الشك بيقضي على حياتي

السلام عليكم جميعا .... كيفكم

انا ببداء بالموضوع على طول ....... هو مو موضوع هي مشكله اتمني تساعدوني فيها

انا متزوجه من سنتين. ومن بدايه زواجنا اكتشفت ان زوجي يكلم بنات .. طبعا كنت توي في بدايه زواجي بصراحه انصدمت مررررره ... بس جلست ابكي ولا ناقشته بالموضوع قلت توي عروس وما حبيت اسوي مشاكل من البدايه..
وبعدها بفتره صرت الاحظ ان زوجي يطلع من الشقه ويروح يجلس بالسياره وبرضه سكت ... وبعدين شراء جهاز جوالي ثاني ويوم سالته قال للشغل وبرضه سكت .... بس والله العظيم اني كنت اتعذب ...

لحد ماجاء يوم وواجهته بكل شي وقلت له اني كنت اعرف من زمان انه يكلم بنات ولما نطلع نتمشى يشغل بلوتوثه ويحط رقم جواله ...واجهته بكل شي وقام وتاسف ووعدني انه ماراح يعيدها

وبعدين اكتشفت ان عنده ايميل ثاني وسكت لحد ما فتحت سجل المحادثات ولقيته يقول لوحده ان جواله انسرق وكلميني ع الماسنجر لحد ما اشتري شريحه جديده

...... هنا انا انفجرت وسويت مناحه ذاك اليوم وواجهته وهو سكت مارد علي .. وبعدين قالي انه هو من نفسه باع الجوال( وانا صدقته لانه ارسلي الرصيد اللي في شريحته ) لانه قرر انه يبطل هالحركات وانه بس حاول يصرف البنت لان الشباب اللي معاه بالعمل هما اللي اعطوه الايميل حقه ....المهم انا حسيت انه صادق هذي المره

صدقته والحمد لله احس انه اتغير واحسن من اول بكثير ......اللهم لك الحمد والشكر

بس المشكله الحين فيه انا .. صرت اشك في كل تصرفاته .. لما يطلع ادق عليه واساله وينك . لما نطلع نتمشى ولا نروح المجمعات اشغل بلوتوثي عشان اشوف هوه مشغل بلوتوثه ولا لا ... لما يطلع ويتاخر في السياره اساله ليش كنت في السياره ... بصراحه تعبت مررررررررره ونفسيتي مره تعبانه وهو دايم يقولي بطلي حركات التجسس هذي .. بس مو بيدي والله غصبا عني لانه صدمني من بدايه زواجنا
واليوم حصل مشكله لانه قالي انه بيروح عند جارنا في الخيمه اللي جنبنا .. ويوم طلع رحت من الشباك اناظر لقيته اخذ السيار ه وراح مع ان الخيمه جنبنا ما يحتاج سياره ..دقيت عليه وينك ؟ قال عند جارنا قلت متاكد قال ايه فيه شي قلت لا مع السلامه

ويوم جاء سالته ليش تكذب علي وتقول بتروح عند جارنا قال رحت جبت اغراض الشاي من البقاله ورجعت عنده

وحلف لي ان هذا اللي صار ...وزعل علي يقول انا عارف انك تناظرين من الشباك تراقبيني .. وهو الحين زعلان مني ولا يكلمني

الله يخليكم اعطوني حل لمشكلتي تعببببببببببببت .. حياتي صارت كلها شك