انتي بتتحملين هالتصرفات والا انا حساسة

السلام عليكم 
خواتي دلوني و انصحوني 
علاقتي مع زوجي كل مالها تتدهور
والسبب استهتاره ومزحه اللي يتعدا الحدود
وخصووووصا عند اهله
المشكلة كل يومين يقول بفطر عند أمي ولاااازم أجي معه والا قلب اليوم ونكد علي وعمي يحب عيالي ويعزل اذا ما جينا معه 
وإذا رحت شوفي انواع السفه والتطنيش انا والجدار وااااحد
ناديته على السفرة خمس مرات ابي شي جنبه ومعطيني طاااااف و لارد في الأخير اخوه مده لي وكللللل العيون علي 
قال انا بصب العصير وسأل اهله كلهم وش تبون ولما جاء عندي ما سأل
مزحه الله يهديه مرررره يزودها انا أكل الا يقول شويش لا تلفين الصحن قلت اذكر الله وبعدين وش آكلي أكل عصافير قال هين ما شفتوها في البيت زين ما تاكلني
و بعدين بنتي شريت لها فستان يقول لو ما دقت علي ذي تقول تعال ادفع وانا مالي حيل أدور غيره كان معصي ادفع اجل فستان ب 200 
واهم الله يهديهم قاموا يزيدون الطين بله تقولي اجل اخوي بخيل ما شفتي رجلي بيشتري لي ذهب ب 4000 وهو يبخل عليك ب 200  كلهم قاموا يعلقون

هذا غيض من فيض مزحه عند الناس تعدا الحدود في البداية كنت أتقبل واضحك واعتبره مزح بس الشي لا زاد عن حده انقلب ضده
معتبرني نكتة عندهم وهم يضحكون شماتة علي
صراحة طلعت زعلانة ولما كلمته قال انتي عقلك عقل بزران صرتي مثل غيرك واصلا ما احد جاب خبرك وبعدين شفيها لا قلت معصي ادفع في بنتي 200 انتي شايفتني ادفع اكثر وفهمته ان المسألة مو مسالة كم دفعت الرسول صلى عليه وسلم قال خيركم خيركم لأهله وانت تحاول تظهر صورتك العكس 
طبعا تكلمت ما تكلمت ما يفيد 
انا من كثر استهتاره فيني وفي عياله عند الناس صرت اتحسس من اي شي منه 
ضحكي معه قليل تمر ساعات مااتكلم معه وانا داخلي ودي ان علاقتنا تتحسن و يكون فيه احترام وتقدير عند الناس والا هو في البيت طيب وحنون بس شالفائدة وهو كاسر صورتي ومعتبريني الناس ضعيفة ومظلومة منه
ابي نصائح ربي يرزقك من غير لا تحتسب