انا يابتنفقع مرارتي يابتنفقع مرارتي اكيد
امس كنت جالسة في الباص وجات وحدة من بنات الباص كاشفة وجها انا استغربت منها لاني اعرف انها تغطي وهي انسانة كويسة
المهم ماقدرت اسكت ومااسألها اش الطاري ؟>> يعني ماابى تجي في بالي اشياء سيئة عنها
وكان سؤالي لها انتي تكشفين ؟ قالت على حسب متى ماابغا اكشف ومتى ماابغى اغطي
مافهمت عليها قمت قلت لها انتو عندكم عادي ؟ قالت لا مو عادي بالعكس اهلي مو راضين اني اكشف بس انا اكشف لما اشوف الوضع يساعد واهلي عارفين اني اكشف
تقول حتى ابوي يقولي لما تكوني معاي وانتي كاشفة انسي اوديك سوق ولا اي مكان وانا معاك
قلت لها طيب هو كذا يستعير منك مستحي انك تكونين معاه وانتي كذا
قالت ادري وعشان كذا اغلب الاحيان لما اكون معاه اغطي بس لمن اكون مع امي اكشف
وتقول انا مني متعودة اسوي حاجة مني مقتنعة فيها وكمان لمن ابغا اغطي ابغا اكون حابة الغطا ابغى لمن يقولون لي اكشفي اقولهم مستحيل بس متى يجي هذا اليوم الله اعلم
وقمنا حولنا على الدين
فقامت الاخت تفتي >> تعرفون اللي يبا شي يطلع له فتاوي
تقول المذاهب الثلاث حللت كشف الوجة الا المذهب الحنبلي هو الوحيد اللي حرم كشف الوجه
ولمن يكون الاجماع اكثر انهم محللين فهذا الشي حلال قلت لها انا اعرف ان كشف الوجه مختلف فيه
بس اصلا الفتنة في الوجه يعني انتي كذا فتنتي الناس قالت انا مااتمكيج حتى شعري مااطلعه ولا نيتي اني ابغا الفت احد
بس احنا عندنا العرف فوق الدين وفوق كل شي ولو نص البنات اللي مغطين اتيحت لهم الفرصة انهم يكشفو والله يكشفون انا عني موافقتها على هذي النقطة حقة العرف
وقمنا حولنا على الوان العبايات انا هنا جالسة اقول في قلبي هذي الكلام معاها ضاايع وهي مرة مي ناوية توقف نقاشها
المهم نكمل
طبعا احنا عندنا في الجامعة العبايات صارت الوان واشكال وموديلات الله يرحم ايام العباية اللي لونها اسود
رح اديكم نماذج
مثلا عباية لونها بني وقماشها استريتش وطبعا فوق انو قماشها من النوع الطايح على الجسم كمان الوحدة تشدها بيدها على جسمها بالله اش معناها يلا قولولي ؟؟
عباية لونها رمادي اللي رايح على الابيض ونفس اللي فوق
عباية مشجرة >>> ايوة مشجرة لاتفتحون عيونكم
يعني قماش استريتش ملون ومشجر اللي يسوونة في الفساتين خلوه الحين عباية خلصت من الامثلة وماخفي كان اعظم
ونرجع لسالفة صاحبتنا
في الاساس العباية مالها لون بس العرف عندنا انه اسود واي لون غير كذا يعتبر لفت للانتباه وخروج عن القاعدة
تقول العباية البنية بالعكس مي ملفتة وانا رح اسوي عباية بني
اوكي مي ملفتة ياحلوة برى السعودية وحطي تحتها مليون خط يعني مثلا في سوريا في مصر تشوفون عبايات ملونة لكن ماتحسونها ملفتة زي هنا عندنا لأن هم هذي الالوان من يوم ربي هداهم وهم هذي فكرتهم عن الحجاب وهذي هي الوان الحجاب عندهم غير انهم محجبين احسن مننا والعباية مي لاصقة بالعكس فضفاضة
لكن عندنا في جدة من الجامعة انا صراحة ماشفت وحدة مثلا غيرت لون عبايتها وهي فكرتها فقط انو لون العباية مو اسود.
بالعكس يكونون ملفتين لأبعد درجة لا وتجي تدخل في عينك
تقولك عبايتي مافيها شي المهم ياحلوين وقف الباص ونزلت البنت بيتهم وقالت للحديث بقية وانا في قلبي اردد ياليييل مطولك
وخلصت القصة كلها
انا بقولكم اش اللي خلاني انزل هالقصة ورح اتكلم بالعقل والمنطق
* اول شي مسألة كشف الوجة من جد العلماء اختلفو فيه بس الافضل تغطيته لان الجمال والفتنة تكون في الوجه وخصوصا عندنا في المجتمع السعودي يعني يعتبر هذا شذووذ وشي منبوذ ومصيبة يعني العرف وكلمة عيب تمشي على الدين ولمن تجي الوحدة تكشف وجهها تلاقونها حاطة كيلو مكياج في وجهها يعني هي كشفت عشان الالفات ومو هامها حجابها ..>>يمكن يكون في بالها انها اذا حطت مكياج ممكن يمشي سوقها وتعجب احد وتتزوج
* مسألة لون العباية يعني انا من يوم طلعت من بطن امي وانا اعرف ان لونها اسود وفي احاديث كثيرة تفهم منها ان لونها اسود لكن تحدد وانقال ان لون العباية اسود لا ماجا حديث كذا يعني لون العباية خلاص اسود لاننا من عرفنا العباية عرفنا انها سوداء يعني تقاليدنا واعرافنا هي اللي حددت هاللون بالتحديد
لكن لون العباية بالتحديد مو شرط اسود اهم شي ماتكون ملفتة بس لو وحدة تجي الحين تلبس عباية لونها بني ولا موف ولا رصاصي كذا لفتت النظر لانه شي غريب علينا
وانا رأيي الشخصي في الامرين ليش الواحد يشذ عن القاعدة وفي النهاية الدنيا هذي محطة والاخيرفي جنة وفي نار وبعدين في مقوله مشهورة قالها الامام الذهبي من تتبع رخص المذاهب وزلات المجتهدين فقد رق دينه .
وقال ارسول عليه الصلاه والسلام ( يأتي على الناس زمان القابض على دينه كالقابض على الجمر )
وادعولي اني اتخرج من الجامعة قبل لايجيني شي في مخي خخخخ
واتمنى تتفاعلون وتدوني رأيكم الشخصي ..