انا في حيرة من أمري اخلع هالانسان او ...

السلام عليكم ورحمة الله وبركاته
حبيباتي بنات حواء قصتي باختصار بليت بزوج عقله صغيييييييير والكل متأذي منه مو انا بس
انجبت منه ولدين وبنت عيون طويله حق بنات ومحادثات وليته كذا الا حتى اقاربي اذا جوني حريمهم يبصبص ويدخل ويسوي نفسه انه غلطان بلعناها انسان لايثمن كلامه لدرجة يشتمني بشرفي ويروح لبنته ويقول لها انتي وامك تكلمون شباب
اكره شيء عنده اذا طلبت منه ازور اقاربي او اخواتي لانه يشك برجالهم انا لااخفيكم كنت مخدوعه فيه لسنوات او بالأحرى مغفله وساذجه بنيت له بيت وكتبه باسمه وماكتب لي الا ربع المبلغ وبعد يتمنن علي فيه ويقول اني خدعته الين كتبه ساعدته كثييييير وحصل خلاف بيننا وقال اذا سويت الشيء الفلاني روحي لاهلك او انتي طالق لحد ماعفته ورحت بيت اهلي وبعدها طلب يرجعني ورجعت عشان عيالي ورجع مره ثانيه ضربني لمشاداة كلاميه بيني وبينه وصبرت ولكنه مازال يضغط علي واسلوبه جدا منفر يعني بان ع حقيقته بعد المشاكل انسان لايفكر في العواقب همه نفسه ودائما ماتصور له نفسه انه هو الصح وجميع الناس خطأ والكل يتآمر ضده انا اكتشفت انه نقص بالعقل وداء عظمه المهم حصل خلاف ورحت بيت اهلي ورجعني للمره الثانيه واشترطت اني ماخلف منه السبب خوفي من بهذلة اولادي وتهديده لي الدائم بأخذهم مني ورجعني المهم حصل خلاف للمره الثالثه وكان دائما مايردد اذا ماعجبك روحي لاهلك وابي عيال قمت تركت له البيت ورحت لاهلي والان انا في حيره من امري يعلم الله اني بين نارين واني في عذاب لايعلمه الا الله انا يابنات كرهته لدرجة وقسما بالله ان وزني نزل لاني عايشه معه وانا ضاغطه ع نفسي عشان عيالي واحس لو ارجع له بمرض وبموت وبحرم عيالي مني والله ماابالغ انسان متعب ويكفي انه انكر ونسي كل اللي سويته عشانه وماقدر العشره ولا قدر ابوي اللي كان حتى وهو الغلطان يوقف معه والله انه يسب ابوي بابشع الالقاب ويلعنه ويتحسب عليه وهو حتى عماله يشهدون له بالطيب والذكر الحسن وانا ماكنت مقصره معه ولا بشي لكنه نسى كل هذا وصار يضغط علي بعيالي وصاروا سلاحه اللي يرفعه ضدي
للعلم عيالي مايحبونه والحين يترجوني اخذهم مدري وش اسوي الرجوع مااقدر ارجع له لانه طاح من عيني وطلبت منه اكثر من مره يتزوج ويتركني اربي عيالي لكنه يرفض لان ماعنده استطاعه مو تقديرا لي طبعا
الحين انا عند اهلي وعيالي معاه يقاسون الالم تخيلو يخليهم باليوم واليومين لحالهم كل اسبوع و وجوده مثل عدمه
ابي ارفع قضية ضم لهم واخذهم بس اخاف ماتجي بصالحي شوروا علي تكفون وادعوا لي ان ربي يختار لي الافضل
الله يفرج كربه كل من تساعدني ولو بدعوه