اللي على وشك ولاده تدخل للنفاس

االه يهون على كل حامل يارب ويقومها بالسلامه

انا كنت حامل وولدت قبل 3شهور يمكن وحبيت افيدكم بالاشياء اللي جربتها في النفاس وجابت مع نتيجه

1-بالنسبه للمردود كنت استخدم مردود الموجود في نظام فيافي (لا احد يسألني عن مكوناته لاني بصراحه ما اعرف لكن اخذته من قريبتي وهي تقولي انه من نظام فيافي) كنت احط ملعقه مع حليب دافي واشربها مع الفجر

2-اهم شيء يابنات الفطور بدري ولازم يكون فيه بر واذا عندك\ عسل احسن بعد وكنت اشرب معه شاهي قرفه وكمون

3- على الظهر كنت اكل خس وكراث وجرجير واشرب معها شاهي القشر (القشر غني عن التعريف)
كنت احط فنجا ونص قشر (طبعا بعد ماتغسلينه وتنشرنه ينشف كم يوم وتجريشنه وتحطينه بعلبه)
المهم فنجال ونص قشر وملعقه صغيره حلبه وملعقه صغير شمر واربع اعواد قرفه وشوي كمون وكم حبة مسمار وزنجبيل طازج ) تغلينهم على النار ربع ساعه وحطيها بترمس عندك مع الخس كوب وبعد الغدا بفتره كوب ثاني

4-عاد بعدين الغدا واذا بيجيك ضيوف وبتاكلين معهم بكيفك بس لاتنسين المردود مره ثانيه على المغرب وقبل لا انام كنت اشرب كوب زعتر بعد العشاء يعني لان الاشياء الدافيه تساعد انك تتطهرين بسرعه وتريحك بعد
5-عند راسك على طول وكل ماحسيتي (تمر معجون مع شوي حلبه مطحونه مع فلفل اسود في العشر ايام الاول)تحطينها بعلبه وكلي منها مع القهوه ومع الحليب الفجر وبعد عشر ايام اضيفي لها الرشاد

هذا كله من ناحية التغذيه

اما من ناحية الخياط
اهم شيء يابنات النظافه ثم النظافه ثم النظافه انتبهي لاتجلسين الله يكرمك على الشطاف وتستخدمين مويته لانه موشرط يكون نظيف استخدمي وعاء خاص بالمويه وتحكمي بدرجة حراره المويه وتكون دافيه طبعا المويه مع الملح الخش هذه باستمرار
واستخدمي صابون ديتول تراها كويسه انا ماكنت اعترف يها الين المستشفى اعطوني اياها وجربتها والديتول نفسه حطي ملعقه مع كوبين مويه تقريبا دافيه وتشطفي بس مره باليوم بتحسين بوخز الخياط لكن بعدها رااااحه فظيعه
وانتبهي الفوطه لاتطول عليك اكثر من 3ساعات
وفي طريقه مره حلوه اخذت من هنا الله يجزاها خير اللي كتبتها لكن ماني عارفه اسمها

وهي انك تحطين علبة زيت زيتون الوزير مع خوى جوا اغليها على النار وطفي عليها ثم هلى طول وهي حاره ملعقتين كبيره مره وخليها تبرد ثم صفيها بعلبه وخليها بدورة المياه كل مارحتي الحمام وجيتي تلبسين الفوطه صبي عالفوطه شويه والبيسها علشان الخياط والجرح

بالنسبه للغسول مااستخدمت اي شيء يكفي المطهرات والمويه والملح

اما البخور فتبخرت بحطب الطلح السوداني معروف انه يشد ويبعد الافرزات والهوا
استخدمته من اليوم العشرين الى ال27 سبع ايام بس لانه بخلي لونك برتقاااالي ولازم قبل ماتطلعين بفتره تتركينه
طريقته تحطين الحطب نفسه على النار علشان يولع وتحطينه بعلبة حليب النيدو الكبيره ويكون ربعها تراب
تطلعين للسطح او اي مكان فيه تهويه علشان ماتنكتمين وتدهنين جسمك بزيت سمسم وتحطين عليك بطانيه مو شرشف وتجلسين على كرسي او طاوله المهم طولها قصير
اجلسي قد ماتقدرين وبعدها اغسلي جسمك بمويه والبسي ملابس دافيه وناممي
على فكره الحطب روووعه للجسم يفتحه انا استخدمته ايام زواجي سوته لي وحده سودانيه على اساس تفتيح الجسم لكن بعدين سمعت عنه بالمنتدى انه للنفاس صحيح بتصرين برتقاليه لكن اول مايروح واذا سويتي حمام مغرب ومع الحلاوه بتصرين زي الحلاوه:) تبين نتيجته فعلا
وعلى كره هو يجي مثل الحطب الكبار وهذا اللي شرحت لكم طريقته اما اللي ييجي صغار مثل العود هذا حطيه مع الفحم وتبخري فيه مثل البخور العادي بس لازم تتددهنين بزيت سمسم



هذه بصراحه الاشياء اللي جربتها وجابت مع نتيجه والا اني كنت اعاني من افرازات وخرابيط قبل الحمل الولاده والحمدللله اختفت بعد الولاده
بس لازم تستمرين مع كل دوره وتهتمين بنفسك علشان لاترجعين تعانين من اي شيء

وعندي ملاحظه مهمه جدا الفيتامينات اثناء النفاس مهمه مهمه مهمه لاتغلطون غلطتي اعطاني المستشفى حدييد وفوليك وطنشت قلت اكلي يكفيني ولاحظت في البدايه كل مالي انحف واشحب واحس بدوخه مع ان الحديد يوم خروجي من المستشفى كان 12ونص يعني ممتاز وهذ اللي خلاني اتهاون ولما رحت المستشفى طلع الحديد نازل من الشواهي اللي نشربها وهالدم الللي يروح
لكن الحمدلله انتبهت لنفسي بدري وصرت استخدم الحديد وراح مني الدوخه والشحوب

والحمدلله لما طلعت مازاد وزني لاتني كنت اركز عالاشياء الدافيه وكنت اسوي تمارين ومن اليوم العشرين امشي مع اني اكل توقعت اني راح اسمن مره لكن بالعكس

هذا اللي عندي واتمنى اني افدتكم مثل ما افدتوني قبل

لكم تحياتي