اللي تاخذ عيال خواتها او اخوانها تدخل

والله يابنات مافكرت اكتب الموضوع
الا لان الشعور والاحساس اللي حسيته للان فيني وكانه
صار قبل يومين ماكان مر عليه تقريبا ١٨ سنه
يابنات لما تاخذين عيال اختك
عيال اخوك
قرايب لك
مول
مطعم
ملاهي
كوفي
نفس ماتعاملين عيالك عامليهم
او لاتاخذينهم من الاساس
طبعا انا امي ربت بيت وابوي على قد حاله
خالتي عكس امي ماشاءا لله معلمه وزوجها تاجر
من يوم الدنيا مو التجاره العاديه لا التجاره
اللي على مستوى ومنصب
لدرجه تشوف امي ولا شي عندها
يعني من يومهم خالتي وبناتها
يعني خالتي الوحيده تلعب بالفلوس على مستوى
والله العظيم كانت حياتنا تحت المستوى العادي
يعني مثلا صار عندنا زواج امي ماتقدر تشتري فستان لي
تدور لي عن بنات صديقاتها او قريبتها يعني ماتقدر ٢٠٠
كان زمان يعتبرونها كثيرررررره كانها ٢٠٠٠
لبس العيد كانت امي تشتري لنا محلات العاديه
اللي يجي سعره ١٠٠ وبالموت بعد
قبل ١٨ سنه
ايام ماكان عمري تقريبا ١٢
اخذتني خالتي معها ومع بناتها لمول وياليتي مارحت
ياليت رفضت !!
اخذتني وايام زمان زارا والطقه هذي عند الناس
شي واو وكشخه كنت اشوف كيف خالتي تشتري
القطع والفساتين لبناتها على ٤٠٠ و٥٠٠
من زارا ولكل بنت فستانين او فستان وطقم تنوره
وجزم تكرمون واكسسوارت كلهم من نفس المكان
ويشترون كانهم يشترون من ابو خمسه
اتذكر للان طلع حسابهم فوق ٤٠٠٠ خالتي وبناتها
ومرت واشترت ساعتين ماركات بمبلغ وقدر ومكياج وعطور للبنات
كنت يابنات طفللللله لسى مابلغت حتى كنت اشوفهم واحس حياتي ولا شي حرفيا حسيت باحساس الايتام
يعني طول وقتي ادور معهم بالسوق اشوف وش يشترون!!
اقسم بالله يابنات ان قطعه ب٢٠٠ بالنسبه لخالتي
زي عشره ريال لكن ماكلفت ع نفسها تشتري
لطفله بذاك الوقت مادري هو احتقار لنا او شوفة نفس علينا
او ايش بالضبط يعني بتقولون مو مكلوفه فيك
صح مو مكلوفه لو ان امي ماتخدمها
بنات
متخيلين كانت ترمي عيالها الصغار امي تربيهم لها
حتى لما رحت المول معها كانت مجلسه بنتها الصغيره
عند امي تهتم فيها
وهي معلمه كانت كل صبح كل عيالها تجيبيهم
لامي تهتم فيهم لما ترجع تاخذهم الظهر
وامي تهتهم فيهم اكثر منا
ومع كل هذا للاسف خالتي فيها انانيه ولا تشوف
امي شي وتحس اننا فقراء وهي وين من الطبقه اللي فوق
والله قبل كنت طفله وكنت الاحظ
احتقار خالتي لامي لما كبرت عرفت كل شي مو شايفه امي
شي تحس امي للاسف جاهله ولا تعرف كشخه ولا نعرف ماركات مثلها ولا شي
لنا كل هذا ماهمني اللي همني واللي كتبته
الموقف بسبب اختي اليوم بتطلع وبتاخذ
معها بنتها وبنات اخوي لكوفي وهم صغار بالعمر بنات اخوي
اعمارهم ١٠ والثانيه ٨ وبتمر السوق
والله العظيم قلت لها قهويهم على حسابك
واشتري لهم اي شي من السوق لو بجامه لو من كليرز
ادخلي خليهم يتشرون اللي بتشترينه لبنتك اشتري لهم
ولا خليهم عند اهلهم لاتكسرين نفسهم
قالت بدون ماتقولين اكيد اللي باخذ لبنتي باخذ لهم
والله العظيم ناسيه الموقف لما جت اختي تكلمت
تذكرته كانه امس صاير لي