بنات تكفون ابغى وحده حكيمة تحل مشكلتي مع زوجي

السلام عليكم

الله يفرج كل وحده تساعدني بعد الله في حل مشكلتي

بنات راح اعطيكم نوع من التفاصيل لاني ابغى رأي سديد
متزوجه من زوج طيب معي ومكرمني لكن تعرفون ما احد يكمل
لكن فيه صفات تفقع القلب وربي
فيه عدم مبالاة بمشاعري ، يعني تخيلوا متزوجين من سنوات ولا رزقنا الله بذرية ويوم حللنا طلع فيه عقم شديد و بعدها ما عالج يعني كانه يأس استغفر الله، و انا واثقة من محبته لي لكن مو من حقي بعد انه يفعل الاسباب؟!
والحمدلله كل شيء بيد رب العالمين
صارت حياتي فيها هموم ما يعلمها الا ربي ولا اصارح احد فيها وحتى زوجي كنت اقول له الحمدلله انا راضيه بالمكتوب ولا راح اتخلى عنك لاني فعلا احبه وما اتخيل اني انفصل عنه بس لازم العلاج ..والله يعوضنا خير

مرت سنوات بدون علاج بعدين زوجي هجرني في الفراش تخيلوا هجران الفراش في البدايه اشهر والان لنا سنه ونصف كاننا اخوان والله يبنات ما ادري وش السبب؟
لا تقولوا سحر لان الحمدلله مجتمعنا ملتزم ولا حتى عندنا شغالات.. بتقولون عين، أقول الله اعلم يمكن
بتقولون متزوج لا انا اعرف زوجي هو فيه والله اعلم عجز جنسي بس ما صارحني
والله أصعب شيء علىالزوجه ان زوجها يهجرها وما تدري وش السبب
طبعا سألته وكلمته باللين وبالهواش والعنف كله ما نفع .. يقول خير وبس
حتى المداعبة اللي بين الزوجين والتقبيل انتهى :icon33:
ساد الفتور في حياتنا، اصبحت حياتنا ممله بشكل رهييب والله كأني عايشة مع اخوي
الحمدلله أنا جميله وبشهادته اهتم في نفسي والبس واتعطر ووو
والمشكلة انه لما يشوفتي متعدله ومكشخه ما يحط عينه في عيني ويتهرب مني والله يا بنات مدري وش السبب:icon33:

هذا الوضع سبب لي ضغوط نفسية اثرت على شخصيتي وعلى صحتي لاني اكتم وما اصارح ولا اشكو الا لرب العالمين الكل يظن اني اسعد انسانه حتى اهلي
شخصيتي صارت عنيفه اتهاوش مع زوجي لاتفه الاسباب، واي مشكلة صرت الومه واعيره بعجزه وادعي عليه واطلب الطلاق وانا ما ابيه ثم اندم واخاف ربي

اخواتي اللي مقطع قلبي انه مو حاس فيني ابد ومو مقدر صبري كل وقته برا البيت واذا لمته وذكرته بتضحيتي قال ما غصبتك تبين تروحين لاهلك روحي مع اني احبك ولا ابيك تتركيني

اليوم صار بيننا مشكلة وسببها الطرفين، وقعد يعيرني باني عقلي صغير واني طويلة لسان وقليلة ادب
لاني ذكرته بتقصيره في حقي

تكفون كيف اتفاهم معه في هذا الموضوع؟ لا تقولون اذا صار راضي ووو لاني جربت وما نفع في الرضا يقول يصير خير وفي الزعل ما غصبتك تجلسين عندي لانه عارف ما راح اسويها و اننا ما نسغني عن بعض:icon33:

وياليت تعطوني رأي سديد كيف اتعامل معه في الموضوع ابغى احسسه بقيمتي ابغى اقهره -سامحوني على هالكلمة- لاني مقهوره منه وبروده
هل اسكت عن الموضوع ولا افتحه؟ والا افضل زعلانه لفتره طويلة والا ...
شيروا علي الله يسعدكم بحكمة
لاني خلاص حاسة اني طحت من عينه من كثر انفعلاتي وعصبيتي

آآآآآآه يا اخواتي لا تنسوني من صالح دعواتكم ولا تتأخرون بالرد علي
احتاج دعوات ونصح

واسفة على الاطاله بس والله انكم اشد من اخواتي

وبانتظاركم