بعض التفاصيل ماتحكى ...

مساكم الله بالخير وبالرضا وبالعافيه
كتبت الفجر موضوع "فرجت وكنت أظنها لاتفرج..
أخبركم فيه عن قرارنا في الانفصال
كثير عارضوا الفكره والقرار وخوفوني من فكرة الطلاق
وكان صعبه ارد على كل مشاركه
لكن راح أكتب رد هنا للجميع
سبب الانفصال عن زوجي مو زواجه ابداً
أنا ماتقبلته بعد ماتزوج لكن مافكرت انفصل عنه
وكنت أقول بعطي نفسي وقت إلى سنه سنتين
ليه ماتقبلت ؟! وهذا شرع وووو
انا ماعارضت الشرع ولا منعت زوجي ولا طلبت طلاقه لأي وحده ويشهد علي ربي حتى في دعواتي ماادعي يطلقها وادعي ربي يهنيهم ويكفيني شرهم
أما التقبل فهذا شيء مو في اليد هي مشاعر لا اراديه وسعيت واجتهدت حتى اني اشتريت كتب تساعدني ولا فاد ..
وسبب قرار الانفصال مو عدم التقبل نهائيا
زوجي انسان مستفز جداً ووضعه المادي صعب
وفيه عيوب وتفاصيل ماتحكى حتى هنا للي مااعرفهم
عيوب من قبل زواجه لكن كنت اتجاوزها وأمشي الحياة
بعد ماتزوج اكثر من مره صرت مااتحمل هذي العيوب وهو صار مستفز أكثر وزادت المشاكل على اتفه الأسباب
ولو اذكر لكم شيء من المشاكل الكل بيأيدني وممكن حتى تتحسبون عليه وتدعون عليه ..
لكن اتركها لحكم ربي ...
بالنسبه لسؤال بعضهم تقدرين تتحملين مسؤوليه العيال !؟
لا ولا راح آخذهم معي الا اذا كونت نفسي وقدرت استقل بإذن الله
ببقى معهم لنهاية هذا الترم يخلصون دراسه واخلص انا العده
وبعدها انتقل لذمه ابوي وبيت أبوي
عمري ٣٠ سنه ولا أفكر أكرر تجربه الزواج
وهدفي أستقل مادياً واشتغل على نفسي اكثر
عيالي ماراح أرميهم لزوجة أبوهم
جدتهم بتاخذهم وهي أنسانه تخاف الله وتحبهم وتعاملهم أحسن معامله
مستوى أهلي المادي أفضل من مستوى زوجي وأهله بكثير .. فما راح اندم على مصروف او سكن ماحصلت فيه طمأنينه وراحه ..
وأبوي شخصيه معروفه ورجل حكيم وتوقعت يرفض القرار لكن بعد ماعرف التفاصيل قال بيتي مفتوح لك والله يدبرك على الصالح ولا ترضين بالسوء وعندك أهل ...