الناس جوعانة؟

في المنطقة الشرقية كل يوم نسمع عن حوادث سرقات للبيوت والشقق والافراد
وكل احد سمع عن سالفة ان احد انسرق منه شي قالوا مساكين الناس جوعانة

يا ترى هل الناس جوعانة فعلا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الاسبوع اللي فات انسرقت شقتين من نفس الحي !

ثنتين حريم تعرضن لسرقة شنطهم من شباب راكبين دباب وطبعا الحرمة ما هي بقوة الشباب ومن خوفها تروح متنازلة عن شنطتها علشان تنجو بعمرها !

بنت انسرقت شنطتها من ايدها عن من 2 شباب راكبين سيارة بيوك وسحبوا منها الشنطة وهم مسرعين ولو ما فكت شنطتها كانت طاحت تحت الكفرات!
والمشكلة ان الحريم هدولا ما يبلغون الشرطة بزعمهم ان الشنط ما فيها شي يستاهل غير الجوالات ومبالغ بسيطة
او انهم عارفات ان البيوت تنسرق والشرطة ما هي محصلة دليل علشان تمسكهم فكيف هو الوضع مع حرامية الشارع!
بس يا ترى التعليق بان الناس جوعانة هو مبرر لسرقة الناس مقتنياتهم الشخصية والبسيطة
انا اقول ان الحرامية عندهم افلاس بالاخلاق والمبادئ
مو كل الناس شبعانة واكيد في ناس جوعانة بس انحلال الاخلاق مصيبة عظمى لو اجتمعت مع الفقر
الملفت ان اكثر الحرامية حقت الشوارع هم من الشبان والمراهقين !
يعني عندهم قوة يسحيون الشنط من ايدين الحريم
عندهم عقل ومخ اللي يخططون به للسرقات
يعني مو ناقصهم غير الاخلاق وان احد يديرهم ويوجهم للطريق الصحيح
بيوت الشباب اللي على الكورنيش ما عندي فكرة عن اهدافها بس من عنوانها انها مخيمات صيفية للشبا ن واللي ما عندهم مقدرة على السفر يقضون اجازتهم بشي مفيد
بس يا ترى هل كل الشبان رايح ينتمون للمخيمات هادي؟
ما أ توقع!
بعد ما سمعت بسالفة السرقات قعدت افكر ايش اللي لازم نسويه علشان نقضي على هالظاهرة الخطيرة حشى الاخبار اللي نسمعها كنا عايشين في شيكاغو مو بالسعودية

لقيت ان افضل حل هو ان وزارة الزراعة مثلا :
كل صيف تسوي مخيمات في الاراضي الصحراوية تحت عنوان نزرع شجرة تهيء للشبان بورتبلات سكنية ومطاعم وملاعب وتطلب من الشباب انهم يلتحقوا فيها برواتب معقولة تحددها الدولة وناس تشرف عليهم ويكون من ضمنها برامج توعية غير مباشرة لان الشباب بسن المراهقة يكرهون الاوامر والنصيحة وبكدة يشغلونهم بشي مفيد لهم وللمجتمع وللدولة واخر الاجازة يطلعون بمبلغ حلو ويحطون جوايز مغرية وتشجيعية للمتميزين

فكرة ثانية وهي

البلدية ليش ما توظف الشبان وتعلمهم تعبيد الطرق بتقولون شبابنا متدلع وما يرضى بالاعمال الشاقة وانا اقولكم ان اللي بيرفض في مقابله 10 بيقبلون اهم شي العائد المادي يكون مغري والحمدلله دولتنا غنية وقادرة انها تسوي مثل هالمشاريع واكثر
وخصوصا ان اللي يتعب في بناء بلده ما تهون عليه وبهالطريقة نبني في قلوبهم الوطنية
واللي عنده اي اقتراح يقوله لعل وعسى احد يهتم في الموضوع
يمكن افكاري تكون سطحية ويمكن اقتراحاتي تقولون عنها تافهة بس اللي حاسة فيه قلته
ولا اني اسمع جملة

(الناس جوعانة)