انصحوني واسمعو فضفضتي

السلام عليكم ورحمه الله وبركاته ..خواتي مبارك عليكم ماتبقى من الشهر واسأل الله ان يتقبل قيامنا وقيامكم ..

حبيت افتح لكم قلبي واشارككم الي في خاطري لأني حسيت انكم مثل خواتي وشفت تفاعلاتكم مع المواضيع ولاحظت انه ردودكم فعلا طالعه من قلوبكم

انا اكتب هالموضوع ابي افضفض واطلع الي ف خاطري وابي القى الحل لمشكلتي وحتى لو ماكان فيه حل جذري يمكن القى طريقه تساعدني وتخفف عني

انا متزوجه من ٥ شهور ولله الحمد وحامل زوجي انسان طيب وخلوق ومحترم وانا مرتاحه معاه .. قبل العرس فتره الملجه كانت ١٠ شهوور لأنه صارت لنا ظروف وفاه يدتي فأجلنا العرس فتره ..

مشكلتي مادري من وين ابتدي فيها وهي بدأت من اول ماتملكت .. كنت مثل اي بنت فرحانه لكن بدأت تنهال علي المشاكل .. اول شي حفله الخطبه طبعا كل الترتيبات كانت على اهل زوجي وزوجي من الألف الى الياء .. امي طلبت قاعه وحجزنا القاعه بعدها امي رفضت ان اي طفل من طرف اهل زوجي يدخل الحفله وكلمت اهله وصار خلاف وريلي اصر ان اخته الصغيره تحضر الحفله وامي رفضت وقالت له كنسل كل الحفله ورفض لانه دفع للقاعه وامي اصرت على رايها وقالت له اجل العرس ٤ سنوات لين تكبر اختك وريلي زعل من كلامها وامي حلفت انها ماتحضر الخطوبه وزعلت مني وكانت تهاوشني وتقولي انتي بعتي امج عشان زوجج وتبين تمشين كلامه وكلامي لاء واقنعها اخوي انه تحضر وحضرت وكل يوم كانت تقط علي كلام وكنت اسكت مابي اخلي المشاكل تكبر وبعدها نفس الشي بالعرس زوجي حجز قاعه مستواها متوسط والتجهيزات كانت على مستوى راقي من كوشه وطاولات وهالأمور امي رفضت تحضر العرس وقالت القاعه مش مستواي وكلمت زوجي انه يغيرها وقالت ان هالقاعه بتفشلنا قدام الناس وكانت تكلمني عشان اقنعه وكلمته قالي انا ماحصلت قاعات القاعات كلها محجوزه لان احنا حجزنا متأخر بعد وفاه يدتي وكنسلنا حجز القاعه الفخمه بسبب ظرف الوفاه والتأجيل
وبعد شوشره كبيره امي اصرت انها تختار كل شي بالعرس من كوشه وتجهيز ورضخت لها ورحت معاها المحل الي تبيه واخترنا منه .. وعدى العرس الحمدلله بس عماتي كانو يتشمتون بالقاعه انه مستواها متوسط بس ماهتميت لهم ..

وبعد العرس انتقلت بيت بروحي انا وزوجي وجاتني خدامه بس زوجي قالي ان السياره محتاج وقت علشان اطلعها يعني كم شهر ومشواريج انا بوصلج واذا ماقدرت استخدمي دريول هلج

وكنت اطلب من هلي السايق عشان يوصلني الجامعه كانو يرفضون ويقولون لي ان بيتج بعيد للعلم انه يبعد ربع ساعه عن بيت اهلي.. ويقولون خلي زوجج يطلع لج سياره هو ليش بخيل وانتي تخسرينا بترول وطبعا كنت استحي اقول لزوجي انه هلي يقولون لي هالكلام فتحججت ان سايق اهلي دايما مشغول فجاب لي زوجي سياره مستعمله من بيت اهله استخدمتها فتره وبعدها زوجي ستفر يكمل دراسته وانتقلت لأهلي وحاليا رجع زوجي اجازه بعد الاذان طلع زوجي عنده مشاوير وانا كنت ف بيت اهله متجمعين قلت له مب مشكله بكلم دريول اهلي يرجعني البيت وكلمته واول ماركبت السي اختي اتصلت فيه اتقوله وينك قالها انه بيوصلني قلت له عطني بكلمها كلمتها قلت لها تبون السابق قالت لا بس امي تبيه يشغل سيارتها لانها بتطلع ( امي تسوق ) وسمعتها تقول حق امي انه السايق عندي سمعت امي تصارخ وتقول هاذي شفيها ليش ماتكلم دريولها يجيها وصمرت التلفون بسرعه لاني مابي اسمع كلام يزعلني بعدها بشوي ابوي اتصل ع السايق وساله وينك وقاله انه يبي يكلمني ولنا كلمني قالي ليش زوجج مايطلع لج سياره قلت له ان شاء الله بيطلع لي وسكرت وتضايق وايد ونزلت بيتي وانا اصيح زعلت لانه هلي مستكثرين علي السايق وانا نادر اطلبه انا ماقدر اكتب كل التفاصيل الي تصير بس وايداسمع كلام يضايق ودايما امي تقولي زوجج بخيل زوجج ليش مايجيب لج ماركات حتى في فتره الملجه لما يجيب لي شي واراويها تقولي هذا مب الماس هذا اكسسوار هالشنطه مب ماركه ليش مايجيب لج شنو قاصره .. انا ادري انها تبي لي كل شي زين وكل ام تبي لبناتها افضل شي بس كلامها يزعلني وبمناسبه او من غير تقولي اي تزوجتي ونسيتينا خلاص ودوم لما تتكلم مع خواتي تقول محد منكم بينفعني كان نفعتني اختكم الي من تزوجت نستني .. للعلم والله مايمر علي اسبوع الا وانا عندهم اذا طووولت اسبوع وغالبا انا كل يوم عندهم لما زوجي يطلع مشاويره ينزلني عندهم

انا مضايقني كلامهم ومزعلني انه يستكثرون علي دريول ويستكثرون علي اشيا وايد ماذكرتها

:(