الولادة سهلة للي مسهل الله عليها، فتوكلي على الله يابكرية

السلام عليكم ورحمة الله وبركاته
أخواتي الحوامل، هذي أول مشاركة لي، مع أني مسجله بالنتدى من زمان، بس كانت مشاركاتي تقتصر على الرد فقط، ولكن اليوم، وبعد ماخضت تجربة الولادة حبيت أنقل شعوري لأخواتي الحوامل عامة وللبكريات خاصة،

طيلة فترة حملي كنت خايفة من لولادة، وأحسها شي صعب مررررررررررررررررررررررره، وفكرت بجدية بأن آخذ إبرة الظهر عشان ما أحس بالألم، لكني في نفس الوقت كنت خايفة على طفلتي، كنت أتسائل كيف بقدر أولدها وأنا ما أحس بألم؟؟ فكنت في تفكير وخوف دائم، ولكن أخواتي الحوامل ترى كل شي سهل إذا توكلتي على الله فيه، وفوضتي أمرك إليه، وتأكدي بأنه سبحانه لايكلف نفسا إلا وسعها،

قبل تاريخ ولادتي بيوم، صحيت الفجر على ثقل في نهاية ظهري، فقلت يمكن أحتاج أروح الحمام - أعزكم الله - لما رحت شفت علامة الولادة، وهي دم خفيف، بصراحه خفت في البداية وقلت في نفسي ألحين تبدأ الآلام والأمور الصعبة، لكني تعوذت من الشيطان، وقلت ربي يسهلها إن شالله،

خبرت أهلي، فقالت لي أمي نامي شوي، وجمعي قوتك للي منتظرك، وفعلا نمت إلى الساعة 10 تقريبا، صحيت ما كان عندي آلام، إلا شي بسييييييييييييييييييط جدا آخر ظهري، ورحت المطبخ، وحضرت اللي كنت مخططة أسويه من تجارب البنات في المنتدى، ( منقوع زعتر - منقوع مرمية - منقوع يانسون ) وظلت هذي الآلام البسيطة إلى العصر، وأمي تقولي روحي المستشفى وأنا رافضة، أقول هذا ماهو طلق، بس أستمر ينزل علي دم، وهذا اللي خلاني أروح المستشفى، حتى وأنا طالعه من البيت أختي تسلم علي أقولها لا يهمك، برجعوني، ولما وصلت المستشفى وفحصتني الدكتورة قالت مفتوحه 3 وخلاص ما ترجعين لأن هذي ولادة، وظليت عندهم، والآلام جدااااااااااااا محتمله، وقصيرة، بمجرد ما تجيني أتنفس بطريقة صحيحه، وتخف، وصدقوني ظلت على هذا الحال إلى ما وصلت 6، في جهاز قياس التقلصات كانت التقلصات كثيرة، والممرضة قالت بنقلك غرفة الولادة، لكن أنا أقولها ألمي خفيف جدا، قالت بس أنتي ألحين في مرحلة الولادة، ونزلت موية البيبي، عشان يزيد طلقي، وركبوا لي طلق صناعي في المغذي، هنا حسيت بالألام، وحتى التنفس الصحيح ما أقدر أتنفسه، بس كنت أدعي: لا إله إلا أنت سبحانت إني كنت من الظالمين، وصدقوني هذي الآلام الشديدة كانت تجيني كل دقيقتين، وبفضل الله كلها نصف ساعة وقالت الدكتورة خلاص ألحين الولادة، وصرت أدفع، وبفضل الله سبحانه ولدت وجبت بنوتي الحلوة، وخلااااااااااااااص راحت كل الآلام بمجرد ما حطوها على صدري، وصرت أبكي وأضحك في نفس الوقت، وأقول اللهم لك الحمد والشكر اللهم لك الحمد والشكر كما ينبغي لجلال وجهك وعظيم سلطانك

فياأخواتي الولادة شي حلو، وعظيم، والتسهيل من الله، فتوكلن عليه سبحانه، فهو المسهل

أتمنى أكون ساهمت في رفع معنوياتكن، وإن كنت وفقت في ذلك، فأتمنى منكم دعوة بأن يحفظ الله لي بنتي ويقر عيني فيها