بطاقة الصراف...تووووووووبه أعيدها,,

السلام عليكم ورحمة الله وبركاته


تسييف الحال؟؟يا بنات..إن شاء الله تمام..


أبقول لكم سالفه صايره لي العام


الموهم..مرتن من المرات وبسنتن من السنين..السالفه بالعام الماضي..


رحت أنا وأخوي لم بيت أختي ..وكانت بمنطقه غير منطقتنا


يعني تبعد حوالي ساعه ونص بالسياره ويومين بالدباب :7_5_127:هع هع

الموهم وصلنا وتقهوينا وريحنا..وأخوي يبدى يمسك


البلاي ستيشن ويلعب من الطفش <<تراه كبير بس يحب


البلاي ستيشن..والمشكله أن رجل أختي يلعب معه:arb:..ما علينا


اما انا واختي قاعدين بالصاله تناظرني وأناظرها..الى درجة اني حفظت ملامحها غيب..خخخخ


وبعد حوالي ربع ساعه تطن براسي فكره..وافز من الكنب


واقول لأختي :ورى ما نروح السوق نغير جو ونشوف اسواقكم


وتقولي اختي:والله جبتيها يا.....! ! أبقول لرجلي يجدعنا ((يقطنا))بالسوق وهو يروح للدوام..


الموهم رحنا انا واختي واخوي السوق..:3_10_6:


ودخلنا المجمع..عاد المنطقه اللي فيها اختي شبه نائيه يعني الاسواق والمطاعم اللي فيها تنعد على الاضافر ,,يوووه قصدي الاصابع..يعني بأختصار تطور متأخر..


الموهم..اول ما دخلنا فكرنا بالاكل نبي نتعشى,,(الجوع مايرحم)


ونروح نقعد بطاوله وتحلف علينا اختي الا هي اللي بتعشينا على حسابه ..وانا اقول:لا وشوله احنا اللي بندفع خلي فلوستس لتس


وانا بقلبي متشققه بآكل ببلاش من قدي ..


الموهم كل واحد مننا اختار الطلب اللي يبيه..


وهنا بدت المشكله ! !


فتحت اختي البوك ومالقت كاش قالت:مابوه مشكله ابروح اصرف وأجي..


قال اخوي:لا خلاص وشو له انا بدفع ويفتح البوك


وليقى البوك مابوه الاريالين ..وابدى اضحك عليه واقول:ههههه ثالث متوسط زما معك الا ريالين


..واقول خلاص خلاص انا بدفع


لا تصجوني ..وافتح البوك بكل كبرياء وفخر والقى فيه 13 ريال


ومن الفشيله قلت خلاص انا بروح للصراف واصرف من بطاقتي


الموهم نروح كلنا وندور صراف وندور وندور يمين يسار الدور الاول والثاني ما حولك احد..



ثمن راح اخوي يسأل السكيورتي ..اخوي :لوسمحت وين الصراف اللي بالمجمع..


السكيورتي:للأسف مافيه صراف بنفس المجمع.بس فيه صراف


حول المجمع بس فيه عطل ..



اخوي: مشكور ويعطيك العافيه..


ويجي اخوي ويقولنا عن السالفه ويجينا ذاك الاحباط ..


ياربيه وش نسوي المطاعم ما تقبل بطاقه لازم كاش مني..


وبعد تفكير استمر حول عشر دقايق..واطلع لهم بفكره


جهنميه..وهي اننا نروح أي محل ونشري منهم قطعه


يكون سعرها حول الميتين ..وفعلا دخلنا محل وأذكر انه محل واي باي..وندخل نحوس ونتفرج على الخلاقين والمشكله انه كان وقت تخفيضات..


المعروف ان اغلب المحلات مافيها استرداد المبلغ وقت التخفيضات..


الموهم خذيت قطعه هي ما عجبتني بس عشان استرد قيمتها ..وبعدين خذيتها ويوم رحنا للمحاسب وكان هندي سألناه وقلنا في تبديل قال ايه وقلنا فيه ترجيع قال ايه..


ويحاسب البلوزه وكان الحساب على ما اظن 230 وسحب من البطاقه المبلغ ..


ورحنا لفينا شوي ورجعنا للمحل واتفاجئ قدامي المحاسب مصري:blink: والهندي راحعلى جنب..


واقول للمصري:ترجيع لو سمحت


المصري:الفاتوره لو سمحتي .


انا:تفضل


اول ما قرا الفاتوره قال :القيمه اللي تنسحب من البطاقه ما ترد..


وبلحظتها حسيت بمويه بارده انكبت بوجهي..وانصفق وجه اخوي واختي..:11retcher


وقلت للمحاسب :بس المحاسب اللي قبلك قالي فيه ترجيع ..


المصري نادى الهندي وقاله:انتا فيه كلام ممكن ترجيع فلوس من بطاقه؟؟



قال الهندي:انا ااا مافي كلام بسسس ...الموهم بدا يتلعثم بالكلام..


بعدين قال المصري:يأختي اصلا مافي ترجيع مبلغ لأننا بوقت تخفيضات ..وكمان انتي بطاقه,,


عاد انا عصبت شوي وقلت هذا مو شغلي وانا مو مسؤوله ..


وبعد شوشره مدتها 5 دقايق قال المصري خلاص مش مشكله حرجع الفلوس



واخذنا الفلوس وكلينا بالمطعم....ووووووو..الخ



الخـــــــــــــلاصه..انا تندمت من هالحركه وحسيت انها حيله وتعبت المحاسب عند الترجيع..وشريت من عندهم بنية الترجيع..

وأعتبر هذه الحركه نصب واحتيال..



وتووووووووووبه ..ما أعيدها مررره ثانيه..



ونصيحتي لكم..لاااااااااا تسوون اللي سويته ..


وإذا كنتو بتطلعون مكان استعدوا بالكاش مني ,,لأنه محد يضمن


وجود الصرافه باي مكان كان ,,وان كانت موجوده ما تضمنين صلاحها..


ولا ترى بتقعدون من غير عشا .خخخخ




واتمنى تكون سالفتي خفيفه عليكم ..وتعتبرون منها..


وتقبلوااا تحياتي...والسلام عليكم ورحمة الله وبركاته



انتظر ردودكم...