العفو منكم..ولكن كلمة حق بطرف لساني

السلام عليكم ورحمة الله وبركاته

كيفكم ياخواتي مع البرد والامطار الله يديمه علينا يارب

وكيف اولادكم انتبهو عليهم هاليومين احس صار متجمد مره

المهم موضوعي من زمان في بالي وكل مره بقول وادخل واطلع وانسى
لكن وحده سولفت معاي قبل كم يوم بنفس الموضوع ((قلت بيني وبين نفسي مو بس انا ))

الاحظ بعض (مو كل )الحريم الله يهديهم تطلع السوق او مستشفى ومعها طفل ما تاخذ له اي شي ياكله اذا جاع ويجلسون يطالعون اللي بيدين الناس ويتخيلون انهم ياكلون اشوفه يفتح فمه وياكل كانه معاه شي ياعمري والام مسرحه بالجوال....

يا اختي مافيه اقل من بسكويت شاي والله اني اخذ لي علبة بسكويت شاي واوزع على الاطفال اللي ما معاهم لانكم عارفين بسكويت الشاي علبه بريال والحبات كثيره

علبه عصير كيكه صاموليه فاضيه عادي اي شي من بيتك مو شرط
تصدقون احيانا اكون طالعه من بيتي 7 صباحا للمستشفى اكيد الاطفال ما افطرو بهالوقت كيف تروحين مستشفى بدون ما تاخذين له حاجه يتسلى فيها وتشبعه

حتى لو انه مريض ومسدوده نفسه عن الاكل خذي لك حاجه احتياط

لاتقولون ظروف ماديه حراااام مساكين انا اقول اي شي من البيت والله مريت بظروف صعبه كنت اخذ لاولادي صامولي واعبي لهم علبة مويه اهم شي ما يشتهون اللي مع الناس

اما المجمعات حدث ولا حرج اطفال وقت الصلاة يجلسون يتفرجون ويتلحسون اللي بيدين الناس والام لاهيه تلفت على المحلات وهي مقفله ارحمهم احيانا اكون لوحدي اطفالي مو معاي اتمنى لو معاي شي اعطيهم

ياختي اقلها ادخلي السوبر ماركت ((اذا كان بالمجمع لان اغلب المجمعات فيها))واشتري لطفلك بريالين عصير وكيكه
وحده من خواتي كنت معاها السوق راحت قبل الاذان اشترت كرتون كيك اليمامه 4ريال رخيص وفيه 12حبه الظاهر اعطت اولادنا ووزعت على اللي حولنا وهذا الشي خلاني انتبه زياده لبعض الامهات انهم مايفكرون بعيالهم اهم شي عندها اذا خلصت وتسوقت ...هب على المطاعم تاخذ اكبر وجبه والطفل اللي معاها طول يومه يتعصر ينتظر امه تجوع عشان تذكره بلقمه.....


ملاحظه مهمه جدا
انا ما كتبت الموضوع الا عشان مصلحت عيالكم
ولاتحسبوني متضايقه لاني اعطي احد شي يعلم الله اني ما اخذ شي الا بنيتي اوزع على الاطفال ولو ما ابغى اعطيهم اقدر اروح مكان مافيه زحمه واعطيهم اللي ابي واشبعهم بس طبعي كذا ارحم الاطفال