بنات.. الملقوفات شلون تتعاملون معهم

السلام عليكم..

انا وحده عايشه ببيئه مختلفه عن الجامعه اللي نقلت لها الحين.. مع اني ماخذه فكره من قبل عنهم انهم ناس منغلقه وبتصير فيه انصدامات كثيره خاصة لا ناقشتهم بشي.. فحطيت ببالي اني ما احتك كثير الا مع اللي اعرفهم بس.. واذا راح اتعرف تكون العلاقه سطحيه جدا.. الا اذا الله وفقني باخت صالحه على الاقل تفكيرها مناسب لتفكيري..وفعلا الوضع كان اكبر من توقعاتي

هذا الحين كله ما هو مهم.. المهم يا بنات .. ان طلعت لي قريبات هناك :(.. و هذولا اهلهم ما يجي منهم غير المشاكل و نقل الكلام و وجع الراس.. وحده منهم طيوبه وحبوبه وكانت تبي تشوفني من زمان.. انا ما ادري هي من فرحتها فيني والا من كثر قرقها صارت نص الجامعه تعرف اني اقرب لها .. المهم شفتها وكان عندي بريك.. وقعدت معها.. ودووب اسئله شخصيه.. انا انحرجت ورديت ردود بسيطه.. بعدين جات وحده تقرب لها وعرفتني عليها.. وراحت على جنب تقول لها قصتي اني جيت للجامعه ونقلت من منطقه و حولت وتقصر صوتها على بالها ما راح اسمع .. و المشكله قدامي هههههههه ..البنت هي خلقه ثرثاره انا قعدت معها يمكن ثلاث اربع ساعات وهي ماشاء الله كل شي صار امس تقول له.. وعادي عندها تتكلم عن اي احد او عن اي شي.. انا احسها بطيب نيه .. بس انا ما احب ذا الاسلوب .. لاني اعرف لو اقول اي شي راحت تقول لاهلها كلهم ! حتى الاشياء البسيطه اللي قلت لها عليها تروح تنقلها لهم ويصير الكل يعرف عني وعن اموري .. واكره شي علي اهلهم من يسمعون شي لو هو ما له داااعي .. كل العالم تدري بالسالفه وتجي اتصالات صحيح بنتكم انخطبت؟ صحيح بنتكم بتتوظف؟ ... الخ الخ

المهم انا ما اعرف وش اسوي .. قلت في نفسي لا شفتها اسوي نفسي مشغوله واروح ..
او اكلمها واقول لها ما ابي احد يتدخل بخصوصياتي .. :( حتى لو كانت سوالف عاديه جدا..بس تخيلوا اقول هالكلام لوحده فرحانه بشوفتي.. اخاف بعدها تزعل او تتضايق او تفهم غلط.. او اهلها يقولون من هالكلام المقلوب دامها كذا اجل هي ما تبيك :(

انا فهمت ان عادي عندهم هالوضع.. وان الاسئله هذي عاديه بعد.. واني اسأل اسئله مالي دخل فيها برضو عاااادي جداا..

وغير كذا والله اني منقرفه من المنطقه اللي نقلتها للدراسه.. مع انها جامعه كبيره .. بس ما ادري وش اوصف لكم ..و المشكله انهم هم الصح بعد هههههه
انا اختي تدرس بجامعه ثانيه .. ولا قلت لها اللي يصير لي مع هالبنات تستنكر وتقول معقوله للحين فيه بنات كذا :( واختي الثانيه بكلية ثانيه معي بنفس المنطقه .. بس بكلية وتعاني منهم وريحت عمرها انها دايم لا شافت ناس قلق تقول انا الحين مشغوله وخلينا نشوفك وتروح تتخبا بين دواعيس الكليه ههههههههه

البنات برضو يحرمون كل شي من راسهم.. ويظنون بالناس الافكار الشينه..
وغير كذا لا تناقشت معهم :( .. عقول قديمه ما تبي تفكر .. رغم ان فيهم طيبه .. بس شكل التخلف عاده ..
فجأه تنط لك وحده .. تقول اني من ديرتهم.. وانا بهدوء اقول لها لا انا من المكان الفلاني.. وتحط ايدها على خصرها وتقول لااااه .. لحوول يعني انتي ادرى مني بأصلي؟

طبعا هذا ليس سوى غيض من فيض يا حبيباتي ههههههههه انتوا بس تعالوا معي تذوقون المِر هههههههه

قولوا لي جد يا بنات وش اسوي؟ اللي جربت هالمواقف وش سوت؟ شلون تعاملت معهم؟ وش ترد عليهم عشان ما يتمادون اكثر؟ لان لاعت كبدي بقووه.. خاصة اني نااادر اعطي وحده وجه هالايام حتى اني استعبط كثير عشان افك نفسي من شرهم ..

؟؟ :(