بنات ادعولي الله يعوض علي ويغفر لي

السلام عليكم خواتي .....

ببتدي بالموضوع على طول اكتشفت اني حامل تقريبا من ثلاث شهور ، وبدايه ما دريت احس بدوخه وارقد على طول فكرت اني تعبانه ما لاحظت الموضوع عشان كنت ماخذه احتياطاتي وهي عادة الدورة بتاخر علي اسبوع وزيادة بعد ما ربيت اول مرة الله يخلي عيالكم عقبها اكتشفت اني حامل بعد 20 يوم وكنت حامل بخمس اسابيع والصراحه يا بنات ما كنت ابي الحمل بالوقت هذا ولدي ما خلص السنتين وتدرون الاطفال واسنانهم واسهال ولا رقاد فالليل يعني انتو ادرى والخ الخ

كنت اصيح كل يوم واقول يا رب ليش عطيتني فالسجود اكثر شي اصيح اني مابي الحين (استغفر الله العظيم) وانه اكثر شي خايفه كنت منه الولادة والام الطلق والوحام وتدرون النفسيه والهرمونات كل شي يتغير فالحرمه ،وبعدين رحت ثاني موعد وكان البيبي نبضه زين وكويس الحمدالله وعطتني موعد ثالث على بداية الرابع وانا عالحال هذي بيني وبين نفسي وكان عندي ظرف شوي مع زوجي كاعادة الي يصير بين كل الناس واي شي يبكيني

عقب اسبوع صرت احس بدوخه فظيعه وتقلصات خفيفه فالرحم فكرت ان هذا عادي ومر اسبوع الثاني وانا عالحال نفسه والتقلصات تروح وتجي لين ما رحت الموعد وكشفت علي الدكتورة وصورت البيبي

وتدرون شنو صار ؟؟؟؟؟

اتاري البيبي متوفي ببطني من اسبوعين ونصف ولا ادري بالسالفه والله يا بنات اني انصدمت صدمه ما تتخيلونها وبديت اصيح انقهرت عليه وايد وبعدين قالتلي الدكتوة سبب الوفاة يا تخثر فالدم او نقص فالنمو وحولتني طوارئ وتميت اسبوع عشان قالولي فالمستشفى يمكن يطيح من نفسه

مابي كثر من الكلام وقبل ما ينتهي الاسبوع صادني عوار جامد قوي ونزيف ورحت الطوارئ ودخلوني غرفة العمليات واتضح انه رحمي مفتوح 6 سنتم على انها ولاده طبيعيه قسما بالله يا بنات اني كنت اصارخ من الالم كاني اربي صج وعوار طلق ما قدر اوصفه ساعه عالحاله هذي وبعدين عطوني ابرة ودواء بالكلوكوز لتخفيف النزيف على انه بطيح من نفسه وفعلا عقب خمس ساعات طلعوه الدكاترة كانها ولادة طبيعيه وصوروني تيتأكدوا انه خلص ما في شي داخل والحمدالله

انشالله يكون اجر بس اني متحسفه وايد عاللي كنت اقوله لرب العالمين واطلبه وقلت هذا عقاب من ربي عاللي كنت اقوله انه مابي الولد الله يغفرلي كل ذنوبي ويقبل توبتي وانتوا يا بنات ادعولي الله يخلي ولادكم وما تشوفون شر انشالله

سبحان الله وبحمده سبحان الله العظيم ، لا حول ولا قوة الا بالله