بنات ..... تتوقعون شنو السبب لهذه الكذبه ؟؟

السلام عليكم ورحمه الله وبركاته ..

امس ريلي قالي سالفه .. عن رفيجه و حبيت اني انقلها لكم عشان تعطوني آرائكم

انا كونت رايي و قلته حق زوجي ! بس اهوا ما اقتنع فيه .. قلت له ترا ما يعرف للحريم الا الحريم !!

بس هم ما اقتنع ... المهم

المشكله وما فيها .. ان رفيج زوجي من ثلاث شهور واهوا يفكر يبي يتزوج

وقالوا له عيال الحلال على بيت ابوهم زين على اساس انه يخطب منهم

بالفعل الرجال راح و خطب

بعدين بدأت المشاكل .. اول شي شور الخطبه و الزواج بيد ( ام البنت ) !! و ابو البنت كلش ما له اي دور لدرجه ان رفيج زوجي يقول ( سكانه مرته ) اهي اللي ممشيته !!

و صارت مشاكل . بيوم الملجه ( كتب الكتاب )
جاء المعرس وحدد موعد مع ابو البنت على اساس الملجه !! راحوا دقوا عليه بنفس اليوم يأجلون الموعد ؟
المعرس زعل لان ابوه كبير في السن ( حيل كبير ) وحركته صعبه ووده يحضر الملجه . وعندنا الملجه تكون في بيت العروسه و هم اجلوا يعني راح يضطر الرجال ( المعرس ) انه يجيب ابوه ويتعبه معاه مره ثانيه !!

راحت الام ودقت على المعرس وقالت له ( يوم معين عشان الملجه ) راح المعرس رد عليها و الله اليوم هذا انا مو فاضي !! ( ليش ؟ عشان يبي يرد لهم الصاع )

انزين اهوا للحين متمسك بالبنت انه يبي يتزوج ( بس صار يبي بس يتزوج من غير تفكير )

الحين البنت تشتغل في مكان فيه ( دوام ليلي ) شفتات مكان خايس بمعنى الكلمه ( عندنا في الكويت ) وسمعته زفت !! خاصه بين الشباب ( المطار ) اوكي

و الحين المعرس يقول حق زوجي بعد ما كتب الكتاب :) الملجه

انا ما ابيها تشتغل هناك لان سمعه المكان خايسه ومو حلوة وفيها بيات خارج البيت !!

ريلي قال حق رفيجه ( المعرس ) دق على ابو البنت وكلمه لا تنطر لوقت العرس او بعد العرس لان مو زين !!

ريلي اصلا مو موافق ابدا على مكان عمل العروسه ونصح رفيجه انه يفك الزواجه هذه !!


المشكله او خلني اقول اللي زاد الطين بله ان المعرس دق على ريلي وقال له ...
انا رحت سألت عن البنت وعرفت من بنات عندها في الدوام ( رفيجاتها ) انها مسويه اشاعه داخل دوامها ان ....
ابوها غصبها على الزواج من واحد اكبر منها بالسن !!


اهني زوجي عصب و زعل على رفيجه ...

رفيج زوجي قال ابي افهم ليش جذي تقول .. اهوا صج اكبر منها بس مو كثير و هي ما رفضته ولا ترددت في الزواجه هذه بالعكس كانوا حيل موافقين عليه اهيا و اهلها !!

صراحه لما قال لي زوجي الكلام هذا قلت له شغله واحده .. ما يعرف للبنت الا وحده مثلها
شوف يا ولد الحلال هذه تعرف لها واحد في نفس مكان العمل و سوت الاشاعه هذه عشان لما يجي الرجال يتشره عليها ويسألها ليش تزوجتي ؟ تقول له ابوي غصبني على الزواجه هذه !!


ريلي سكت وقال ما اعتقد ان هذا السبب !!!


بنات انتم معاي ؟ نفس رايي

وله لكم راي ثاني .....