الله يخليكم ساعدوني في مشكلتي

بسم الله الرحمن الرحيم
حبيباتي ترددت كثير في طرح مشكلتي ولاكن طفشت من الحياه الي انا عايشتها وقلت افضفض هنا شوي
بنات انا مشكلتي باختصار هي امي وابي تعاملهم معي :44:
بدايتا انا اصغر بنت من بين اخوتي عمري 18 سنه
انا غير عن اخواتي في كل شي وذا الكلام مو انا الي اقوله الناس واهلي دايم يقارنوني باخواتي طبعا اخواتي نحيفات وطولهم متوسط وانا لا طويله طولي 172 ووزني 82 :44:
كل من شافني يحسبني البنت الكبيره مع العلم يابنات والله انا ماكل كثير والسمنه ملازمتني من وانا صغيره حياتي ماكنت نحيفه
بس يابنات الي يقهرني كلمه دايم يقولونها لي اني ضخمه بسبب الطول والعرض
وكل من شاف تصرفاتي ايام ماكنت في المتوسط والحين كانو يضحكون علي يحسبوني كبيره لان تصرفاتي شوي طفوليه
المهم نجي في تعامل امي وابي لي
دايما يفرقون بيني وبين اخواني والحين اخواتي كلهم تزوجو وانا البنت الوحيده في البيت بس في اخواني ولدين
بقولكم قصتي باختصار انا اي شي اسويه لازم الاقي تهزيئه عليه وامي كل ماشافتني تجلس تقارني باخواتي ولا بنات خالي ولا ببنات الجيران وذا الشي يقهرني والله يابنات صرت اكره بنات جيرانا والسبب امي دايم تقارني فيهم :44:
لانهم نحاف والي يشوفوهم يقول عنهم صغار :06:
بنات ماراح اقدر اقولكم قصتي كامله لاني ماحب اقول اسرار بيتنا بس اقرب مشكله بقولها لكم
وهي حصلت امس بنات انا لي فتره اول كنت اضيع طفشي بدخولي للنت
كنت مسجله في منتدى انا وصديقاتي وكنت دايما عليه وصرت مشرفه وزاد نشاطي ورقوني لمراقبه المهم
ابوي لاحظ تعلقي في النت وصار يهزئني ليه دايما اجلس في النت
طبعا انا قلت في نفسي قبل مايدخل الشيطان في راس ابوي ويشك فيني قررت اني اترك النت
وبالفعل طلبت من الاداره حذف عضويتي
وقلت بحاول اني اغير من حياتي شوي واجلس مع اهلي زي اول
وبالفعل يابنات الحين لي اسبوع تاركه الاب ماامسكه الى لمن ادخل ذا المنتدى اتابع الرجيم دقايق ماطول واخرج بس
صرت يابنات حياتي ارجع من الجامعه اتغدا اجلس شوي يهضم الي اكلته وبعدها امشي 10 دقايق لين ماياذن العصر اصلي
وبعدها انام لمدة ساعه واقوم اجلس شوي وبعدها ادخل للمنتدى اشوف وش الجديد في الرجيمات
وبعدها اخرج اسوي رياضه يعني صرت متعلقه بالرياضه
وانا حاطه السير في غرفة الي نجلس فيها كلنا عشان نكون مع بعض
المهم يابنات امس انا كنت جالسه وسويت رياضه ومرره تعبت وطفشت جيت بجلس على التي في شوي
ولا اخوي ماسك الرموت مو راضي يتركه
اقوله غير مو راضي يبي يطالع كوره وصراحه شي ينرفز :mad:
كل ماجيت ابي اشوف شي في التي في يطالع كوره ولا يسكرو ويشغل السوني مكان الدش
انا تنرفزت مره وقلت له مو ع كيفك الحين تغير مع العلم ماهو دوري سعودي دوري اجنبي الي يتابعه راح هو واشتكا علي عند ابوي مع العلم ابوي وامي
كانو جالسين معانا في نفس الغرفه والله العظيم يابنات ابوي طاح فيني تهزيئ ودعا علي انى ربي يحرقني
والله يابنات ابوي دايما ذي الدعوه على لسانه كل ماسويت شي غلط يدعي علي ذي الدعوه
ولا لاجيت اطلب شي واقرب طلب اني اروح للمستشفى اتعالج واشوف اسباب السمنه دعا علي
المهم هو مو بس دعا علي راح هزئني تهزيئه محترمه وقالي روحي اجلسي ع الاب الحين دايما انتي تجلسين عليه
ويوم اخوكي جلس ع التي في جيتي زي الشيطان تبين المشاكل :44:
والله يابنات ماقدرت استحمل بكيت بكا وصرت اصارخ وطبعا ماقدرت اطلع الي في قلبي لاني صرت ابكي زي المجنونه من القهر
ورحت على طول سريري مابي ازود لهم المشاكل وقلت لهم دام وجودي مشكله انا بجلس في غرفتي واريحكم مني
وربي يابنات مااخذت دقيقه جا ابوي مدري وش قصده يبي يقهرني ولا ايش
جاني يقولي يلا روحي شغلي التلفزيون واجلسي عنده انا ماقدرت استحمل وانفجرت
والله يابنات ذا التعامل مو اول مره يصير معي انا لا كان عندي مشكله ورحت لامي ابي اشتكي لها
واكلمها والله ماتديني وجه ويوم ارفع صوتي شوي قلت يمكن ماسمعتني تقوم تطالع فيني وتقولي
دام انك رفعتي صوتك ماراح اسمع لك
بنات انا يمكن اقدر اعوض كل شي بس بنات انا الي قاهرني لمن تقارني
ولا يوم تشوفني جالسه تقول لي بعصبيه
قومي تحركي خففي شوي صايره انتي الام وانا البنت والله يابنات نفسيتي صايره زفت وكل ماشوف نفسي في المرايا صرت اتنرفز وانقهر
طبعا انا مابقوكم كل شي يصير في البيت لانها اسرار
بس انا الي خلاني اتكلم لاني تعبت والله اخر مره نمت وقمت وعيوني منتفخه وراسي بينفجر وصرت احس بدوخه من كثر البكا
انا يابنات كنت دايم اشجع نفسي ولمن يجيني هم ماحب اشكي لاحد كنت لمن اجي انام احضن مخدتي واتخيلها اعز صديقاتي واجلس اتكلم معاها واشكيلها وابكي
وكنت انام واقوم وانا مرتاحه اني طلعت شي في قلبي
بنات انا كل الي ابيه في ذي الدنيا الحب والاهتمام
والله يابنات انا دايم ادعي ربي واستغفره وانا الحمدلله ماني زي اي بنت في سني رحت ادور على الحب برا
الحمدلله محافظه على نفسي وصرت انا اعطي لنفسي الحب واشجع نفسي بس الحين غير نفسيتي تدهورت لدرجت اول كنت ادعي ربي انى يرزقني الزوج الصالح الي يخرجني من البيت الحين والله صرت ادعي انى ربي يعجل وفاتي
بنات انا كل الي ابيه منكم شيئين ابي تعطوني اي حل وابيكم تدعون لي اني اخرج من البيت وربي يعجل زواجي بانسان يحبني ويفهمني ولا ربي يهدي امي وابوي :44: