كل عام وانتو بصحه وسلامه ياامهات
والله مااعرف من فين ابدى وكيف اشرحلكم المشكله
بس بحاول اختصر انا معلمه بنتي على الحمام من حوالي اكثر من سنه
وكانت تمام ماشاءالله صحيح تعبتني ووسخت البيت وعانينا انا وياها اول 3 شهور بس الحمدلله بعد
3 شهور تدريب وصبر وتعب وانعزال عن الناس والطلعات ضبطت معاها وصارت ماتوسخ نفسها وملابسها
من اول ماتحس انها بحاجه للحمام تجري عليه
تخيلو اكثر من 9 شهور مضبووووطه
ولايوم ماشاءالله لخبطت او وسخت نفسها لانها خلاص
تعودت وفهمت وصارت تقرف ماتبغى تتوسخ
وفرحت مره كان بالنسبه لي انجاز بعد التعب الي تعبته انا وياها المهم لما بدى رمضان جاتها حاله غريبه كل نص ساعه او ساعه تتبول على ملابسها وتنطوي على نفسها خجلانه مدري خايفه
مع اني ماخصامتها ولامره ولازعلت منها بالعكس اقولها حصل خير
واضمها واطمنها وافهمها انه شي ممكن يحصل لكن مره ثانيه
ننتبه اكثر وهكذا تخيلو طوال شهر رمضان الين يومكم هذا وهيه ولامره راحت الحمام
الا للكبيره اما البول وانتو بكرامه كله على ملابسها
المشكله وديتها طبيبه قالت مافيها شي ماشاءالله خفت يكون التهاب
والمشكله الثانيه انها قبل لما كانت تروح الحمام كانت كل 4 او 5 ساعات
بس يوم صارت على ملابسها تقريبا كل نص ساعه او ساعه بالكثير
استغربت بصراحه حتى قبل كنت اروح مشاوير حقت 3 ساعات وادخلها الحمام
قبلها ونرجع وهي لسى مااحتاجت حمام ماتدخله الا اذا رجعنا بوقت شكيت ان عندها سلس
لاقدر الله بس سويتلها اختبار وكذب ظني طلعت سليمه ولاتغير علينا شي ظروفنا هي هي
يعني من رمضان ماتغير شي ابد الشي الي شاكه فيه بس مابي اوسوس
ان اخوي مره جانا ببيتي وانا زمان عنه يمكن ماشفته من سنتين ونص لانه كان مسافر
وجانا بيتنا جلس يمكن اسبوع او اقل هو وزوجته وبنته استغفرالله مابي اظلم احد ومااحب اوسوس
بالعين لاني احصن بنتي بس مشكلتي احيانا انسى التحصين بس نادر
والله ياامهات وربي يشهد ان اخوي الله يهديه تقريبا كل يوم بس نجتمع يجلس يقولي
بنتك مؤدبه وش تسوين فيها بنتك تعرف تاخذ حقها ومره جلست بحضنه قام شهق اقسم بالله
ماكذبت قال الله الله الله مافي حفاظه :( شفتي يافلانه مو مثل بنتك والله ان قلبي وقتها
وجعني مدري وش السبب حسيت حاجه دخلت فيه مع اني مااخاف من الحسد ومتوكله على ربي
بس اخوي لسانه شغال عنها وعينه بس تراقب بنتي على الاكل شوفو فلانه كيف تاكل
والحفاظه تقريبا يطريها كل يوم مع ان زوجته ماتسوي زيه بس هو كان مستقعد لبنتي بقوه
حتى كنت مستغربه منه حسيته يكرهها واحساسي مايخيب مع العلم ان عمر بنتي 4 سنين
يعني طبيعي تكون متعلمه للحمام اجل وش يقول عن الي اعمارهم سنتين ونص وتاركين الحفاظ
بعدين يوم زودها قلت بمزح قول ماشاءالله وابتسم ابتسامة مقهور وماقالها سكت
مع ان ربي معطيه ومبسوط بس مدري ليش قلبه كذا
الزبده الحين كيف اتعامل مع بنتي وكيف اخذ اثر اخوي لانه مسافر ويمكن مااشوفه الابعد سنه
واذا تشوفون ان السبب ثاني ياليت ياامهات تساعدوني وش الطريقه المناسبه مع بنتي
اخاف ان سكوتي عنها يخليها تتمادى واخاف اخاصمها او ازعل منها وازيد الطين بله
وفي حركه ثانيه برضو من رمضان بدت معاها صارت تجمع حواجبها جنب بعض الين تصير اكس
وتعفس وجهها والله اخاف اذا سوتها طبعا تسويها لما تزعل بس محد زعلها تزعل من حالها
يعني لو كانت تبني بالمكعبات وطاحت منها تسوي هالحركه واذا جيت اقرالها قصه تسويها
يعني تكون رايقه وتسمع القصه وفجأه تعفس وجهها وتجمع حواجبها اقولها وش فيك ياماما وتلف وجهها
عني تبون الصراحه انا عجزت ماعندي حل لاني ماعرفت وش المشكله حتى راسلت اكثر من موقع
بس محد فادني كل كلامهم معاد ومنسوخ ضمي احضني اهتمي الخ
وانا 24 ساعه اضمها والاعبها وعندنا ورشه مشتركه دايم نجلس فيها اكثر من ساعه نقص ونلزق
ونرسم ونقص ونسوي اشغال يدويه يعني مو نقص حنان ولااهتمام
اخيرا دعواتكم لها :(
بالنسبه للي صار لك شي عادي انتكاسه تصير للاطفال عادي انا عندي ثلاث اطفال وعانيت كثير
واختي الحين بنتها بتخلص الاربع سنوات وصارت كذا زي بنتك
وبالنسبه للعين العين حق حتى من الام لولدها عادي مافيها شي تاخذين من الاثر
يعني اكبر دليل ولد اختي ماشاء الله حلوو زاروهم اصدقاء ابوه ومن طلعو الولد خلاص مايوقف على رجليه نهائيا
وراحو فيه مستشفى الحبب واشعه ومراجعات ولااستفادو شي .اخيراا قلت لها من شافه اخر مره قالت اصحاب ابوه
قلت باقي شي من اثرهم قالت لا قلت خلاص امسحي العتب وغسلي ولدك فيه وسبحان الله العظيم مشى الولد عادي بعد ماكانو مقررين له علاج طبيعي
والمعذره على الاطاله