بسم الله........
ابي ابدأ بموضوعي...........
هذا الله يسلمكن من خلال تصفحي للمنتدى بجميع اقسامه ..
حضرت اكثر من مره مشاده كلاميه وصقع وصقيع وتماعط بالشوش في المنتدى
واحيانا ينولني من الحب جانب
واحيانا اجلس واتفرج زي اللي يتجمهرون في حوادث السيارات
الى ان تاتي احدى المشرفات وترش الموضوع برمته بالماء الساخن
وتستخدم جميع الصلاحيات لقمع مثل هذا النوع من الشغب >>كان الله بعونهن
الزبده......
انا من خلال ما قرأت من الردود قبل الحذف قرأت اشكال وانواع من الدعاوي توقف شعر الرأس!!
اللي تقول عساك بشلل رباعي!!
واللي تقول والله لاذكرك بالدعاء بوردي اليومي انتي وامك وابوك وعيالك لاخر يوم بعمري !!
واللي تدعي على اختها المسلمه بعدم التوفيق دنيا واخره !!
بعدها التفت الى عدد مشاركاتي لقيتها حول الاربع الاف مشاركه
وبما ان 99% من مشاركاتي في قسم الاسريه
طرى في بالي لايكون قد اذيت وحده من العضوات برد من ردودي بقصد او بغير قصد وانا ناسيه..
او رافع ضغطي ابو الشباب وحطيت الحره فيها من دون ذنب..
مطبقه المثل اللئيم اللي يقول
(( اذا صفعك الحر اصفع الدجاجه ))
وهي شايله في قلبها !!
وجالسه تدعي لاسمح الله علي او على امي وابوي او عيالي من دون ماتدري عن الحي منهم
و الميت !!
فحبيت انزل هالموضوع اسأل فيه العضوات هل في يوم من الايام قد اخطيت على وحده منكن؟
او في وحده شايله علي في قلبها وانا مدري؟
وجالسه تدعي علي صبح ومساء من غير علمي ؟
ياليت كل وحده عندها سوء تفاهم معي تكتبه في هالموضوع ولايردها الا الكيبورد
ومالها الا اتسامح منها واشوف اللي زعلها مني وارضيها باللي تبيه
واي عضوه تبي تسال العضوات مثلي تتفضل ..
واللي عندها تعليق على الموضوع ومسألة
الدعاوي على بعض وحنا اخوات في الاسلام
تتحفنا بمشاركتها
وفي أمان الله يا اعز الاخوات
الله يسعدك ياااارب