ظلع @thlaa

محررة برونزية

انا زي البلونه الي تجمع هواء بعدين انفجرت

مرحبا
انا الله يسلمكم من يوم كنت صغيره في الابتدائي الكل يستنقدني من ناحية شغل البيت دائم اسمع عبارات وش ها البنت الكسوله ليش ما تشتغل ليش ما تنفع بس اكل ومرعى وما الى ذالك وكنت ذاك الوقت طفله في ثالث او رابع ابتدائي واستمر معي مسلسل التحطيم كل طفولتي كنت اسمع مثل ها العبارات من امي وجدتي وبعض الناس ابقولكم بعض ما كنت اسمعه واعيشه حتى ابين لكم الصوره صح
1- كنت راجعه من المدرسه وانا طفله في 4 ابتدائي وحتى جسمي مره صغير وكانت جايتنا ضيفه ولما سلمت عليها وانا داخله من المدرسه قالت المفروض انها اذا رجعت من المدرسه تقعد تكنس وتنظف قالت لها امي مامن وراها شغل وما تنفع
2- خالي كان يتكلم وانا جالسه قال ما شاء الله على بنات الفلان يشتغلن في البيت مو زي بعض الناس يقصدني قالت زوجته من تقصد ظلع قال ايه
3- كانت امي تعبانه ما تقدر على غسيل الملابس وقالت لها وحده خلي ها البنت الي عندك تغسل قالت لها امي كا العاده ما من وراها نفع واذا اشتغلت سوت شي ما تتقنه ردت الحرمه على امي قالت ها الحين البنات اصغر منها وكل شي يسونه
وهي ليش كذا طبعا كانت الحرمه تتكلم وهي تهاوش وانا كنت طفله
4- امي وخالاتي دائم يقولون لي بنات الفلان احسن منك يشتغلن ويسون وانت ما تنفعين بشربة ماء المشكله ان بنات الفلان 5 وعندهم شغاله وكبار عكسي بنت وحده وصغيره ومره كنت جالسه مع وحده من ها الخمس نلعب فدخلت علينا امي وقالت للبنت علمي ظلع السنع وقولي لها انا اشتغل في البيت مو بس تلعبون
5- مره كنت مع مجموعه بنات من اقاربنا وكنا اطفال وسئلتني وحده بكل براءه ليش ما تشتغلين قلت انا اشتغل قالت لا كذابه امك تتشكى منك وبدئو الاطفال يستهزئون بي وصرت مسخره لهم وغيرها من النماذج التحطيم التي ذقتها في طفولتي وكنت اسمع مثل ها المحاظرات وانا بس مطيره عيوني وما ادري وش اقول او اعبر او ادافع عن نفسي وكنت اكتم الصيحه واجمع بقلبي واجمع اجمع اجمع واكتم حتى كبرت والحين انا كبرت وتخرجت من الجامعه بس صرت انسانه معقده غير واثقه من نفسي
حاقده على ها الناس واتشره على امي لانها المفروض تمسك يدي وتعلمني الشغل وتامرني بس ما كانت تسوي كذا كانت بس ما غير تفشلني عند الناس وتشجعهم على قهري وتحطيمي
والحين تخيلو يوم كبرت صرت اكره الشغل واذا جيت ابسوي شي تجيني حالت قهر واعصب وودي اصرخ زي الي وده ينتقم
ما شبهت نفسي الا على البلونه الي مجتمع فيها هواء ثم تنفجر انا احس اني فاشله ما لي قيمه الناس احسن مني صرت اكره الناس
المشكله ان ها الحريم الي كانو يحطموني ويتكلمون علي وانا طفله الحين اشوفهم مره مدلعين بناتهم وهن كبار في الجامعه باقي شوي وياكلونهن وها البنات ما يشيلون ولا الصحن عقب اكلهم زي مره خالتي كانت عندنا واتصلت عليها بنتها الي في الجامعه وهي توها صاحيه من النوم وقالت لها يابنيتي اكلتي شي قالت لا قالت لها خلي الشغاله تسويلك اكل انا ناظرتها وانا ودي اصيح ودي اقولها الحين هذي بنتك وهي في الجامعه تعاملينها بكل دلع حتى ما تبينها تخدم نفسها طيب انا ليش وانا بزر تهاوشينني وتقولين ليش ما تسوي ليش ما تنفع
واخيرا يا اخوات لا تقولون لي امك وها الناس كانو يبون مصلحتك اقولكم بس مو بها الطريقه

874

يلزم عليك تسجيل الدخول أولًا لكتابة تعليق.

تسجيل دخول

عزيزة بربي • 14 سنة

طبيعي اختي كلنا كذا الشكوى لله نسكت همن تلقائي نطلع كل اللي عندنا

ونصيحتي لك استغلي بشئ روحي دور لك مدرسة اهلية واشتغلي بها

او ادرسي بدار تحفيظ

خلي كلامهم لك حافز على البناء لا الهدم

برووئه • 14 سنة

طيب انتي ليش عايشه في الماضي ومركزه كل تفكيرك عليه و مضيعه وقتك في الذكريات الاليمه

ليه ماتنسين اللي صار و تعتبرينه تجربه ناجحه تعلمتي منها كيف تربين بناتك في المستقبل

الزمن مايرجع لورا

و خالتك كان فيك توجهين لها الانتقاد ليه ماوجهتيه لها عشان ترتاحين ؟

معاك حلين

اما تعيشين في الماضي وما راح ترتاحين

او تنسين اللي صار زي ماقلت لك و اعتبريه خبره

حلوه مير مملوحه • 14 سنة

اسمحي لي اختي انتي حساسه بزياده والله انا عكسك امي اذا كنا في عزيمه كبيره تناديني تعالي تعشي ما اكلتي شي شوفي الحلا ذا ذوقيه
ما ادري ليه ااتضايق من هذا الشي مره ما ادري ليه امي تتحسسني اني بزر وانا بالجامعه تخيلي بس عادي طنشت وتعودت... صدق احنا دلوعات مايعجبنا العجب.. اتمنى اختي تطنشين وتعيشين حياتك

دلع اطفال • 14 سنة

الله يرحم الحال انا مثلك اشياء من الماضي عجزت انساها وسببت لي احباط

لكن الحمدلله شوي شوي صارت رماد باذن الله

»شاانتيهـ« • 14 سنة

أختي أطلعي من المآضي وتحطيم نفسك
خلاص اللي فآت مآآآت هذآ طفوله الان أنتِ شآبه وحيآتك تغيرت ..
حبيبتي أبتعدي عن الفرآغ أشغلي نفسك قد مآتقدرين
ولا تقعدين تقلبي الموآجع على حآلك وتضيقين صدرك على شي أنتهى ..