المال الحلال عمره مايضيع

كل عاااااام وانتم بألف صحة وعافية
يارب يكون خبر العثور على الطفلة ابتهال صحيح لتكتمل فرحتنا مع فرحة أمها المكلومة

في يوم العيد حكت لي بنت عمي عن قصة حصلت لها في رمضان عندما ذهبت للتسوق في النخيل بلازا .. تقول بنت عمي اني قررت اروح يوم 25رمضان للنخيل اشتري لبناتي ملابس العيد .. فقالت لي أختي إنها من أول رمضان وهي تدور بالاسواق تبحث عن فستان للعيد لبنتها اللي عمرها 8سنوات

ومع ذلك مالقت اللي يعجبها وخايفة الايام تمر وهي مااشترت لبنتها .. فقالت لي : انا شايفة عند محل فستان يجنن وآخر حبة كنت ناوية آخذه لبنتي بس شفت سعره غالي وترددت كان سعره ب800ريال .. باتصل عليه هالحين وبسأله إن كان عنده وإلا خلص؟ فاتصلت عليه وقال : عندي الى هالحين مابعته ..

فقالت له: خلاص ان شاء بتجيك بعد صلاة التراويح وحده بتقولك انها من طرف( أم عاصم) عطها إياه ..
تقول بنت عمي: رحت للسوق مع زوجي واشتريت لبناتي ثم مريت على المحل اللي وصت عليه أختي

وقلت له: وين الثوب اللي تبغاه ام عاصم .. فعطاني إياه بنفس القيمة ب800ريال .. وطلعت من المحل .. فقلت لزوجي تعبنا خلنا شوي نرتاح على احد هذي الكراسي .. فجلسنا وراح زوجي يشتري له ذرة والاكياس كلها عندي ..

وبعدين جاء ورحنا للسيارة فقلت لزوجي : قبل مانروح للبيت ابغى أمر أختي اعطيها فستان بنتها .. ولما جيت اطلع الكيس اللي فيه الفستان مالقيته.. دورت مرة ومرتين وثلاث.. بصراحة ضاق صدري لو كان لاحدى بناتي كان أهون .. ياربي وش اسوي؟؟ وش اقول لأختي؟؟ وسعره مهب سهل

فقال زوجي: تعالي معي فرحت معه وانا ماادري وش ناوي عليه .. بدينا نمر على كل مكان مرينا من عنده وعلى كل محل دخلناه ومالقينا شيء... وبالأخير راح زوجي للمحل اللي اشترينا منه الفستان وقال له القصة وقال له انتبه يمكن اللي أخذته تجي ترجعه لك وهذا رقم جوالي إن حصل شيء علمني ..

وطلعنا من السوق واتصلت على أختي وقلت لها إن الفستان خلاص باعوه ومالك حظ فيه.. قالت أختي: سبحان الله هالحين قاعد كل هالمدة يوم بغيته راح ؟؟؟ وكنت ناويه أرد لها فلوسها 800ريال مني ولاتدري بسالفة ضياع الفستان

ولما صار من بكرا ( العصر) اتصل علي زوجي بجواله ويقول بسرعة خليكي جاهزة نبغى نروح أنا وإياك للنخيل ...رجع الفستان.. قلت: وش لون؟؟؟؟ قال: بعدين تفهمين .. ياالله خليك جاهزة

فجاء وعلى طول رحنا للمحل ودخل زوجي للبائع وسأله وش القصة؟؟؟؟؟؟؟ فقال: شف الحرمة هذي

جايه ترجع الفستان تقول مايصلح صغير وابغى قيمته.. فراح زوجي للحرمة وقال لها: متى اشتريتي هالفستان؟؟؟؟؟ ارتبكت وتفاجأت وقالت: ليش وش دخلك؟؟ قال: جاوبيني متى شريتيه؟؟ قالت: شاريته أمس وجايه ارجعه اليوم.. وش عندك؟؟ فقال زوجي للبائع: كم كان عندك من هذا الفستان أمس؟ فقال

البائع: ماعندي الا حبة وحده وبعتها عليكم.. فأخذت الحرمة تحلف وتهاوش وتقول : ياالحرامية ياالنصابين هذا أنا شاريته ( مع شينه قواة عينه) فقال زوجي: روحي الله يستر عليك تحلفين وتسرقين وحنا بالعشر الأواخر.. حسبنا الله ونعم الوكيل .. فطلعت من المحل والله ترحم من الفشيلة .. وحنا أخذنا الفستان وعطيته أختي وقلت لها كل السالفة