لي الملك خلى الفنادق والشقق ببلاش ..قلت له: إحنا لقينا بفلوس عشان نلاقي ببلاش.>>>تخيلوا الفندق الي رحناه كان مليان قالوا الاكل فيه خلص والناس مليانه لدرجة الاستقبال صاير مافيه مكان .
أذن الفجر صلوا الحمدلله وتحصنا واتصل أخوي وقال :وينكم ؟؟؟؟؟قلت :في بيت الله .قال خلاص إجيكم بعد صلاة الفجر>>طبعا هو سيارته ماشاء الله أكبر من حق زوجي يعني إن شاء الله نقدر نمشي .المهم نزلنا من المسجد بعد الصلاة حق الفجر وروحنا سيارتنا وكلمت زوجي إن أخوي جاي يأخذنا وأنتظرناه الحمدلله ما تأخر جاء بسرعه وطلعنا معاه في السياره والله يهديه زوجي رفض يجي معانا في السياره وقال كأنا أمشي وراكم بسيارتي وماراح أسيب السياره هـــِنا لايصير شيء فيها وبعد معاناة مارضي أتبد قال لي أخوي: عادي أنا أخليه يمشي معانا وفي طريق مافيه لاسيل ولا غيره اطمني.... ومشينا الحمدلله وكانت عيني في المرايه حق السياره أراقب زوجي وأحنا في الطريق أشوف المدارس مفتوحه لان شكله كان لسه فيها أحد مشينا وكأننا ما احنا في جده وروحت عندي أمي واحنا نازلين من السياره قال لي زوجي يالله أنا رايح الدوام قمنا كلنا أنا وبناتي وين رايح قال الدوام ..قلنا له طريق المدينه مقفل... شوي قال:أمزح لاتصدقووون.وطلعنا العماره وسجدنا الحمدلله سجود شكر قبل أطلع لأمي وطلعنا عندها وسلمت عليها وصرت أبكي ماصدقت إني وصلت وخلاص هي فرحانه مررررره
همسا الليل @hmsa_allyl
محررة فضية
يلزم عليك تسجيل الدخول أولًا لكتابة تعليق.
جوى الحب الاول
•
الحمدلله على سلامتكم ..
الصفحة الأخيرة