اللي تأخذ طفلها في الزيارات تنتبه لهذي النقطة ضروري

السلام عليكم ورحمة الله وبركاته


أكيد كثير عارفين الحاجة اللي راح أتكلم عنها بس مايمنع التذكير


لأن كثير من الحريم إذا نوت تزور أقارب أو غيره سواء زيارة عائلية أو رسمية تأخذ أطفاها معها

أنا شخصيا مليت من تصرفات بعض الحريم الله يهديهم
أنا ما أقصد أن الأطفال يعفسون البيت أو يضربون أولادك أو يكسرون ألعابهم أو يخربون عليك الضيافة والله هذي أرحم من اللي أعاني منه


يعني بعض الحريم لمن تزور أحد تهتم بكل شي لبس عيالها يكون جميل وتحرص على أناقتهم وتوصيهم يكونوا هادئين
لكن تعالوا إيش اللي يصيير...

لازم تنتبه الأم لشغلة لو طفلك قال يبغى يدخل الحمام لازم تروحي معاه حتى لو كان يعرف ينظف نفسه لازم تشيكي على نظافة الحمام بعده وتتأكدي أن ولدك طلع من الحمام نظيف مو مخبص الدنيا وعافس الحمام بالقاذورات

والله ثم والله إنه إذا جوني ضيوف إنا نغسل الحمام أكثر من 4 مرات من البلاوي اللي يتركونها الأطفال فيه مافي أم كلفت على نفسها توقف خمس دقايق عند باب الحمام ولمن يطلع ولدها تشيك على الحمام من بعده؟؟

حراااااااام ممكن تخلي بيت الناس نجس غير طاهر وهم مو عارفين صرت إذا طلع اخر شخص نغسل الحمام ونرشه كلوركس مركز بعدين مطهر الأرضيات والباب ومقبض الحمام والحنفيات نغسلهم ونمسحهم ونرش عليهم بخاخ ديتول المعقم

وكمان اللي طفلها يلبس بامبرز لمن تحطي البامبرز بكيس سواء معطر أو عادي ولو ما معكي كيس أطلبي كيس من أهل البيت ولا ترمبي البامبرز كذا بدون كيس تقرف الريحة وتنتشر بالبيت

طبعا لو معك شغالة خليها تطلع الكيس على الحاوية الكبيرة في الشارع مباشرة

وممكن قبل تطلعين لبيتك مري وخوذي بامبرز ولدك و أرميه بحاوية الشارع


لأن بصراحة طلعت عيوني من الحريم اللي يزوروني و أقعد ألملم حفائظ عيالهم من الحمامات

تخيلوا في دورات المياه العامة ممنوع ترمي البامبرز في الحمام كيف عاد بيوت الناس والله عيب

وكله كوم واللي ترمي البامبرز بسلة المهملات اللي في الممر يعني إيش راح يكلفك لو رميت البامبرز بسلة الحمام ليش تحطيها في الممر وتبخري لنا البيت

والله يابنات إنها أول مرة صارت معي و أنا عروس زاروني ناس ولمن طلعوا لقيت حمامي فيه بامبرز وقعدت ألم وراهم


وفي حاجة بس محرجة شوي لكن راح أقول ............... نفس الكلام ينطبق على الأم بخصوص ...........( الفوط الصحية) من غير شرح خلاص أكيد فهمتم


بصراحة الموضوع للتنبيه فقط وتذكير الناسي وبس .............:27: