الي عالجت من المس او العين تدخل وتفكني من الهم الي انا فيه

هلا والله بنات حوا الغاليات على قلبي

انا واعوذ بالله من كلمه انا بكتب لكم مشكله كبيره اعاني منها واتمنى انكم تقرون موضوعي ولا تطنشون ابدا (( مثل مواضيعي الاوليه )) .. المهم انا ابيكم تدخلون وتدعون لي وانا بدعي للي تبي (( ولاتنسون الدعاء والالحاح بالدعاء يغير القدر وبعد مو تنسون كثره الدعاء والالحاح فيه هم يغير القدر يعني تخيلوا عدد الي دشوا الموضوع دعوا لنا اكيد دعوه وحده منهم على الاقل تستجاب )) وبهالموضوع نبي نكتب مشاكلنا مع الحسد او المس او العين او السحر .... الخ ونبي نشجع بعض .. ومنها بعد كل وحده تشوف مشكله الثانيه وتهون عليها مشكلتها وتحمد ربها على الي هي فيه ..

وبعد نبي بهالموضوع بخبراتكم وخبراتي بهالمجال نكتب كل شي عن علاج العين والسحر والحسد ... والخ ..

- سواء كان من القرآن الكريم (( مثلا تكتبين آيات خاصه للسحر والمس والعين )) ..
- او من الادعيه الخاصه للحصن النفسي ..
- أو تعلمينا طرق تخلصتي فيها من العين (( مثل الفضلات الي تحسين انه حاسدج )) .. وشلون تتصرفين مع الي عرفتي انه ساحرج ..
- أو مثلا تستخدمين اشياء تساعدج على التخلص من العين او السحر ((( مثل انج لبستي حجامه فيها آيات قرآنيه .. أو مثل ما تقول المعتقدات لبس الحجر الازرق عشان تبرد العين .. أو مثل ما تقول اختي انه لما تحطين الحنه على راسج وايدج ورجولج تبرد العين << اول مره اسمع فيها بس فرحت لما سمعتها ))

وتكتبين شنو كانت حالتج قبل ما تتشافين وبعدها عشان نتشجع ويصير عندنا امل واراده قويه ونحب الشفاء ونعاني ونتعب ومع هذا نكون سعيدين بتعبنا لاننا ندري بالنهايه راح نلقى نتيجه جميله جدا مثل الي تشافوا

يلا انا اول وحده ببدي ولا تبخلون بالردود او الدعاوي (( على الاقل الي ما ودها ترد تدعي ولهاا الاجر انشالله  )) << لا تنسون فضل الدعوه بظهر الغيب

انا اول شي بطفولتي كنت انسانه مرحه ونكتيه وكلا اضحك والضحكه ماليه وجهي حتى خدودي بتنبط من كثر ما اضحك واي احد يقعد معاي يموت من الضحك يعني على قوله المصريين (( بن نكته )) وكنت جريئه واسولف مع مدرساتي وكنت اجتماعيه و زعيمه عصابه وشخصيه بعد ومحد يقدر علي وكنت شاطره بالمدرسه وامتيازات اما الحين دور ثاني والله يعيني وانشالله انجح (( آمين ))

والحين حالتي مو شي فررررررررررق عن قبل صرت قليله كلام وحزينه حتى مرات من غير سبب اقعد ابكي ومرات تجيني ضيقه << أي مرات الا طول الاسبووع .. واعصب من أي شي .. وما احب اقعد مع احد واكره الدراسه << أكثر شي اكرهه بحياتي .. وصرت انطوائيه >> بس الحمدلله تخلصت من هالصفه بفضل ربي وصرت عاديه او شبه اجتماعيه

وطبعا بالبيت انا انسانه مو طبيعيه يعني يا بنات حتى النوم ما اذوقه لما انام اسمع صوت احد يصرخ (( ينادي باسمي )) واقوم متخرعه وادري انه هالصوت مو صوت احد من اهلي ما ادري منو صوته << بأيام المدارس قسما بالله اني ما كنت انام الا اربع الفجر من هالحاله 

وطبعا مو هالشكل لما انام احس اني ما اقدر اتحرك واشوف اشياء تخرع مثل وجه جاهل يخرع او وجه واحد يخرع

ومرات لما انام (( مابي اكون وصخه ومو قصدي شي بس بقولكم )) أحس انه فيه احد يلمني ويحبني ويبوس فيني ويحضني حيل وانا اقوم متخرعه وانحاش قبل من الغرفه وانام عند امي وهالشي من خمس سنين تقريبا ولهاليوم قاعد يتكرر .. أما الحين من كثر الحقد الي فيني اقوم من الغرفه واتفل على المكان الي كنت نايمه فيه واتعوذ من ابليس << من كثر ما تتكرر علي هالاشياء ما صرت اخاف

وبعد احلم احلام تخوف مثلا : أحلم بوحده تخرع تلحقني او بحراميه او بوحوش متوحشه او بكلابه تلحقني او بثيران << أكثر شيين احلم فيهم .. أو بأحد يلحقني وطقني من على راسي من جهه اليسار >> هالجهه لما يقرى علي الحداد يعورني راسي
وبعد ابي اقولكم انه اول مره شفت فيها جني لما كنت بثالثه ابتدائي >> من بعد هالسن وانا ما خذيت امتياز وانا بالتدريج صايره انطوائيه ولا ادرس

ايه ابي اقولكم انه شفت واحد كان يبتسم لي وانا كنت بهاليوم مريضه ونايمه وكانت يضحك ويدور عندي ولما قمت ((( كنت ابي اتحرك بس ما قدرت يعني مو نايمه نايمه )) سألت امي منو الي كان يركض عندي قالت محد

وطبعا نسيت هالسالفه بس مره .. بعدين رد لي مره ثانيه و شفته لما كان عمري 13 سنه (( يعني قبل 3 سنين )) رد لي نفس الي شفته وكنت نايمه بغرفه التلفزيون وكان اخوي الصغير قاعد يلعب ولا اشوف واحد يفتح الدريشه وانا كنت نايمه قريب من الدريشه وينط هالواحد ويطيح رجله علي وينام جمبي ويقعد يبتسم وانا اقاوم ابي اقوم ما قدرت وبعدها لما قمت قلت لاخوي الصغير منو الي كان هني قالت محد !! ولما اقول هالسوالف لامي تقولي انتي تتوهمين وانا والله العظيم ما اتوهم ابدا بنات والله انا مقهوره على حالتي انا الوحيده الي بالبيت تصير فيني هالاشياء

وبقولكم يا بنات انه جتني فتره كانت رائعه وتهبل حسيت كأنه الحياه ردت لي وحسيت صج اني انسانه قبل سنتين يعني (( على آخر 2004 وبدايه 2005 )) كانت احلى سنوات عمري والله العظيم حتى هالايام قاعده اتذكرها وابكي واتمنى انه تصير حياتي مثل هالسنه يعني صج صج حسيت اني عايشه كانت سنه حلوه وسعيده (( كنت بهالفتره اشرب ماي زمزم واجد واصلي وارقي عمري بالاذكار وكنت مهتمه بعمري حيل مو مثل الحين )) والله يا بنات انا اكثر وحده بالعالم منحوسه بس بهالسنه كان حظي يكسر الصخررررر صارت لي شكثر مواقف وكنت اطلع منها مثل الشعره من العجين (( مواقف تهريب بالمدرسه هههههه )) وبعد رديت صرت اجتماعيه وزعيمه عصبابه هههههه وبعد ارتفعت درجاتي بالدراسه يعني سبحان الله حتى لو كانت دراستي مو ذاك الزود وشيرت بالامتحانات تطلع لي درجات شكثر اما الحين اولله العظيم ادرس ولا كأني بطلت الكتاب مززززفته (( وادعولي انه الله يشافيني خاصه الحين عندي دور ثاني وانشالله لما انجح فيه (( آمين )) بروح لأهم مرحله بحياتي وهي اخر سنه لي بالثنويه يعني سنه مصيريه يا بنات وانا طموحي طب ادعووووووووووولي تكفوووون )) وتدرون يا بنات انا قريت بقوقل اعراض السحر والمس والعين .. حسيت اكثر شي فيني المس وبعدين العين

حتى مره رحت لحداد وقلت له عن حالتي وقرى علي وقالي انتي لازم تاخذين جلسات عندي والله انا لما كنت اخذ جلسات اول شي كان راسي يعورني لما يقرى علي وبعدين خف العوار وبعدين تدرون شنو صاااااار ؟؟

أحس قامت تجيني مثل حالات الصرع شلون ترتجف اجسامهم !!! .. والله العظيم وقمت اشوف مشاهد مرعبه بالبيت اكثر من قبل وامي من قامت تروح له معاي ويقرى عليها قام ظهرها يعورها وقعدت اياااااااام على هالحال والله العظيم احس انها اتالم حييييييييييل كانت كلا تنام ما تقوم وانا بعد قمت احس بالعطش واشرب ماي وااااااااجد بس هم احس بالعطش من اول يوم قرالي فيه

وتدرون انا بعد قريت بقوقل انه اغلب المس من الجن يكونون يهوديين وما يحبون الصلاة ولا يصلون
وانا هذي حالتي احاول اغصب عمري على الصلاة بس لما اصلي تجيني نومة واقعد ثلاث ايام كل اقوم وارد على طول انام <<< أأأأأأأأأأأأاهم شي تددعووووووووووووولي اني اداوم على الصلاة تكفوووووون يا بنات انا حتى لما اصلي ابكي وادعي ربي انه يهديني دايما لصلاته وانتوا ادعولي

وبقولكم اني امس قريت سورة البقره كامله وقبل كنت اقراها بس كان راسي يعورني من جهه اليسار او من فووق بس من بعد ما رحت من الحداد وجلسات وقريت سورة البقرة حسيت من اعلى خدي اليسار الى رموشي اليسار مثل الشلل او مثل التنمل ما ادري شنو كان بس استغربت واليوم لما قريتها حسيت بهالشعور بس عند حنجي (( الحنك )) وبس للحين احس انه القفص الصدري من تحت عند بطني على جهه اليسار يعورني حيل ... ادعولي اتحمل هالعذااااااااااااب والله يشافيني

والله يا بنات انا مقهوره على نفسي حيييييييييل انا اعرف ناس يصيرولنا وسحارين وشغالين سحر علينا ((( يليت سحر واحد الا مليون سحر .. سحر يبون يفرقون امي عن ابوي .. سحر يفقرون فيه ابوي يا مال الفقر الي يفقرهم انشالله << والله اذكر جتنا فترة كنت ميته فيها جوع وبيتنا ما كان فيه الا ماي وقسما بالله اني مو قاعده ابالغ حتى كنت اروح المدرسه وما اكل شي يمكن 3 ايام قعدنا هالشكل لين امي راحت لمطوعه وعطتها بخور قاريه عليه وبخرت بيتنا وبعدها ابوي عطانا فلوس وشرينا اكل مع انه ابوي محامي ومو فقران بس من هالسحوره والطبوبه الي يسووها حسبي الله ونعم الوكيل حتى المطوعة الي راحت لها امي قالت هذول شغالين فيكم سحرررررررر وما استبعد اني مسحوره وممسوسه ومعيوووووووووونه ... ووالله قاعده اكتب هالكلام وانا ابكي ويليت احد يقدر ويرد علي ))

وامااااااااااااانه عليكم يا بنات تردون علي وتحسون بمعناتي انا حتى بيتي والنوم الي اقل حقوق الانسان مو قادره اتهنى فيه

اهم تدعون اني اداوم على الصلاة وسورة البقرة انا ابدا شوي اقعد ايام وبعدين اقطع مثل ما قلت لكم