الي تعطيني الحل ربي يوفقها ويسخرلها ويرزقها امنيتها

السلام وعليكم ورحمه الله وبركاته

بصراحه مدري وش اقول بس هذي اول مره اكتب موضوع يخصني
اتمنى من صاحبات العقل الرشيد انهم يعطوني الحل المفيد::::

بقول القصه بختصار شديد::
المشكله بعد زواجي بسنتين صارت مشكله بسيطه مع اهل زوجي وجلست فتره سنه مشاكل ياليت تصير مشاكل وجه لوجه لا ماتصير كذا اذا راح زوجي لهم بدت امه زوجتك قالت زوجتك حطت زوجتك ماتدخل المطبخ ومن هالقبيل وللمعلوميه انا ساكنه فوقهم بس لي مدخل مستقل

وبعدها صارت قطيعه وحاولت بزوجي لاني اخاف من الله بعيالي ومابي زوجي يلحقه ضرر عقوق الولدين وجلست سنه علاقتي فيهم رسميه اروح بالشهر مره واذا رحت اخذت عشاي وحلاي وكل شي واوقات نجتمع بالشهر مره نتغدا بحكم ان اولادهم مو بنفس المنطقه الا انا معاهم وبعدها صارت مشكله كبيره على شي تااااااااااااااافه وسوو لي سالفه ومشاكل وصارو يتكلمون فيني في كل بيت وماتصدقون لدرجه ان ابوه يدق عليه تعال ازوجك وامه تقول له رضاي تطلقها وللمعلوميه ام زوجي تحرضه على بشكل كبير تقول له خواتها يخربونها ومن هالقبيل والحين لي سنتين قاطعه علاقتي فيهم بطلب من امه السبب الرئيسي وبعتراف من امه انها تغار مني وماتحب ابوه يشوفني لاني البس واكشخ طيب المشكله بزوجي كل ماراح لهم يصير بينهم مشاكل لانهم مايخبرونه باي شي خواته ينخطبون وهو مايدري الا قبل الملكه بيوم وكل ماراح لازم امه تجيب سيرتي بشي شين وياليت صدق وغير ه وغيره كثير انا الحين تعبت من زوجي وكثر ماقنعه انهم اهله ولازم يراعي حقوق الله فيهم بس هو يقول تعبت كل ماراوح مايجيني الا ارتفاع بالضغط امي لازم تنرفزني لانها تجلس تسبني وتمدح في حريم اخوانه قدامه مع اني انا احسن تعامل معهم من حريم اخوانه

الي ابغاه هل اذا قطع فيهم اتركه بكيفه لان تجيني مضار اذا قلت له امك وامك دايم يهاوشني ويقول وش دخلك فيني ولا اظل انصحه وايش الطريقه الصحيحه عشان يتعامل مع امه لان كم مره يقول لها انا جاي اسلم عليك لا تسبين زوجتي ولا تتكلمين عن اي شي يخصها لانها تنرفزه وتظل تسب وتجيب سيرتي ابغى طريقه حلوه يتعامل معها والله يابنات وانا قاطعه العلاقه فيهم اذا سافرت جبت لهم هدايا واخر مره اخذت بنتهم الصغيره للملاهي بس مافيه فايده شرهم يزيد والله يابنات كل ماجاني مشكله منهم قلت يارب من ارادني بسؤ رده في نحره وسبحان الله امه من مرض لمرض هل يلحقني شي,,,,

واسفه ادري طولت بس ابغى حل لاني تعبت

ومشكورين على قراتكم للموضوع ...........